VOV4.Bahnar - Anih chĕp kơ̆l pơ gơ̆r Kuô̆k hô̆i tơ chơ̆t pơ gơ̆r hop akŏm mă 3, Kuô̆k hô̆i jăl XV, pơih blŭng lơ̆m ‘năr 23/5 păng vă pơ tôch lơ̆m ‘năr 17/6/2022. Khei ‘năr âu ki, Khul tang măt Kuô̆k hô̆i dôm dêh char tơ̆ tơ ring Tây Nguyên đei lơ ‘măng pơ gơ̆r tơ ƀâp bơ ngai tăh hla vă chih iŏk nơ̆r pơma, apinh đơ̆ng bơ ngai tăh hla gơih ăn Hop akŏm mă 3 kơ Kuô̆k hô̆i.

Hơ tuch khei 4 âu ki, ƀok Phan Đình Trạc – Kơ dră jang lơ̆m Anih tơm Chinh trĭ, Bí thư Trung ương Đảng, Kơ dră chĕp kơ̆l Ban Nội chính Trung ương kŭm hăm khul tang măt Kuô̆k hô̆i dêh char Lâm Đồng đei jơ tơ ƀâp bơ ngai tăh hla tơ̆ xăh Ka Đô, apŭng Đơn Dương. Tơ̆ âu, bơ ngai tăh hla tơ lĕch nơ̆r apinh hăm Khul tang măt Kuô̆k hô̆i dêh char Lâm Đồng lơ tơ drong mơ mat tat, ưh kơ lăp kăl đei dêh char, apŭng păng Trung ương hơ met ming.

Tơ drong đei bơ ngai tăh hla tơ rĕk dêh hlŏh ‘nŏh jĭ kơ jă tơ mam roi tŏk. Lơ̆m nŏh, kơ jă tơ mam vă choh jang xa tŏk lơ, oei kơ jă tơ mam đơ̆ng jang đei ‘nŏh ưh sơ đơ̆ng, pơm ăn tơ drong jang xa tơ̆ tơ ring pơ tăm ‘nhot tơ ƀâp lơ mơ mat tat. Bơ ngai tăh hla Phan Tùng Châu, tơ̆ plei Nghĩa Hiệp 2, xăh Ka Đô, pơ ma: “Dang ei kơ jă tơ mam vă pơ yoa ăn choh jang xa tŏk tôch dêh, pơ tih gia nhen phŏng đe tĕch truh 1.350.000 hlak jên 1 ƀao, adrol kơ ‘nŏh lăp tĕch 950.000 hlak jên 1 ƀao đĕch, oei dôm kơ loăi ‘nhot jang đei tơ̆ âu tĕch hăm kơ jă lei lăi đĕch, đơ̆ng nŏh ƀôh tĕch mơ dro ‘nhot ưh sơ đơ̆ng. Apinh anih jang kơ pal pơm thoi yơ vă kơ jă tơ mam vă pơ yoa ăn choh jang xa tơ̆ âu gơ̆h tơ jur, sơ đơ̆ng ƀiơ̆ vă kon pơ lei nhôn gơ̆h đei xa yoa.”

Ƀok Phan Đình Trạc tơ ƀâp bơ ngai tăh hla tơ̆ apŭng Đơn Dương – Lâm Đồng

Tơ̆ jơ tơ ƀâp, dơ̆ng tang ăn khul tang măt dêh char Lâm Đồng, ƀok Phan Đình Trạc – Kơ dră chĕp kơ̆l Ban Nội chính Trung ương chih răk, akŏm tôm nơ̆r pơ ma đơ̆ng bơ ngai tăh hla. Khul tang măt Kuô̆k hô̆i dêh char vă pơ truh ăn dôm anih jang kơ pal athei sek tơ lang, hơ drô̆ hăm dôm tơ drong tih, khul vă chih tơ roi ăn Kuô̆k hô̆i lơ̆m hop akŏm truh: “Đĭ đăng dôm tơ drong jang lơ̆m tơ pôl tơ̆ dêh char, apŭng, xăh pơ lei pơ la tơ tă vă pơ yoa ăn kon pơ lei ngăl. Hơ pơi ‘mĕh mih ma duch nă băt, vang tơ gŭm mưh tơ ƀâp mơ mat tat hăm khul kơ dră tơ ring. Dôm nơ̆r pơ ma âu nhen gơng tơ proh, pơm tơ ƀưh băl đơ̆ng khul kơ dră pơ gơ̆r hăm kon pơ lei găh tơ drong pơ gơ̆r jang. Inh athei kơ dră chĕp kơ̆l apŭng, kơ dră chĕp kơ̆l dêh char păng jô̆ hloi kơ dră chĕp kơ̆l xăh hơ len năng trong jang đơ̆ng kơ dih thoi yơ, pơm thoi yơ mă lăp păng hiôk hian ăn kon pơ lei”.

