Đơ̆ng rŏng 3 khei pơdơ̆h hŏk, hơmet ăn mơ̆t hŏk sơnăm hŏk ‘nao 2023-2024, mon Y Dũng, hơdrung M’Nông, oei tơ̆ bon Sar Pa, tơring Thuận An, apŭng Đak Mil ‘noh chĕp ba dơ̆ng hla bơar hŏk, hla bơar chih, ‘long chih păng hơbĕn ao mơ̆t oei lơ̆m Kơđông ƀô̆ đô̆i vei lăng ‘măng sơlam teh đak Thuận An. Mon Y Dũng ‘noh kon mŏm Kơđông ƀô̆ đô̆i vei lăng sơlam teh đak păng đei kang ƀô̆, ƀô̆ đô̆i lơ̆m kơđông rong ‘me hŏk pơhrăm. Hơmet ăn sơnăm hŏk ‘nao, Dũng đei rim kang ƀô̆, ƀô̆ đô̆i Kơđông ƀô̆ đô̆i vei lăng ‘măng sơlam teh đak Thuận An chă pơtho ming dơ̆ng hok lăm 5 păng pơtho dôm tơdrong hle vă mưh mơt hŏk lăm 6 hlôh vao ƀiơ̆. Hăm tơdrong tơgum djru đơ̆ng dôm ƀă mŏm kơlong jơk atŭm hăm tơdrong hơdrin đơ̆ng kơdih, đơ̆ng mĭnh ‘nu hŏk tim gan gơ̆h, Dũng hŏk ƀônh kơ gơ̆h păng hơ nơ̆ng iŏk đei hŏk tro hơgei lơ̆m 4 sơnăm au ki:“Jô̆ truh dang ei, iưnh oei hăm đe mih ma ƀô̆ đô̆i au đĭ 4 sơnăm. Lơ̆m 4 sơnăm au ki đe mih ma vei lăng năng tông ĭnh hŏk tôch kơ ‘lơ̆ng, chă pơtho khan ăn kơ ĭnh rim năr. Ĭnh jei hơdrin hŏk pơhrăm mă hơgei vă hoei lao đon đe mih ma ƀô̆ đô̆i vei lăng sơlam teh đak.”

Jei hlôi gơ̆h hơgei hlŏh lăp đơ̆ng rŏng iŏk pơm kon mŏm kơ Kơđông ƀô̆ đô̆i vei lăng sơlam teh đak, mon Nông Tiến Mạnh, hŏk tro lăm 4A, Hnam trương jăl kơđeh Nguyễn Du, tơring Dak Wil, apŭng Cư Jút, dêh char Dak Nông, pơma:“Ŭnh hnam nhôn tơnap tap, ƀă jĭ jăn hơnơ̆ng, ưh kơ kĕ jang trăp, dôm tơdrong jang lăp hơdrô̆ mĕ ĭnh jang ngăl. Lơ̆m mă kơtơ̆ng ĭnh đei đe mih ma Kơđông ƀô̆ đô̆i vei lăng sơlam teh đak Nậm Na iŏk rong ‘me, mĕ ƀă ĭnh chơt hơ iă pă băt dang yơ hloi kơ yuơ ĭnh đei bơngai vei lăng năng tông lơ̆m hơrih sa, hŏk pơhrăm, tơgŭm djru ŭnh hnam nhôn. Oei lơ̆m Kơđông vei lăng sơlam teh đak hăm đe mih ma ƀô̆ đô̆i ‘nŏh ŭnh hnam mă 2 kơ ĭnh.  Hodrol oei sa atŭm hăm đe mih ma ĭnh hŏk pơhrăm tim gan gơ̆h. Đơ̆ng mă đei mih ma ƀô̆ đô̆i iŏk rong ‘me păng lăng tông nông gia kơjăp, kơna roi năr ĭnh roi chơt hơ iă, hơdrin hŏk pơhrăm hloh dơ̆ng, tơdrong hŏk pơhrăm lơ̆m 2 sơnăm kơ au ĭnh iŏk đei hŏk tro hŏk hơgei.”

Ƀok Điểu Plơu, Kơ iĕng kơdră chĕp pơgơ̆r Hơnih bơ̆ jang vei lăng kon pơlei tơring sơlam teh đak Quảng Trực, apung Tuy Đức, dêh char Dăk Nông tơbăt, rim tơdrong jang “kon mŏm kơđông ƀô̆ đô̆i vei lăng sơlam teh đak”, “Yak hơdoi hăm oh năm tơ̆ hnam trương” đơ̆ng ƀô̆ đô̆i vei lăng sơlam teh đak hlôi tơgŭm djru ‘lơ̆ng hơ iă ăn rim đe kôn mon ŭnh hnam tơnap tap đei rơvơn năm hok pơhrăm tơ̆ hnam trương. Dôm tơdrong tơgŭm djru gĭt kăl truh hloi mŭk drăm păng jơhngơ̆m đon hlôi tơgum ăn lơ kôn mon hŏk tro hŏk gơ̆h, vang tơgŭm tŏ sĕt tơdrong tơnap tap lơ̆m bơ̆ jang pơtho pơhrăm ăn tơring sơlam teh đak, tơring atăih yăih:“Tơring Quảng Trực ‘noh tơring sơlam teh đak, tơring atăih yăih, tơring kon kông. Hơnih chĕp pơgơ̆r ƀô̆ đô̆i vei lăng sơlam teh đak hlôi lăng ba, tơgŭm djru tơring tôch kơ lơ, mă kăl ‘nŏh rim đe oh đei năm hŏk ‘nŏh dôm đe oh unh hnam dơnuh, ŭnh hnam tơnap tap, mơ ti mơtĕk, ƀô̆ đô̆i vei lăng sơlam teh đak iung jang hơdoi hăm kơdră tơring tôch kơ trŏ lăp. Kơdră tơring chơt hơ iă dêh.”

