VOV4.Bahnar - Giĕng âu ki, tơ̆ hop akŏm mă 3 (Kuô̆k hô̆i jăl 15), đei pơ gơ̆r jơ apinh jet păng tơl nơ̆r apinh jet. Kơ dră tơm vei lăng choh jang xa păng atŏk tơ iung tơ ring tơ rang Lê Minh Hoan jĭ bơ ngai mă blŭng iung tơl tơ blang nơ̆r apinh tơ̆ hơ năp Kuô̆k hô̆i. Tơ drong “jang đei lơ, kơ jă jur” hơ nơ̆ng pơm tơ tŏ lơ̆m hnam hôp Kuô̆k hô̆i. Lơ̆m dôm trong jang đei Kơ dră tơm Lê Minh Hoan pơ ma truh vă pơ gơ̆r ming dơ̆ng tơ drong choh jang xa, krao hơ vơn kon pơ lei mât lơ̆m HTX. Atŭm hăm ‘nŏh pơ ma truh đon tơ chĕng tơ plih trong choh jang xa jing đon tơ chĕng jang mŭk drăm đơ̆ng choh jang xa.

Pơih blŭng jơ apinh jet, tơ̆ hnam hôp Kuô̆k hô̆i hơ nơ̆ng iŏk đei lơ nơ̆r apinh găh tơ drong “jang đei lơ, kơ jă jur” păng dôm ‘măng tơ gŭm ăn tơ mam đơ̆ng choh jang xa đei tam mă tôch kiơ. Hơ len năng tơ drong ‘nâu đơ̆ng jăl jang adrol ki, bơ ngai tang măt Dương Khắc Mai, khul Dak Nông tơ lĕch nơ̆r apinh hăm Kơ dră tơm vei lăng choh jang xa păng atŏk tơ iung tơ ring tơ rang: “Choh jang xa oei druh kiơ̆ tĕh rei pơ tăm xă đĕch, kiơ̆ đơ̆ng jên tơ mât jang blŭng a, oei kơ jă tơ mam pơ yoa ăn tơ drong vă choh jang ‘nŏh tŏk hơ nơ̆ng, choh jang xa mă lơ ‘nŏh đơ̆ng kơ dih ngăl, oei tơ drong tĕch tơ mam ‘nŏh gơ nơm ưh kơ lơ anih tĕch mơ dro. Trong jang, tơ drong tơ gŭm tam mă pơm hưch jơ hngâm, vă sơng iŏk jên tơ mât ăn tơ drong jang ‘nâu. Athei Kơ dră tơm roi tơ băt, trong jang kăl yơ ăn tơ drong ‘nâu năng”.

Ƀok Kơ dră Lê Minh Hoan tơl nơ̆r apinh jet

Ƀok Kơ dră tơm vei lăng choh jang xa păng atŏk tơ iung tơ ring tơ rang Lê Minh Hoan tơl: “Bơ̆n athei pơ gơ̆r dơ̆ng trong jang xa, hơ met pơ ‘lơ̆ng rim anih jang. Roi tơ băt rơ đăh, chih hơ dăh kơ sô̆ ‘long pơ tăm kiơ̆ rim pơ yan vă gơ̆h jang đei tơ mam lăp hăm tơ drong ‘mĕh vă tơ̆ anih tĕch mơ dro. Jô̆ hloi tĕch tơ̆ tĕh đak đe păng tĕch kơ tă lơ̆m tĕh đak bơ̆n. Anih tơm vei lăng choh jang xa păng atŏk tơ iung tơ ring tơ rang cĭu pŭ hơ năp jang hăm Thủ tướng tĕh đak, vă jang hơ doi hrôih hăm dôm anih vei lăng tĕch mơ dro tơ̆ tĕh đak bơ̆ jang găh tơ drong ‘nâu”.

Apinh jet găh tơ drong pơ gơ̆r jang tơ klep hăm anih tĕch mơ dro tơ mam đơ̆ng choh jang xa đei, lơ bơ ngai tang măt tơ rĕk truh tơ drong pơ gơ̆r choh jang xa, roi tơ băt găh anih tĕch mơ dro kŭm nhen tơ drong tĕch “ưh kơ hlot” tơ mam đơ̆ng choh jang xa mưh truh pơ yan phĕ, kăt yoă. Bơ ngai tang măt Hoàng Anh Công, Khul Thái Nguyên pơ ma hơ dăh: “1 lơ̆m dôm tơ drong tơm ‘nŏh yoa trong asong răt iŏk tơ mam ƀơm truh tơ drong hơ găt tôch kơ jung hăm tơ mam choh jang xa đơ̆ng Trung Quốc đei lơ tơ drong tơ plih, roi đunh roi kơ jung hlŏh dơ̆ng, pơm lăp hăm dôm tơ drong hơ găt nhen dôm tĕh đak Châu Âu păng Mi. Kiơ̆ Kơ dră tơm bơ̆n athei jang yă kiơ, athei đei trong jang thoi yơ vă tơ gŭm ăn kon pơ lei jang chŭn mir jang đei tơ mam ‘lơ̆ng, pơm hơ tŏk đei kơ jă tơ mam kiơ̆ đơ̆ng nŏh hơ tŏk tơ drong tĕch mơ dro tơ̆ tĕh đak đe păng pơ jing đei 1 anih tĕch mơ dro tơ mam tơ̆ tĕh đak đe kơ jăp ‘lơ̆ng”.