Hơ tuch khei 4 âu ki mơ̆n, Khul tang măt Kuô̆k hô̆i dêh char Dak Lak kŭm pơ gơ̆r tơ ƀâp bơ ngai tăh hla adrol kơ hop akŏm mă 3, Kuô̆k hô̆i jăl XV. Tơ̆ dôm anih tơ ƀâp, bơ ngai tăh hla Dak Lak hơ nơ̆ng apinh Kuô̆k hô̆i, Khul kơ dră tĕh đak hơ tŏk tơ drong đei yoa đơ̆ng dôm trong jang tang găn jĭ COVID-19, hơ dai hăm tơ drong jang tơ iung ming păng atŏk tơ iung mŭk drăm, tơ pôl tơ̆ tơ ring; đei trong jang ‘lơ̆ng hlŏh vă vei kơ jăp kơ jă tơ mam, vei sơ đơ̆ng anih tĕch mơ dro păng tơ gŭm hơ met pơ ‘lơ̆ng mơ mat tat ăn tơ drong jang xa, tĕch mơ dro đơ̆ng anih tĕch mơ dro păng kon pơ lei.

Pơ ngơ̆t hăm kơ jă tĕh tŏk tôch dêh, pơm tơ lĕch tơ drong tĕch, răt tĕh tôch tơ tŏ khei ‘năr âu ki tơ̆ dôm tơ ring đei akhan đe vă tơ lĕch tơ drong jang tih tơ̆ plt Buôn Ma Thuột păng dôm apŭng jŭm dăr, bơ ngai tăh hla Bùi Minh Bảo, tơ̆ thôn 2A, xăh Ea Mnang, apŭng Cư Mgar đei nơ̆r pơ ma: “Blŭng a athei roi tơ băt mă hơ dăh tơ drong chĕng hơ met tĕh tơ̆ rim tơ ring, vă vei lăng sơ đơ̆ng, pơm ‘lơ̆ng ăn kon pơ lei vă huei chă mơ̆ng nơ̆r tơ roi ưh trŏ găh tơ drong chĕng hơ met tĕh ăn tơ drong jang đơ̆ng dôm anih jang kơ pal. Găh tơ drong ‘mĕh vă tĕh tơ tă, kon pơ lei kăl đei tĕh choh jang mă lei dang ei dôm bơ ngai tơ mât jên jang năm truh, răt tĕh păng lê̆ tĕh hŏh đĕch. Kon pơ lei kăl đei tĕh tơ pă ‘nŏh ưh đei tĕh, oei bơ ngai ưh kăl ‘nŏh chă răt akŏm tĕh, pơ huach tơ mam tôch dêh. Kơ na athei dôm anih jang kơ pal đei 1 trong jang kơ jăp vă găn lê̆ tơ drong răt akŏm tĕh, pơm hơ tŏk kơ jă tĕh nhen hrei ‘nâu vă vei sơ đơ̆ng tơ ring păng tĕh đak.”

Bơ ngai tăh hla tơ̆ Dak Lak đei lơ nơ̆r aping pơ truh ăn Hop akŏm mă 3

Tơ̆ hop akŏm, dôm bơ ngai tăh hla tôch tơ rĕk păng đei lơ nơ̆r pơ ma ƀơm truh tơ drong jang atŏk tơ iung ming dơ̆ng mŭk drăm, tơ pôl; tơ lĕch đei lơ trong jang kơ jăp ƀiơ̆ vă vei sơ đơ̆ng kơ jă, anih tĕch mơ dro păng tơ gŭm hơ met pơ ‘lơ̆ng mơ mat tat ăn tơ drong choh jang xa, tĕch mơ dro đơ̆ng anih tĕch mơ dro păng kon pơ lei đơ̆ng rŏng kơ jĭ COVID-19. Bơ ngai tăh hla Lê Văn Lập, tơ̆ thôn 3, xăh Ea Mnang, apŭng Cư Mgar đei nơ̆r pơ ma: “Tơ drong jĭ Covid 19 păng đơ̆ng rŏng kơ jĭ Covid 19 tơ drong arih xa kơ kon pơ lei tơ ƀâp lơ mơ mat tat. Găh noh dơ̆ng, mơ mat tat roi dêh mưh kơ jă tơ mam vă choh jang xa tŏk, ‘nŏh kŭm jing 1 tơ drong pơm kơ hret hăm kon pơ lei. Mă 3, kơ jă tơ mam đơ̆ng choh jang xa đei ‘nŏh ưh sơ đơ̆ng, ưh đei iŏk tôm jên jang. Apinh kơ pal đei trong jang ‘lơ̆ng vă tơ gŭm ăn kon pơ lei gơ̆h jang tŏk. Anih mong jên athei đei trong tơ gŭm ăn kon pơ lei tŏk iŏk ƀônh ƀiơ̆ vă đei jên jang xa, pơm hơ tŏk tơ drong arih” .

Găh noh dơ̆ng, bơ ngai tăh hla Dak Lak oei athei dôm anih jang kơ pal hơ nơ̆ng tơ gŭm, chă tơ drong jang, asong tŏk iŏk jên vă jang xa ăn kon pơ lei tơ̆ tơ ring; tơ rĕk truh tơ drong tơ mât jên jang, pơm hơ met trong tơ̆ tơ ring kơ drâm păng dôm xăh yoa hrei ‘nâu 1,2 jăl trong đĭ hư bơih; athei hơ len năng dơ̆ng tơ drong đei yoa đơ̆ng dôm tơ drong jang atŏk tơ iung mŭk drăm tơ pôl tơ̆ tơ ring, mă loi ‘nŏh tơ̆ tơ ring kon kông; dăr hơ len, lăng năng jên tơ mât jang đơ̆ng tĕh đak păng tơ drong chă rơih anih răt tơ mam pơ yoa ăn tơ drong jang pơ gang păng pơ tho pơ hrăm.

Dơ̆ng: Tơ blơ̆