VOV4.Bahnar - Hơ met ăn Hop akŏm ‘măng 4, Kuô̆k hô̆i jăl XV truh âu kơnh, đơ̆ng ‘năr 5 truh 11/10, Khul tang măt Kuô̆k hô̆i dêh char Lâm Đồng pơ gơ̆r lơ ‘măng tơ ƀâp bơ ngai tăh hla tơ̆ dôm apŭng, plt lơ̆m dêh char.

Kon pơ lei Lâm Đồng gô prăt măng vă chih măt pơm hla ar tĕh tơ̆ anih pơm hla ar lơ̆m tơ ring

Lơ tơ drong ưh kơ lăp hơ nơ̆ng đei bơ ngai tăh hla pơ ma truh nhen: tơ drong tang găn xa pơ jĭp đơ̆ng trung ương păng tơ ring, tơ drong tang găn tĕh dong lơ̆m unh hnam, tơ drong khăm, hơ met jĭ, tơ drong bơ̆ jang dôm tơ drong jang tơm kơ tĕh đak, jên tơ mât jang đơ̆ng tĕh đak, tơ drong pơm trong tơ ƀưh rim tơ ring, vei sơ đơ̆ng tơ drong arih xa tơ pôl…

Bơ ngai tăh hla hơ nơ̆ng pơ truh nơ̆r ăn Khul tang măt Kuô̆k hô̆i Lâm Đồng lơ tơ drong tam mă lăp

Bơ ngai tăh hla Lâm Đồng tôch tơ rĕk truh dôm trong jang pơm tơ jur tơ nuh hin kơ jăp ‘lơ̆ng, dôm tơ drong pơ truh đak yoa rơ gŏh tơ̆ tơ ring tơ rang, vei lăng bri, sir iŏk tơ mam drăm, tơ gŭm ăn anih tĕch mơ dro păng kon pơ lei jang chŭn mir pơm hơ tŏk iŏk yoa đơ̆ng jang xa, tĕch mơ dro, găn lê̆ tơ drong pơm phŏng ya, tơ mam choh jang xa ưh kơ ‘lơ̆ng. Mĭnh tơ drong đei lơ bơ ngai tơ rĕk truh ‘nŏh jĭ trong pơm hla ar tĕh ‘măng mă blŭng oei tôch mơ mat, hiơ̆ yĭn, đunh năr.

Khul tang măt Kuô̆k hô̆i dêh char Lâm Đồng ‘măn lơ jơ pơ ma nuh, roi tơ băt, tơl tơ blang 1,2 tơ drong kăl, atŭm hăm ‘nŏh mơ̆ng, chih iŏk tôm nơ̆r pơ ma apinh đơ̆ng bơ ngai tăh hla.

VOV Tây Nguyên/Dơ̆ng tơ blơ̆