Dôm năr vă jê̆ Têt, tơring Trường Sơn, apŭng Quảng Ninh, dêh char Quảng Bình sa roi chơt hiôk hlŏh dơ̆ng. Đô̆ đô̆i vei lăng sơlam Teh đak Làng Mô tơ̆ apŭng Quảng Ninh hlôi pơgơ̆r ‘nŭng ƀĕng chưng pôk ăn kon pơlei kơ pơlei Ploang, tơring Trường Sơn, apŭng Quảng Ninh. Kon pơlei atŭm hăm rim ƀô̆ đô̆i chă pơgơ̆r jŏh hơri, pơchơt pơ hiơ̆ tơdrong pơchơt sơ̆ ki pơm ăn khei ‘năr Têt chơt hơ iă ‘nă hal hlŏh dơ̆ng.

Jơ ‘năr au, Ƀô̆ đô̆i vei lăng Sơlam Teh đak Làng Mô atŭm hăm rim hơnih jang pôk tơmam drăm Têt ăn kon pơlei kơ pơlei Ploang hăm pơlei Rìn Rìn, pôk ăn rim đe hơ iŏh ao tơnŏ, pôk ăn 5 Hnam chă pơyơ̆ng pơlei pơla, chă yô̆ sŏk păng pơgơ̆r khăm, ƀơk pơgang, ƀơk ăn kơmŭng ăn kon pơlei tơring sơlam Teh đak. Ƀok Hồ Văn Thông, tơ̆ pơlei Ploang, tơring Trường Sơn, apŭng Quảng Ninh chơt hơ iă pơma:“Puih mak tơring sơlam teh đak-Chhơp jơhngơ̆m kon pơlei” tôch kơ ‘lơ̆ng, tôch hơ iă, kon pơlei chhôk ‘nă dêh. Lơ̆m jơhnơr erĭh, sơnăm au ĭnh vang năm pơgơ̆r chơt hơ iă lơ lau ƀar păh ƀô̆ đô̆i păng kon pơlei. Rim tơdrong pơgơ̆r Jŏh ayŏ kơdŏ soang, kon pơlei đei chă hơsoang, hơri, đei pơma dơnuh dĭh băl păng sơng iŏk tơmam drăm tôch hơ chhôk, bu bu jei đei tơmam drăm ngăl.”

Mĭnh pơyan puih mak ‘nao vih dơ̆ng tơ̆ tơring sơlam teh đak Dân Hóa, apŭng Minh Hóa, dêh char Quảng Bình. Kang ƀô̆, ƀô̆ đô̆i Kơđông ƀô̆ đô̆i vei lăng ‘Măng sơlam Apŭng plĕnh teh Cha Lo atŭm hăm rim hơnih jang lơ̆m tơring hlôi tơlĕch jang Tơdrong jang "Puih mak tơring sơlam Teh đak-Chhơp jơhngơ̆m kon pơlei”, tơtom vei lăng năng tông Têt ăn kon pơlei dơnuh erĭh sa tơ̆ jơ̆ng kông Giăng Màn. Tơdrong jang au đei lơ tơdrong pơgơ̆r hơ iă nhen sŏh hlôt nhang ƀlŏk hơdơ̆r ăn rim ƀô̆ đô̆i nuih mơng lôch dŏng teh đak, pơgơ̆r joh hơri, pơlong ‘nŭng ƀĕng chư̆ng, pôk tơmam drăm ăn rim ŭnh hnam. Yă Đinh Thị Mùi, oei tơ̆ pơlei Bãi Dinh, tơring Dân Hóa, apŭng Minh Hóa chhôk ‘nă:“Tơdrong jang “Puih mak tơring sơlam Teh đak-Chhơp jơhngơ̆m đon kon pơlei”, kon pơlei nhôn tôch chơt hơ iă dêh. Kơ yuơ, nhôn ‘nŏh dôm ŭnh hnam dơnuh, tơring atăih yăih dang ei đei tơgŭm djru. Trŭh au kơnh, nhôn gô hơdrin jang sa vă mŭk drăm ŭnh hnam đei ƀô̆h ƀiơ̆, vă hoei gơnang đơ̆ng Teh đak, gơnang đơ̆ng rim hơnĭh bơ̆ jang dơ̆ng.”

