Tơdrong jang “Pơyan puih mak tơring sơlam - Tơnŏ jơhngơ̆m kon pơlei” đei khŭl lĭnh vei lăng tơring sơlam dêh char Gia Lai tơlĕch jang tơ̆ dôm xăh sơlam apŭng Ia Grai, Đức Cơ, Chư Prông, kơ dêh char Gia Lai. Tơ̆ dôm tơdrong jang, khŭl lĭnh ƀô̆ đô̆i vei lăng tơring sơlam kŭm hăm kon pơlei tơring nŭng ƀĕng chư̆ng, tôn chĭng chêng, hơri hơsoang vă tơklep tơdrong ‘mêm lĭnh - kon pơlei.

Hơdai hăm ‘noh, dôm bơngai đei jơhngơ̆m đon ‘mêm mơnat pơgơ̆r dôm kơdeng tơmam 0 hlak jên, pơjao ăn kơ kon pơlei kơ hrĕng tơpu tơmam ‘noh khăn, kơmŭng, phe păng hla ar chih, tơmam yua hŏk pơhrăm ăn hŏk tro. Mă khan ưh kơtih găh tơmam ră mă lei ‘nâu adoi jing dôm tơmam yua kăl, vă kon pơlei đei sa têt hiôk chơt ƀiơ̆.