Tơroi găh atŏk tơ iung mŭk drăm tơpôl kơ thôn 8, tơring sơlam teh đak Ea Bung, apŭng Ea Sŭp, ƀok Bùi Công Oách, Bí thư chi bộ tơbăt, tơdrong hơ iă hlŏh ‘nŏh thôn hlôi pơjing đei chŭn na ƀa đak xă, chă rei pơtăm hơdrĕch ‘lơ̆ng nhen ST25, Đài thơm, păng tơlĕch jang rong rơmo lai kiơ̆ trong rong lơ. Dôm trong jang au hlôi jơnei hơ iă pơtêng hăm hơdrol au ki. Ƀok Bùi Công Oách sơkơ̆t hơdăh, dôm tơdrong tơplih găh jơhngơ̆m đon chŏh jang sa păng rong kon tơrong kơ kon pơlei jĭ gơnơm đơ̆ng kang ƀô̆, đảng viên Kơđông Ƀô̆ đô̆i vei lăng ‘măng sơlam teh đak Dak Ruê tơgŭm:“Đơ̆ng năr đei kang ƀô̆ ƀô̆ đô̆i vei lăng sơlam teh đak vang hop akŏm hăm chi ƀô̆, găh atŏk tơ iung mŭk drăm kơ kon pơlei tôch kơtang. Mă kăl tơdrong pơrô̆ iung jang ‘lơ̆ng hơ iă đơ̆ng khŭl kơdră chĕp pơgơ̆r Đảng tơring adoi nhen rim ƀô̆ đô̆i vei lăng sơlam teh đak hlôi pơchŏh trong ăn chi ƀô̆ tôch lơ tơdrong trŏ lăp găh atŏk tơ iung mŭk drăm. Đĭ đăng sơnăm au kon pơlei chă rei pơtăm hơdrĕch ƀa plei ăl ‘lơ̆ng păng ST25 păng trong jang au nhôn tŏk bŏk lang să jang kiơ̆.”

Jĭ bơngai blŭng a iung jang rong rơmo lơ tơ̆ tơring Ea Bung, ƀok Đỗ Xuân Trường, Bí thư chi bộ thôn 5, tơbăt, sơ̆ kon pơlei lăp chă răt rong rơmo hmă, chă vei hơchăng, iok yua ư̆h kơ jăp. Gơnơm kang ƀô̆ Ƀô̆ đô̆i vei lăng sơlam teh đak chă pơtho tơbăt phăl hơlăng păng tơgŭm ăn lơ tơdrong, ƀok hlôi tơplih chă rong rơmo lai lơ̆m sơnăm 2020. Sơnăm sơ̆, jang sa iŏk đei vă jê̆ 100 triu hlak jên păng sơnăm au rŏ năng gô iŏk đei lơ hlŏh ƀar ‘măng dơ̆ng. Lơ ŭnh hnam lơ̆m thôn, lơ̆m tơring jei tŏk bŏk pơm kiơ̆ păng ‘măng blŭng hlôi iŏk đei jơnei hơ iă:“Kang ƀô̆ Ƀô̆ đô̆i vei lăng sơlam teh đak chă pơtho ăn tôch kơ phăl, đei ‘măng vang tơgop kon jên vă tơgŭm ăn kon pơlei rong kon tơrong, pơjing rơvơn atŏk tơ iung mŭk drăm, xut xa pơngot rơvet dơnuh hin. Tơdrong rơvơn hlŏh ‘nŏh ‘ngiĕt chă hiĕm jĭ jrăh jrai, bơ̆n tơ̆ au jang ƀa lơ, đei hơnoong ƀa bơ̆n kơtiăl ‘măn ăn rơmo sa prăt sơnăm. Adoi, tĕh să chă pơtăm ‘ngiĕt, pơtăm hơƀo ot je rong rơmo.”