Tơdrong jang “Puih mak tơring sơlam teh đak-Chhơp jơhngơ̆m kon pơlei” đei pơgơ̆r hơnơ̆ng hơdrol kơ têt Nguyên đán păng pơđĭ rim tơring sơlam teh đak, pơjing đei jơ ‘năr puih mak ‘lơ̆ng rŏ jơ̆p jang pơlei pơla. Hlŏh đơ̆ng tơdrong jang au, kon pơlei, kang ƀô̆ ƀô̆ đô̆i tơ̆ tơring sơlam teh đak vang tơbăt jơhngơ̆m đon tơgoăt tơgoăl, vang hơdrin yak hlŏh tơnap tap păng hơmŏ iŏk đei jơnei lơ̆m sơnăm ‘nao Quý Mão 2023.

Đăi tă Trịnh Thanh Bình, Kơdră Anih tơm Pơgơ̆r Ƀô̆ đô̆i vei lăng Xơlam teh Quảng Bình ăn tơbăt, adrol kơ Têt Nguyên đán, Ƀô̆ đô̆i vei xơlam teh pơgơ̆r păng hơvơn dôm anih jang păng tơ-'ngla bơngai jang atŭm chă tơgŭm đei rơbâu tơpu tơmam ăn kon pơlei tơring xơlam teh Quảng Bình xơng pơyan Puih mak chơt hơ-iă tơnŏ: “Tơdrong akŏm đei lơ tơdrong jang kăp gĭt păng axong lơ tơpu tơmam đơ̆ng dôm anih jang 'mêm bơnat vă kon pơlei đei tơdrong erih tơnŏ hloh, vei xơđơ̆ng Têt tơnŏ hloh. Pơjing đon lui ăn kon pơlei, khul linh lơ̆m tơring xơlam teh xơng minh pơyan Têt tơnŏ, akŏm tôm, pơjing đei jơhngơ̆m pran vă hơtŏk mŭk drăm tơpôl tơguăt hăm vei lăng xơđơ̆ng tơring teh kơ teh đak".

Adrol kơ noh, tơ̆ săh Hồng Vân, apŭng  A Lưới, dêh char Thừa Thiên Huế, Anih tơm Ƀô̆ đô̆i vei xơlam teh, Trung ương Jơnŭm jang đe Drăkăn Việt Nam jang atŭm hăm Anih jang Đảng dêh char, Anih vei lăng kon pơlei dêh char Thừa Thiên Huế pơgơ̆r tơdrong akŏm “Puih mak Tơring xơlam teh tơnŏ đon kon pơlei” xơng Têt Nguyên đán Quý Mão 2023. Tơ̆ âu, hlôi pơgơ̆r lơ tơdrong jang nhen: Et hơtŏk, pơjao  “Bơbŭng hnam 'mêm kơ eng ăn bơngai hin dơnuh tơring xơlam”; năm apong, axong tơmam ăn bơngai hin dơnuh, unh hnam đe 'lŏ kră jang kăch mạng xơ̆; năm apong păng thơ thâu Têt hăm jơnŭm pơgơ̆r tơring, kon pơlei, đe hŏk tro, khul linh vei lăng xơlam teh; akŏm joh ayŏ kơdŏ xuang; axong tơmam ăn đe hŏk tro păng unh hnam tơnap tap tơ̆ apŭng A Lưới; khăm hơmet jĭ, axong pơgang ăn kon pơlei; dôm tơdrong akŏm joh ayŏ, tơplŏng kơdâu, pơxuh pơchơt kră xơ̆. Tơdrong akŏm adoi axong 10 tŏ  “Bơbŭng hnam 'mêm kơ eng ăn bơngai hin dơnuh tơring xơlam”; 15 tŏ rơmo yŏng, 500 tơpu tơmam Têt.