Hăm trong jang “ pôk ăn chư, chro ăn jơhngơ̆m đon hơpơi ‘meh vă” sơnăm 2016, Hơnih chĕp pơgơ̆r Ƀô̆ đô̆i vei lăng sơlam teh đak dêh char Đak Nông tơlĕch jang tơdrong jang “Ba oh năm tơ̆ hnam trương”. Sơnăm 2019, ƀô̆ đô̆i vei lăng sơlam teh đak dêh char Đak Nông hơnơ̆ng tơlĕch jang tơdrong jang “Kon mŏm kơdông Ƀô̆ đô̆i vei lăng sơlam teh đak”. Truh sơnăm hŏk 2022-2023, hơnih au tơlĕch jang dơ̆ng tơdrong jang “Kang ƀô̆, ƀô̆ đô̆i Khul Ƀô̆ đô̆i ba oh năm tơ̆ hnam trương”.

Đại tá Bùi Đức Chính, Kơ iĕng kơdră chĕp pơgơ̆r Đảng Ƀô̆ đô̆i vei lăng sơlam teh đak dêh char Dak Nông tơbăt, hlôi đei 222 ‘nu mon hŏk tro oei tơ̆ 7 tơring sơlam teh đak kơ dêh char Dak Nông păng 12 ‘nu mon hŏk tro kơ dêh char Mondulkiri (Campuchia) đei ƀô̆ đô̆i vei lăng sơlam teh đak dêh char Dak Nông tơgŭm djru năm tơ̆ hnam trương. Akŏp kon jên tơguưm djru rim đe mon ŭnh hnam tơnap tap ‘noh vă jê̆ 4 ti 500 triu hlak jên, đơ̆ng kon jên vang chă tơra lơ̆m khul ƀô̆ đô̆i vei lăng sơlam teh đak dêh char Dak Nông. Hăm tơdrong tơgŭm djru đơ̆ng kang ƀô̆, ƀô̆ đô̆i kơ Kơđông ƀô̆ đô̆i vei lăng sơlam teh đak, rim đe mon hŏk tro hlôi hơdrin hŏk pơhrăm vă yak hloh tơnap tap, kơƀăh kơƀôch găh tơmam drăm, jơhngơ̆m đon vă đei jing kôn mon kon sau chu yom, hŏk tro hơgei.Lơ đe mon đơ̆ng hŏk tro hŏk ưh kơ gan gơ̆h hlôi hơdrin đei jing hŏk tro hơgei păng gơ̆h hơgei hlŏh.“Tơdrong jang “ba oh năm tơ̆ hnam trương-Kon mŏm Kơđông ƀô̆ đô̆i vei lăng sơlam teh đak” păng Tơdrong vă jang “Kang ƀô̆, ƀô̆ đô̆i Khul ƀô̆ đô̆i ba oh năm tơ̆ hnam trương: sơkơ̆t hơdăh tơdrong ‘mêm mơnat dih băl, tơgoăt tơgoăl dih băl kơjăp ƀar păh kang ƀô̆, ƀô̆ đô̆i Khul ƀô̆ đô̆i vei lăng sơlam teh đak hăm kon pơlei rim hơdrung oei tơ̆ tơring sơlam teh đak. Adoi, ‘moi kiơ̆ tơdrong jang hlôi pơtho tơbăt ăn rim kang ƀô̆ đô̆ đô̆i kơ khul ƀô̆ đô̆i vei lăng sơlam teh đak hơnơ̆ng atŏk jơhngơ̆m đon tơgoăt tơgoăl ƀô̆ đô̆i kon pơlei, tơ iung pơjing jơhngơ̆m đon ƀô̆ đô̆i kon pơlei tơgoăt tơgoăl tơklep kơjăp hăm kon pơlei rim hơdrung oei tơ̆ tơring sơlam teh đak, tơgop pơm ‘lơ̆ng hơ iă tơdrong joăt joe “Ƀô̆ đô̆i Ƀok Hô”, “Bơngai ƀô̆ đô̆i kơlong jơk: lơ̆m chăl ‘nao.”

Đơ̆ng rŏng 7 sơnăm, rim tơdrong jang “ba oh năm tơ̆ hnam trương”, “Kon mŏm kơđông ƀô̆ đô̆i vei lăng sơlam teh đak” kơ khul Ƀô̆ đô̆i vei lăng sơlam teh đak hlôi tơgŭm ăn lơ đe oh hŏk tro oei tơ̆ tơring sơlam teh đak dêh char Đak Nông đei dơ̆ng rơvơn năm tơ̆ hnam trương hŏk pơhrăm. Um rup rim ƀô̆ đô̆i kơlong jơk roi năr roi ‘lơ̆ng rŏ hơbŏ nhen hăm tơring sơlam teh đak oei ƀĕnh ƀang tơdrong tơnap tap hrat hrĭn.