Đei ăn bơ̆ jang tơ̆ tơring Ea Bung pơm Kơ iĕng Kơdră chĕp pơgơ̆r Dơnŏ anĭh Đảng tơring, Trung tá Nguyễn Văn Thanh, kang ƀô̆ Kơđông Ƀô̆ đô̆i vei lăng ‘Măng sơlam teh đak Đak Ruê, tơbăt, tơdrong mă blŭng kăl băt hơdăh tơring, băt hơdăh tơdrong choh jang sa kơ kon pơlei. Atŭm hăm ‘nŏh, rim ‘nhŏng ŏh jei hơdrin hŏk pơhrăm, chă lăng trong jang sa hơ iă đơ̆ng lơ tơring, đơ̆ng nŏh mă tơbăt, pơgơ̆r jang sa kiơ̆ đei jơnei:“Hlŏh đơ̆ng oei sa hơdoi hăm kon pơlei adoi nhen lơ̆m jang sa, chŏh jang sa tơ̆ Ea Bung đei rơvơn hlŏh, păng ƀô̆h tơdrong rong kon tơrong păng jang ƀa ‘nŏh rơvơn hlŏh mă lei tim gan băt jang sa, oei brăh brư đĕch. Kơna ĭnh hlôi chă pơchŏh trong hăm khŭl kơdră Đảng atŏk kơtag chĕp pơgơ̆r, pơrô̆ lơ̆m atŏk tơ iung mŭk drăm, tơpôl. Lơ̆m au akŏm 2 tơdrong jang tơm ‘nŏh jang chŭn na ƀa đak păng rong rơmo.”

Thượng tá Phạm Đức Khá, Chính trị viên Kơđông Ƀô̆ đô̆i vei lăng ‘Măng sơlam teh đak Đak Ruê tơbăt, tơ̆ tơring atăih yăih groi teh rang rar Ea Bung, tơnap tap hlŏh ‘nŏh pơm lơ liơ vă kon pơlei erih sa sơđơ̆ng. Tơdrong erĭh sa kon pơlei sơđơ̆ng, atŏk tơ iung ‘noh sơlam teh đak mă gei kơjăp pơm tơm kơdih. Kơ yuơ lơ loh, mư̆h ăn kang ƀô̆ Ƀô̆ đô̆i vei lăng sơlam teh đak vang iung bơ̆ jang tơ̆ tơring păng đảng viên vang hop akŏm tơ̆ rim chi ƀô̆, hơnĭh chă rơ̆ih tôch hơlen dôm kang ƀô̆, đảng viên gơ̆h hơgei, hlôh vao lơ̆m tơring. Rim kang ƀô̆, đảng viên hlôi iung jang ‘lơ̆ng hơnăp jang, tơgop tơgŭm tơ iung pơjing tơring Ea Bung roi năr roi atŏk tơ iung, vei kơ jăp sơđơ̆ng tơring sơlam teh đak:“Lơ̆m bơ̆ jang tơdrong jang chĭnh trĭ kơ hơnĭh lơ̆m khei năr au ki ‘nŏh hơnăp jang kơ kang ƀô̆ năm bơ̆ jang tơ̆ tơring, adoi nhen đảng viên vang năm hop akŏm hăm chi ƀô̆ thôn pơlei tơring sơlam tĕh đak hlôi hơnhăk đei jơnei hơ iă. Hlôi tơgop tơgŭm ăn khŭl kơdră chĕp pơgơ̆r đảng tơring, khul đảng pơlei pơla hơmet pơ ‘lơ̆ng bơ̆ jang ‘lơ̆ng kơjăp hlŏh dơ̆ng, atŭm hăm khŭl kơdră chĕp pơgơ̆r đảng tơring pơjing rim chi ƀô̆ rơgŏh ‘lơ̆ng, pran kơ jăp iăp kơtang.Hlôi bơ̆ jang ‘lơ̆ng hơnăp jang ‘noh gơng tơrŏh klŏh klĕch ƀar păh Đảng Dơnŏ anĭh Ƀô̆ đô̆i vei lăng sơlam teh đak hăm Dơnŏ anĭh Đảng tơring”

Sơnăm 2021, tơring Ea Bung hlôi drơ̆ng nơ̆r iŏk đei jing tơring tơrang ‘nao păng ‘nau jing tơring blŭng a lơ̆m tơring sơlam teh đak dêh char Đak Lăk jang keh đang tơdrong jang au. Tơ iung pơjing tơring tơrang ‘nao tơklep kơjăp hăm tơ iung pơjing trong jang pơđĭ kon pơlei vang vei lăng sơđơ̆ng dơ̆ng kơjăp tơring sơlam teh đak tơ̆ tơring Ea Bung.