Jĭ hơdrung bơngai K Dong đei rơneh păng tih vơ̆ tơ̆ pơlei Đak Wang, tơring Sa Loong, apŭng Ngọc Hồi (dêh char Kon Tum), ăh tŏk 19 sơnăm, Y Trang đei Anih jang  732 tơmơ̆t jang kŏng nhơ̆n. Đơ̆ng rŏng đei pơhrăm găh kih thuơ̆t kôih kơtăk kơsu, Y Trang đei asong iŏk jang 3 ha.

Hloh 10 sơnăm tơguăt hăm anih jang âu, truh dang ei tơdrong hơrih unh hnam Y Trang hlôi sơđơ̆ng. Ƀar 'măng pơtoi hloi sư chơt hơ-iă đei pơkăp jĭ 1 lơ̆m 4 bơngai jang kơ kŏng ti năm akŏm bơngai kôih kơtăk kơsu hơgei lơ̆m tôm binh đoàn. Y Trang ăn tơbăt, 'nguaih kơ 3 ha kơsu iŏk jang, klo hơkăn sư oei đei 1 ha cheh phe. Gơnơm đei tơmơ̆t jang kŏng nhơ̆n noh bre klo hơkăn đei chă hŏk hơlen găh vei jang pơgar cheh phe noh đei yua lơ hloh: “Ăh đei tơmơ̆t jang kŏng nhơ̆n tơ̆ Kŏng ti 732 , kŏng ti pơih lăm pơtho găh kôih kơtăk kơsu. Đơ̆ng rŏng kơ jang kôih kơtăk kơsu, inh đei pơjao vei jang pơgar 'long. Jing bơngai jang kơ Kŏng ti, inh đei sa jên khei sơđơ̆ng, vei măh mai ăn tơdrong hơrih. Hăm dôm unh hnam tơnap tap, Kŏng ti tơgŭm tơmam drăm sa vă đe yĕt ưh đei kơƀah tơmam sŏng sa lơ̆m dôm khei tơjê̆ kăt ƀa. Pơtêng hăm dôm bơngai nai lơ̆m pơlei mă ưh đei jang kŏng nhơ̆n noh tơdrong hơrih nhôn đei ƀôh, măh mai hloh”

Unh hnam ƀok Nguyễn Công Hoàn, pơlei pơla tơ̆ Thái Bình năm jang tơ̆ tơring Đak Kan, apŭng Ngọc Hồi, dêh char Kon Tum, pơtơm pơm jang hăm 2 tơpang ti hoh hoi. Đei tơdrong tơgŭm đơ̆ng Kŏng ti 732, unh hnam ƀok brư̆ brư̆ đei hơtŏk, man đei hnam kơjăp 'lơ̆ng. Klo hơkăn jang kŏng nhơ̆n tơ̆ Kŏng ti 732, dang ei tŏk bŏk iŏk jang 5,5 ha kơsu. Unh hnam oei đei 1 ha kơsu păng 1 ha cheh phe. Dang ei, ƀok Nguyễn Công Hoàn 'noh Kơdră Jơnŭm jang găh jên hu kơ Hơp tak săh choh jang sa Đăk Kan, hăm 400 'nu jang, lơ̆m noh pơm jang 80 ha ƀa na. Mir na ƀa đak âu adoi kơyua Kŏng ti 732 muih choh đang kơ noh asong ăn dôm unh hnam pơkăp iŏk jang:  “ Tơ̆ Ngọc Hồi, nhôn đei lơ kon pơlei kon kông đơ̆ng tơring tu, tơring pơbăh truh oei. Tơ̆ tơring Đak Kan đei lơ kon pơlei kon kông kơdih, noh hơnơ̆ng đei kŏng ti tơgŭm. Đơ̆ng tơdrong man trong nơnăm, ming man anih jang kơ thôn pơlei, tơgŭm kon pơlei iung pơm jang klaih đơ̆ng hin dơnuh, asong tơdrong jang ăn đe hơdruh tơdăm, kon hơ-ioh kon kông. Noh mŭk drăm tơ̆ tơring Đak  Kan nhôn âu hơtŏk tơ-iung hơtŏ băl. Kĕ đei thoi âu noh gơnơm đei tơdrong tơgŭm đơ̆ng kŏng ti 732”

