Oh Trần Quốc Thịnh păng Trần Hoàng Duy, oei tơ̆ tơring Nhì, xăh Mỹ Long Nam, apŭng Cầu Ngang, dêh char Trà Vinh đơ̆ng oei 'lâ̆p pơti ƀă. Mĕ kơ bre oh đơ̆ng rŏng kơ năm jang tơ̆ ataih đơ̆ng pơlei pơla, hlôi oei kơ bơngai nai vă chă đei anih gơnơm, mă lei tơdrong hơrih 'nao adoi tơnap tap, prơih lê̆ bre oh hơrih hơtŭm hăm yă kră. Pêng yă xâu hơrih tơnap tap 'năr đei phe xa ƀa xŏng, 'năr mot noh đe oh ưh đei năm hŏk tơ̆ hnam trưng. Pŭn ai, ăh xơnăm 2019, bre oh đei ƀô đô̆i vei xơlam teh dêh char Trà Vinh iŏk rong kiơ̆ tơdrong jang “Kon rong anih linh vei xơlam teh” noh hlôi xơng bre oh vih hơrih atŭm lơ̆m Kơđông linh vei xơlam teh Mỹ Long păng đei tơdrong tơgŭm dăp đon dăp bơnôh đơ̆ng jơnŭm pơgơ̆r tơ̆ tơring.

Trung úy Nguyễn Quốc Việt, linh đei pơjao xơnong vei lăng pơtho 2 'nu oh ăn tơbăt, đơ̆ng rŏng kơ đei ƀô đô̆i xơng vih oei, tơdrong hơrih kơ bre oh hlôi tơplih tôm tơdrong. Đơ̆ng rŏng 1 xơnăm pơm kon rong linh tơ̆ kơđông vei xơlam teh, đơ̆ng minh hŏk tro hŏk tơjruh hlôi tŏk brăm ƀiơ̆, jơhngơ̆m jăn adoi grăng pran hloh: “Hăm kơdih inh noh ƀôh mon Duy đei hơrih atŭm lơ̆m anih linh, xư chu ngua, năm tơ̆ yơ adoi pơtruh nơ̆r apinh, pơma xa phep ngua, tơƀơ̆p bơngai 'lŏ noh gơh chă hmach âu to... Găh jơ noh ăh 5 jơ pơgê đe linh iung noh mon Duy adoi iung kiơ̆ mơ̆n. Mon Duy hơpơi 'meh gơh đei mơ̆t jang lơ̆m anih linh, nhôn hơdrin chă tơgŭm, pơtho pơhrăm mon vă ning nai kơnh gơh mơ̆t jang lơ̆m khul linh”. 

Oh Trần Hoàng Duy xơnăm âu hŏk lăm 6, gô oei hơrih atŭm hăm đe linh tơ̆ kơđông linh vei xơlam teh truh lai yơ hŏk đang lăm 9 nhen 'nhŏng xư. Oh tơroi, truh oei hơrih lơ̆m kơđông linh vei xơlam teh, tơdrong xŏng xa, tep pơdơi noh trŏ jơ, đei đe met pơtho pơhrăm tơnăp noh tơdrong hŏk pơhrăm da ƀiơ̆ hloh kơ hơdrol ki.

Inh hơpơi 'meh ning mônh kơnh gơh jang kăn ƀô̆ kơđông linh vei xơlam teh thoi lĕ đe met: “Tơ̆ âu pơgê 5 jơ noh iung đơ̆ng tep hơmet năm hŏk, păng rim pơgê đe met axong ăn 15.000 hlj, oei hŏk ăh kơsơ̆ noh axong ăn 10.000 hlj dơ̆ng. Kơsơ̆ xŏng xa, pơhrăm tơplŏng kơdâu hăm đe met. Inh 'mêm kơ đe met. Inh hơdrin hŏk mă rơgei vă hơnô̆ hơnăp kơnh mơ̆t jang linh, vă gơh đei jang lơ̆m kơđông ƀô đô̆i”.

Găh oh Trần Quốc Thịnh, xơnăm xơ̆ hlôi hŏk đang jăl THCS păng đei chôt vih hơrih atŭm hăm unh hnam, đei tơmơ̆t lơ̆m Tơdrong jang “Tơgŭm đe oh truh hnam trưng” hăm jên tơgŭm 500.000 hlj 1 khei. 'Nguaih kơ noh, vă pơm trong hiôk đơ̆ng rŏng kơ chôt vih hăm unh hnam, đe kăn ƀô̆, khul linh kơ Anih linh vei xơlam teh Mỹ Long chă hơvơn akŏm đei kớâ̆p hla bar mong jên 27 trĭu hlj vă axong ăn kơ oh, atŭm hăm lơ hla bar chih păng tơmam hŏk pơhrăm. Trung tá Phan Thanh Sang, jang chĭnh trĭ tơ̆ Anih linh vei xơlam teh Mỹ Long ăn tơbăt, đơ̆ng rŏng kơ đĭ khei năr pơm kon rong, đe oh đei tơmơ̆t lơ̆m tơdrong jang “Tơgŭm đe oh truh hnam trưng” vă gơh pơtoi đei iŏk tơgŭm păng pơtoi đei hŏk pơhrăm atŭm hăm hla bar mong jên. Kơyuơ noh, nhôn gô hơdrin hơlêm dih băl, atŭm jơhngơ̆m tơgŭm mưh kĕ đei: “Kơđông linh tơlĕch tơdrong jang âu đơ̆ng xơnăm 2019. Găh tơdrong rong 2 mon noh hơvơn đơ̆ng rim bơngai jang 'mêm bơnat, đe linh lơ̆m kơđông păng đơ̆ng kơđông nai chă tơgŭm. Mă 3 noh đơ̆gn Jên mong choh jang xa, pơm thoi yơ vă tơgŭm, pơm hiôk hloh ăn tơdrong hŏk pơhrăm kơ đe mon”.

Atŭm hăm tơdrong jang “Kon rong kơ anih linh vei xơlam teh”, đe kăn ƀô̆, khul linh kơ Anih linh vei xơlam teh Mỹ Long, dêh char Trà Vinh oei iŏk tơgŭm 10 hŏk tro đei tơdrong hơrih tơnap tap lơ̆m tơring mă po pơgơ̆r kiơ̆ Tơdrong jang “Tơgŭm đe oh truh hnam trưng”. Kiơ̆ kơ noh, rim 'nu oh đei tơgŭm 500.000 hlj 1 khei jên hŏk pơhrăm pơdui đunh truh đĭ lăm 12. Đơ̆ng tơdrong jang âu hlôi tơgŭm lơ đe oh đơ̆ng minh hŏk tro hŏk tơjruh jing hŏk tro hŏk rơgei.

Đơ̆ng xơnăm 2016 truh dang ei, Ƀô̆ đô̆i vei xơlam teh dêh char Trà Vinh pơtoi tơgŭm ăn 34 hŏk tro đei tơdrong hơrih tơnap tap hăm kơsô̆ hloh 1 tih 400 trĭu hlj. Jên tơgŭm âu kơyuơ đe kăn ƀô̆, khul linh kơ tôm anih jang linh chă tơgŭm, tơgop păng jên mong hơtŏk pơm jang đơ̆ng dôm anih linh. Đơ̆ng tơdrong jang âu, rim anih linh vei xơlam teh lơ̆m jâ̆p teh đak chă tơgŭm pơhrăm vă kơ hrĕng 'nu hŏk tro đei tơdrong hơrih tơnap tap tơ̆ tơring xơlam teh gơh hŏk pơhrăm, vă ning nai kơnh jing bơngai pơyua tơnăp hloh.