VOV4.Bahnar - Mă đơ̆ng athei tơ jră hăm lơ tơ drong mơ mat tat, krê hơ mơt, mă lei sơ năm mơ lôh ƀô đô̆i vei lăng tơ ring sơ lam hăm ƀĕnh jơ hngâm đon jang tơ năp, gơ̆h hơ gei, nuih mơng hlôi iŏk jang hơ drol rim tơ drong... Đe sư đei pơ tih nhen thoi sơ nglŏng ang hơ dăh lơ̆m ‘mi kial hơ bŭt, ‘năr tŏ hang kơ nê̆ vă pơ jing tơ ring sơ lam roi đunh roi pơ drŏng ‘lơ̆ng rŏ. Bơ̆n vang pơm boăl juăt hăm 2 ‘nu tơ dăm linh vei lăng tơ ring sơ lam ‘nao đei pôk pơ ư jĭ Sơ năm mơ lôh rơ gei păng sơ năm mơ lôh tôch hơ mĕng lơ̆m khul linh sơ năm 2021, ‘nŏh jĭ thiếu tá Trần Minh Cường, Kơ dră jang Chinh trĭ tơ̆ Kơ đông linh vei lăng ‘măng jang sơ lam Cửa Việt, Ƀô đô̆i vei lăng tơ ring sơ lam Quảng Trị:

Lơ̆m 10 ‘nu bơ ngai mơ lôh rơ gei kơ Ƀô đô̆i vei lăng tơ ring sơ lam sơ năm 2021, Thiếu tá Trần Minh Cường, Kơ dră jang Chinh trĭ tơ̆ Kơ đông linh vei lăng ‘măng jang sơ lam Cửa Việt, Ƀô đô̆i vei lăng tơ ring sơ lam Quảng Trị jĭ 1 ‘nu bơ ngai pơm yŏng, pơ gơ̆r vei lăng kơ đông kơ na tơ drong jơ nei kŭm pha ƀiơ̆.

Hŏk đang tơ̆ Hnam hŏk vei lăng tơ ring sơ lam hăm ƀăng rơ gei hlŏh, đei hnam trưng gơ̆t pơm ƀok pơ tho mă lei hăm đon hơ pơi ‘mĕh plang jơ hngâm pran đơ̆ng sơ năm mơ lôh tơ̆ tơ ring sơ lam kơ tĕh đak, Cường vih hăm Ƀô đô̆i vei lăng tơ ring sơ lam Quảng Trị bơ̆ jang tơ̆ âu. Tơ̆ Kơ đông linh Hướng Lập, Cường tơ ƀôh hơ dăh tơ drong rơ gei đơ̆ng kơ dih kiơ̆ rim tơ drong jang đei pơ jao. Tơ drong hơ iă hlŏh hăm bơ ngai linh mơ lôh âu jĭ, jơ hngâm đon khưm sơ đơ̆ng, hơ bĕch hơ bal, kŭm hăm nơ̆r pơ ma tơ blang tôch gơ̆h. ‘Nhŏng gơ̆h hơ ri hơ xoang, đă ƀŏng lŏng, tơ plŏng kơ dâu kơ na jang hơ doi hăm khul kơ dră tơ ring, pơ gơ̆r lơ tơ drong tôch hơ iă, sơng đei lơ đoàn viên vang jang, lăp hăm nơ̆r pơ ma “Kăn ƀô̆ yơ, tơ drong jang ‘nŏh”. ‘Nhŏng adrin roi tơ ƀôh ăn anih jang đảng, đe yŏng chĕp kơ̆l kơ đông vă pơ gơ̆r đei lơ tơ drong hơ iă, chă krao hơ vơn đei yoa: “Ƀô đô̆i vei lăng tơ ring sơ lam vang pơ jing tơ ring tơ rang ‘nao”; “Chông ba ŏh năm hŏk, Kon rong ƀô đô̆i vei lăng tơ ring sơ lam”; “Bơ ngai yoă sŏk tơ̆ tơ ring sơ lam”; Jơ hŏk tơ̆ tơ ring sơ lam”; “Ƀok thây pơ gang hrŏk hơ băn ao linh”... Hăm dôm tơ drong jơ nei ‘lơ̆ng iŏk đei lơ̆m tơ drong jang, ‘nhŏng đei Anih chĕp kơ̆l pơ gơ̆r Ƀô đô̆i vei lăng tơ ring sơ lam pôk pơm Bí thư Đảng – Kơ dră jang chinh trĭ kơ đông linh vei lăng ‘Măng jang Cửa Việt ƀât ‘nao 29 sơ năm.

