Iung pơma tơ̆ pơgơ̆r, Kơdră chĕp pơgơ̆r Kuô̆k hô̆i Vương Đình pơma tơbăt jơhngơ̆m đon tơ̆ hơnăp dôm tơdrong tơgop, hiong răm đơ̆ng kon pơlei, kang ƀô̆, ƀô̆ đô̆i lơ̆m ‘măng tơjră tang găn ‘mi kial pơrăm, ŭnh sa, gre tơtơ̆m hơlŭk păng dôm tơdrontg jang jơnei tih tên, dôm bơngai ‘lơ̆ng hơ iă gơ̆h hơgei lơ̆m tơdrong jang đĭ đăng kon pơlei vang jang tang găn ŭnh sa păng dŏng tơgŭm.

Kơdră chĕp pơgơ̆r Kuô̆k hô̆i Vương Đình Huệ akhan, vang kơrŭn đĭ jơhngơ̆m atŭm hăm rim khul bơ̆ jang lơ̆m tang găn hơlau, pĭt ŭnh sa păng dŏng tơgŭm ‘noh tơdrong vang iung jang đơ̆ng kơdrơ̆m kon pơlei pơla. Mă kăl nhen: Khul tang găn hơlau, pĭt ŭnh sa păng dŏng tơgŭm thĭ trân Lạc Dương, dêh char Lâm Đồng hăm năm jang kơdih, iung jang đĭ jơhngơ̆m đon vang jang tang găn hơlau, pĭt ŭnh sa, dŏng tơgŭm, nhen ‘nhŏng Nguyễn Hữu Đốn hlôi nuih mơng, lôch răm mư̆h dŏng đe lơ̆m ‘măng ŭnh sa tơ̆ pơlei tơm Phan Thiết, dêh char Bình Thuận au ki; Khul tơgŭm djru ming hơmet jĭ FAS Angle hăm trong jang “Dŏng hơrih ‘nŏh jing tơdrong kăl hloh” hlôi tơgŭm dŏng rơbau ‘nu bơngai tơƀơ̆p sar bar, đei tơdrong păng tơjê̆ au dŏng kĕ lơ bơngai lơm ‘măng ŭnh sa kơtang tơ̆ phương Khương Đình, kuân Thanh Xuân, pơlei tơm Hà Nội ... ‘Nau jĭ dôm tơdrong iung jang tôch ‘lơ̆ng liĕm, lang să kơtang jơhngơ̆m đon nuih mơng, joăt joe “ ‘Mêm kơ eng kơ đe nhen kơdih kau bơ̆n” đơ̆ng hơdrĕch hơdrung bơ̆n.

Tơ̆ pơgơ̆r au, hôn bơnê, pôk pơ ư dôm jơhngơ̆m đon ‘lơ̆ng, dôm tơdrong jang nuih mơng, dôm tơdrong iŏk jơnei kơtang đơ̆ng rim khul jang păng kon pơlei lơ̆m bơ̆ jang tang găn hơlau ŭnh sa,pĭt ŭnh sa păng dŏng tơgŭm păng tơbăt jơhngơ̆m đon ƀlŏk hơdơ̆r dôm kon pơlei răm, tơbăt jơhngơ̆m đon ‘mêm kơ eng hăm kang ƀô̆, ƀô̆ đô̆i kŏng ang păng kon pơlei hlôi nuih mơng, plang akau iung jang pĭt ŭnh sa, tơgŭm dŏng lơ̆m khei năr au ki.