Ƀok Kơ dră tơm vei lăng choh jang xa păng atŏk tơ iung tơ ring tơ rang Lê Minh Hoan pơ ma hơ dăh: “Lơ sơ năm bơ̆n đa tơ chĕng anih tĕch mơ dro tơ̆ Trung Quốc ‘nŏh jĭ anih tĕch mơ dro ưh gan rơih tơ mam ‘lơ̆ng, mưh Trung Quốc tơ plih lê̆ dôm trong jang hơ len năng jĭ kŭm nhen tơ drong vei rơ gŏh ‘lơ̆ng tơ mam xa ‘nŏh bơ̆n jing tơ ƀâp mơ mat tat, tơ̆ âu kŭm đei hơ năp jang tam mă kơ chăng đơ̆ng dôm anih tơm, anih jang tơ̆ Trung ương, lơ̆m nŏh đei Anih tơm vei lăng choh jang xa păng atŏk tơ iung tơ ring tơ rang hai mưh ưh jăh roi tơ băt vă kon pơ lei hlôh vao păng kơ dih kâu kon pơ lei kŭm tơ plih tôch hiơ̆, tam mă gan tơ tăm truh tơ drong ‘nâu.”

Tơ lĕch nơ̆r apinh găh kơ jă phŏng, pơ gang sơ drông, tơ mam hiĕm ăn kon tơ rong, dôm tơ mam pơ yoa ăn choh jang xa blŭng a tŏk hơ nơ̆ng lơ̆m dôm sơ năm âu ki, pơm ăn kon pơ lei jang chŭn mir huŏng lơ̆m tơ drong mơ mat tat, jang iŏk kŏng pơm lơi, ƀât lăp jang xa lôh dơ̆ng. Mă loi đơ̆ng đei jĭ Covid-19 tơ pŏh, kơ jă rim kơ loăi tŏk ngăl. Dôm bơ ngai tang măt akhan, ‘nâu jĭ tơ drong tôch gĭt kăl hăm anih choh jang xa; atŭm hăm ‘nŏh athei Kơ dră tơm Lê Minh Hoan pơ ma tơ ƀôh dôm trong jang tơ̆ hơ năp kơnh vă tơ gŭm ăn kon pơ lei jang chŭn mir druh kiơ̆ păng tơ jră ‘lơ̆ng hăm tơ drong ‘nâu: “’Nâu jĭ tơ drong tôch gĭt kăl athei hơ met ming anih jang tơ mam drăm, pơ gơ̆r dơ̆ng choh jang xa. Pơ gơ̆r choh jang xa, krao hơ vơn kon pơ lei mât lơ̆m HTX. Mưh kon pơ lei mât lơ̆m HTX đei tôm hla ar chih hơ găt tôch ‘lơ̆ng vă đei anih vei lăng, băt hơ dăh kơ jă, tơ drong ‘lơ̆ng păng đei roi tơ ƀôh dar dĕh jang kiơ̆ trong tơ jur ƀiơ̆ yoa phŏng, pơ gang lơ, iŏk yoa dôm kơ loăi pơ gang sinh hŏk ‘lơ̆ng”.

Hăm nơ̆r apinh đơ̆ng bơ ngai tang măt Vương Thị Hương, Khul Hà Giang găh dôm trong jang tưk tơ iung anih tĕch mơ dro vang tơ mât jên jang xa hơ dai hăm tĕch mơ dro tơ mam đơ̆ng choh jang đei? Ƀok kơ dră Lê Minh Hoan tơl: “Dôm tơ ring athei kơ chăng jang hơ doi hăm dôm tơ ring nai vă anih tĕch mơ dro gơ̆h sơ đơ̆ng mưh đei tôm tơ mam vă tĕch. Tơ ring athei jang hơ doi mă kơ jăp vă gơ̆h ngôi hơ dai 1 păh ‘nŏh kon pơ lei, 1 păh ‘nŏh anih tĕch mơ dro. Inh tơ chĕng, tơ drong jơ nei đơ̆ng dôm anih tĕch mơ dro ‘nŏh hlôi tơ mât jên jang, đon lui, vang tơ gŭm ăn kon pơ lei jang chŭn mir, 2 păh chă tơ gŭm ăn băl. Ƀât lăp đon lui oei pran hlŏh kơ hla ar pơ kăp dơ̆ng”.

Dơ̆ng: Tơ blơ̆