Thiếu tá Trần Minh Cường, Kơ dră jang chinh trĭ, Kơ đông linh vei lăng ‘măng jang sơ lam Cửa Việt, iŏk đei hơ năn Sơ năm mơ lôh rơ gei lơ̆m khul linh sơ năm 2021

Sơ năm 2021 jĭ sơ năm đei lơ tơ drong ‘lơ̆ng đơ̆ng Thiếu tá Trần Minh Cường mưh Kơ đông linh vei lăng ‘măng jang Cửa Việt iŏk đei hơ năn Kơ đông Tơ blăh jơ nei păng đei Anih tơm vei lăng khul linh tĕh đak hơ păh ăn Ƀăng khen lơ̆m tơ drong jang tang găn jĭ Covid-19; Dơ nŏ anih vei lăng kon pơ lei dêh char Quảng Trị hơ păh lơ ƀăng khen yoa bơ̆ jang đei jơ nei ‘lơ̆ng lơ̆m 5 sơ năm jang kiơ̆ Tơ drong tơ chơ̆t 05 đơ̆ng Anih tơm Chinh trĭ găh hơ tŏk tơ drong hŏk pơ hrăm păng pơm kiơ̆ jơ hngâm đon ‘lơ̆ng đơ̆ng Ƀok Hô, đơ̆ng 2016-2021 păng bơ̆ jang tơ drong jang “Hơ tŏk trong roi tơ ƀôh khôi luơ̆t ăn kăn ƀô̆, bơ ngai jang tơ̆ tơ ring sơ lam, achon kông đak dơ sĭ đơ̆ng 2017-2021”. ‘Ngoăih kơ ‘nŏh, kơ đông đei Dơ nŏ anih vei lăng kon pơ lei dêh char Quảng Trị hơ păh ăn Ƀăng khen gĭt kăl lơ̆m tơ drong jang dŏng tơ gŭm bơ ngai jang tơ̆ Ƀato Vietship 01...

Ưh hli tơ drong krê hơ mơt, kơ chăng jang tơ gŭm ăn kon pơ lei mưh tơ ƀâp tơ drong hơ nat hơ not, thiếu tá Cường pơ gơ̆r, vang jang krao hơ vơn 1.845 tŏ ƀato, thŏng nan vih kơ ‘nơp ‘mi kial sơ đơ̆ng ‘lơ̆ng; dŏng đei 8 tŏ ƀato, thŏng nan hăm 61 ‘nu bơ ngai. Atŭm hăm ‘nŏh, roi tơ ƀôh pơ jing 13 Grŭp vei lăng ƀato, thŏng nan sơ đơ̆ng ‘lơ̆ng, 18 Grŭp vei sơ đơ̆ng tơ pôl, kiơ̆ đơ̆ng noh roi tơ băt kơ hrĕng tơ drong kơ tơ̆ng ang kăp gĭt ƀơm truh tơ drong pơm tơm tơ̆ đak dơ sĭ, achon kông đak dơ sĭ, tơ drong sơ đơ̆ng lơ̆m tơ pôl tơ̆ tơ ring, vang jang hơ doi hăm kơ đông tơ tom sek tơ lang kiơ̆ tơ drong hơ găt.

Jĭ Covid-19 tơ pŏh, Kơ đông linh vei lăng ‘măng jang sơ lam Cửa Việt vei kơ jăp “Tơ drong kơ tơ̆ng ang hrĕnh, tang găn jĭ Covid-19” tơ̆ a loa ra por lơ̆m tơ ring. Thiếu tá Trần Minh Cường chih tơ lĕch tơ dỏng kơ tơ̆ng ang kŭm nhen in tơ lĕch hla ar, chư chih vă ƀơk, roi tơ băt ăn kon pơ lei. Hăm tơ drong chĕp kơ̆l pơ gơ̆r đơ̆ng ‘nhŏng, đơ̆ng rŏng kơ tơ lĕch tơ drong jang “Đĭ đăng kon pơ lei vang tang găn jĭ Covid-19 păng bơ ngai mât lĕch glăi luơ̆t” tơ̆ tơ ring sơ lam, kăn ƀô̆ lơ̆m kơ đông pơ gơ̆r ăn 3.040 unh hnam tơ̆ 3 xăh, thĭ trơ̆n/18 pơ lei, kueng kơ phô̆ tơ̆ tơ ring vei lăng kĭ pơ kăp vang tang găn jĭ Covid-19. Hăm tơ drong pơ vei, oei xa ‘lơ̆ng, ‘nhŏng krao hơ vơn, pơ lung lơ khul grŭp, lơ bơ ngai vang tơ gŭm tơ mam, pơ gang, tơ mam yoa kăl ăn khul jang tang găn jĭ, ăn đe ŏh hŏk tro păng unh hnam đei kŏng arih xa mơ mat tat.

 Gơ̆h pơ ma, um rup bơ ngai đoàn viên druh dăm Ƀô đô̆i vei lăng tơ ring sơ lam chăl ‘nao rơ gei hlôi đei păr ang găh tơ drong arih xa ‘lơ̆ng, jơ hngâm đon kơ chăng, chu hŭt kơ dih kâu yoa tơ pôl păng đon adrin yak hlŏh mơ mat tat, pơ long nol, jang đang ‘lơ̆ng rim tơ drong jang đei pơ jao.

Thu Hòa: Chih

Dơ̆ng: Tơ blơ̆