Kŏng ti jang kơdih 732  vei lăng 2.330 ha  kơsu, hloh 80 ha ƀa na, 1 Hnam kơmăi pai kơtăk kơsu gơh pơm tơlĕch 5.000 tâ̆n kơtăk kơsu kro 1 sơnăm. Kơtăk kơsu kro đei pơm tơlĕch rim sơnăm hơnơ̆ng đei hloh kơ tơdrong tơchơ̆t mă  Binh đoan pơjao. Kŏng ti hlôi asong tơdrong jang, sa jên khei sơđơ̆ng ăn jê̆ 1.500 'nu bơngai jang, lơ̆m noh tong hơnê̆ noh bơngai kon kông. Kŏng ti adoi chă tơroi, hơvơn kŏng nhơ̆n păng kon pơlei lơ̆m tơring pơm kiơ̆ tơnăp dôm tơchơ̆t jang đơ̆ng Đảng, khôi luơ̆t Teh đak. Kŏng ti oei asong jên man hnam joh ayŏ, hnam trưng hŏk, hnam rong hơ-ioh, anih pơchơt; khăm hơmet jĭ, asong pơgang ăn kon pơlei. Đăi tă Hà Văn Nam, Ƀĭ thư Anih jang Đảng, Kơ-iĕng kơdră Kŏng ti 732 tơroi:“Kŏng ti 732 pơm jang sơnong dơnơm lơ̆m tơring teh găh Tu Tây Nguyên. Pơm jang tơ̆ 4 tơring kơ 2 apŭng Ngọc Hồi păng Sa Thầy kơ dêh char  Kon Tum; pơm kiơ̆ sơnong tơlĕch hơtŏk mŭk drăm, vei sơđơ̆ng tơpôl tơ̆ tơring. Kŏng ti hơnơ̆ng tơrĕk tơgŭm asong tơdrong jang ăn kon pơlei kon kông, mă kăl noh kon pơlei kon kông kơdih tơ̆ tơring, dang ei Kŏng ti iŏk bơngai jang hloh 50%. Jên khei kơ bơngai jang đei jê̆ 9 trĭu hlj rim khei. Kŏng ti hlôi jang tơnăp tơchơ̆t pơyua ăn tơpôl, ưh hơdrô̆ hăm kŏng nhơ̆n mă hăm kon pơlei tơ̆ tơring hloi, mă kăl hăm rim unh hnam kon pơlei đei tơdrong hơrih tơnap tap noh kŏng ti tơtom chă tơgŭm, vă kon pơlei đei tơdrong hơrih sơđơ̆ng hloh. Kŏng ti hơtŏk tơdrong tơguăt hăm dôm jăl pơgơ̆r tơring păng kon pơlei tơ̆ tơring. Mă kăl jang hadoi hăm dôm khul linh lơ̆m tơring teh, hơnơ̆ng chă hơlen vei tơring sơlam teh, ưh đei bơngai yơ chă kơdâu glăi găn sơlam teh”

Hăm dôm tơdrong jang đei jơnei, Kŏng ti 732 hlôi đei Kơdră teh đak pôk ăn hơnăn Khul pơm jang Nuih mơng lơ̆m chăl tơplih 'nao. Lơ anih jang, tơ-'ngla bơngai jang kơ kŏng ti adoi đei iŏk tơmam pôk hơpăh kăp gĭt đơ̆ng Anih tơm jang găh khul linh păng Binh đoan 15. Mă lei hăm kang ƀô̆, kŏng nhơ̆n kơ Kŏng ti 732, dôm bơngai hlôi tơguăt kơjăp hăm tơring teh “minh nơ̆r iĕr ŏ 3 tơring teh đak adoi mơ̆ng đei” âu, tơmam hơpăh kăp gĭt hloh noh đon lui, jĭ anih gơnơm kơjăp ăn kon pơlei kon kông tơ̆ tơring sơlam teh kơ teh đak.