Lơ̆m khei năr kơnh, tơdrong ŭnh sa, đôh, sar bar rŏ năng tôch kơtang, mă kăl tơ̆ rim hnam oei akŏm, hnam oei kơ lơ ŭnh hnam tơtil, hnam kon pơlei oei hloi pơm tơlĕch tĕch mơdro tơmam drăm hloi, kơchơ, hơnih kơdrơ̆m bơngai. Kiơ̆ đơ̆ng Kơdră chĕp pơgơ̆r Kuô̆k hô̆i, tơdrong mă au pơ koĕl khul kanh sat tang găn hơlau, pĭt ŭnh sa păng tơgŭm dŏng atŭm hăm rim tơring, rim hơnih jang kăl atŏk kơtang bơ̆ jang ‘lơ̆ng, hơmet mă tôm tong, ‘lơ̆ng hơ iă găh tơdrong jang au. Kơdră chĕp pơgơ̆r Kuô̆k hô̆i Vương Đình Huệ pơma: “Kăl lăng kơjăp bơ̆jang tang găn hơlau, iŏk tang găn hơlau ‘nŏh kăl hloh, đơ̆ng noh pơm dă ƀiơ̆ đei ŭnh sa păng hiong răm kơ yuơ ŭnh sa pơm ăn, mă kăl găh kon bơngai, vei lăng năng tông jơhngơ̆m jăn kon pơlei ‘nŏh jĭ vei lăng năng tông sơđơ̆ng kon pơlei, jing tơdrong jang kăl hloh kơ vei lăng năng tông sơđơ̆ng dơ̆ng kơjăp, atŏk tơ iung teh đak; sơđơ̆ng mă vei kơjăp rim tơdrong pơkăp sơđơ̆ng tang găn, pĭt ŭnh sa ăn rim hơnih jang, koeng ƀôt, rim ŭnh hnam; atŏk kơtang bơ̆ jang pơtho tơbăt păng tơroi tơbăt, pơrô̆ pơrôp, tơƀôh tơbăt jơ̆p jang, hơlen mă brĕ, hơnơ̆ng găh tơdrong khôi luơ̆t, pơtho pơhrăm trong jang tang găn hơlau, pĭt ŭnh sa, mă kăl tơdrong băt vă chă pĭt ŭnh sa ăn kon pơlei, jang kiơ̆ ‘lơ̆ng trong jang “puăn kơtă” (bơngai chĕp pơgơ̆r kơtă, khul jang kơtă, gre kơtă, tơmam drăm păng jang tơgŭm kơtă); tơ iung pơjing păng lang să rim trong jang nhen: Koeng sơđơ̆ng Tang găn ŭnh sa, pĭt ŭnh sa, hơnih pĭt ŭnh sa pơlei pơla; pơrô̆ hơvơn kon pơlei kơchăng, pơm kiơ̆ kơjăp rim trong jang tang găn hơlau, iung tơjră tơtom păng tang găn ŭnh sa, đôh mă ‘lơ̆ng hơ iă hloh”.

‘Ngoăih kơ ‘noh, pơgơ̆r dăr lăng kơtang, lăng hơlen sơđơ̆ng Tang găn ŭnh sa pĭt ŭnh sa lơ̆m teh đak, mă kăl hăm rim tơring, hơnih hơmơt đei ŭnh sa kơtang; hơnơ̆ng dăr lăng rim tơdrong tơchơ̆t găh khôi luơ̆t tơ iung pơjing, ming hơmet, tơmơ̆t dơ̆ng tơtom, trŏ lăp rim tơdrong pơkăp ‘lơ̆ng, tơdrong tơchơ̆t Tang găn ŭnh sa pĭt ŭnh sa.

Kơdră chĕp pơgơ̆r Kuô̆k hô̆i pơkă, kăl tơtom pôk hơpăh, hơlêm, lang să rim bơngai jang ‘lơ̆ng, gơ̆h hơgei; adoi atŏk kơtang bơ̆ jang dăr lăng, lăng hơlen; ƀôh tơtom, ming hơmet, xek tơlang rim tơdrong pơm glăi lơ̆m bơ̆ jang tang găn ŭnh sa, pĭt ŭnh sa păng dŏng tơgŭm.

Ƀlep lơ̆m jơ ‘năr au, Kơdră chĕp pơgơ̆r Kuô̆k hô̆i Vương Đình Huệ krao hơvơn rim tơring tơrang, rim hơnih jang păng đĭ đăng kon pơlei atŏk kơtang hloh dơ̆ng jơhngơ̆m đon hlôh vao, hơnăp jang găh bơ̆ jang tang găn ŭnh sa pĭt ŭnh sa păng dŏng tơgŭm, lăng ‘nau jing tơdrong jang kăl hlŏh, hơnơ̆ng hloh, ưh kơ gơ̆h pơhơi; rim răih kon pơlei, rim ŭnh hnam dăh pơm kiơ̆ kơjăp rim tơdrong tơchơ̆t kơ Khôi luơ̆t Tang găn ŭnh sa Pĭt ŭnh sa.