Lơ̆m hnam “Bơbŭng hnam Công đoàn” ‘nao đei man đang, ‘nhŏng Trần Đình Thu, tơ̆ Kueng 1, Phường Khánh Xuân, plt Buôn Ma Thuột (Đắk Lắk) ưh kĕ ôn tơdrong chơt hơiă đơ̆ng kơdih. Tơdrong arih xa kơ unh hnam ‘nhŏng Thu tôch mơmat tat, kơ dih kâu bơ̆ jang pơm bơngai vei lăng tơ̆ Hnam trưng THCS Trần Hưng Đạo, plt Buôn Ma Thuột, jên khei tŏ sĕt, hơkăn ‘nŏh ưh đei tơdrong jang dơ̆ng, 2 ‘nu kon hơ ‘lơ̆p oei năm hŏk ngăl. 16 sơnăm âu ki, unh hnam ‘nhŏng athei oei oăi tơ̆ hnam tâp thê hnam trưng. Đơ̆ng rŏng kơ mong jên, chă tŏk iŏk jên răt đei teh, ‘nhŏng đei Liên đoàn Lao động plt Buôn Ma Thuột tơgŭm 50 triu hlak jên đơ̆ng Anih mong jên “Bơbŭng hnam Công đoàn”. Khul thây kô vei lăng păng thây kô pơtho lơ̆m hnam trưng kŭm asong tŏk iŏk jên ưh kơ jô̆ jên kon vă ‘nhŏng đei dơ̆ng tơdrong hiôk hian man đei hnam kơjăp ‘lơ̆ng ƀiơ̆.

‘Nhŏng Trần Đình Thu pơma: “Inh tang măt ăn unh hnam bơnê tơdrong vang tơgŭm đơ̆ng Liên đoàn Lao động, khul thây kô tơ̆ hnam trưng vang tơgŭm, asong inh tŏk iŏk jên vă inh gơ̆h pơm đei hnam ‘nâu, unh hnam ưh đei tơdrong kiơ hơiă hlŏh dơ̆ng. Kiơ̆ đơ̆ng âu inh oei ‘mĕh Liên đoàn tơrek hlŏh dơ̆ng truh dôm bơngai nhen thoi inh.”

Pơyan Puih mak Giáp Thìn sơnăm 2024 jĭ sơnăm mă blŭng mĕ kon mŏ Trần Mai Hương Giang, Phường Ea Tam, plt Buôn Ma Thuột đei sơng xa têt lơ̆m hnam ‘nao đơ̆ng đe man tơgŭm. Mŏ Giang tơroi, hăm jên khei đơ̆ng kô pơtho jăl mônh, lăp măh ăn tơdrong arih păng rong 2 ‘nu kon hŏk đĕch. Lơ sơnăm âu ki, 3 ‘nu mĕ kon arih gơnơm lơ̆m hnam so iĕ ioch đơ̆ng mĕ ƀă mŏ. Ƀât blŭng sơnăm 2023, mŏ đei mĕ ƀă chĕng song teh păng Liên đoàn Lao động plt Buôn Ma Thuột tơgŭm 1 păh jên vă man hnam. Gơnơm thoi noh, mĕ kon mŏ Giang gơ̆h đei hnam oei kơjăp ‘lơ̆ng păng sơđơ̆ng jơhngâm bơ̆ jang: “Inh bơnê kơ đĭ đăng đe ‘nhŏng ŏh công đoàn viên vang tơgop 1 păh kon jên tơgŭm ăn mĕ kon nhôn gơ̆h đei hnam oei sơđơ̆ng ‘lơ̆ng âu.”

‘Nao iŏk đei 50 triu jên tơgŭm man “Hnam Công đoàn” yoa Liên đoàn Lao động dêh char Đắk Lắk pơjao, mŏ H’Ngăm Niê, kô pơtho mâu yăo Hoa Thủy Tiên, xăh Dliê Ya, apŭng Krông Năng ưh kĕ ôn tơdrong chơt hơiă. Mŏ H’Ngăm tơroi, lơ sơnăm âu ki, unh hnam mŏ arih lơ̆m hnam tơ̆r hrăt hrot, so sŏch bơih, ưh đei sơđơ̆ng kiơ. “Hnam Công đoàn” truh hăm unh hnam mŏ jĭ tơmam hơpăh tôch kăp gĭt, tơgŭm ăn unh hnam mŏ đei dơ̆ng jơhngâm hưch hanh vă pơm tơplih tơdrong arih xa: “Bơnê kơ khul jang kơpal tơgŭm ăn inh iŏk đei jên năr ‘nâu. Inh tôch čhôk ‘nă, mă tơpă đơ̆ng sơ̆ truh dang ei inh tam iŏk đei jên lơ thoi âu vă pơm hnam. Inh tơchĕng vă pơm hnam dang 90 triu jur tơ̆ hơla. ‘Ngoăih kơ jên tơgŭm, lơ̆m hnam inh mong măi đei dang 15 triu, kŭm hăm chă tŏk iŏk đơ̆ng mŏ oh dang 20 triu dơ̆ng.”

Tơdrong jang “Bơbŭng hnam Công đoàn” jĭ tơdrong jang tôch gĭt kăl hăm tơdrong arih xa kơ bơngai jang, dôm sơnăm âu ki, Liên đoàn Lao động dêh char adrin pơtho tơƀôh ăn rim khul Công đoàn pơgơ̆r ră roi tơbăt, krao hơvơn pơjing Anih mong jên “Bơbŭng hnam Công đoàn”. Lăp jô̆ hơdrô̆ đơ̆ng sơnăm 2023 truh dang ei, Liên đoàn Lao động dêh char tơgŭm man ‘nao păng pơm hơmet 129 tŏ “Hnam Công đoàn” hăm kơsô̆ jên hlŏh 5 ti.

Yă Nguyễn Thị Lý, Phŏ Kơdră vei lăng Liên đoàn Lao động dêh char Đắk Lắk ăn tơbăt, đơ̆ng blŭng sơnăm truh dang ei, lơ̆m dêh char đĭ man đei 27 tŏ hnam ‘nao. Dôm khei oei đei dơ̆ng lơ̆m sơnăm, rim khul Công đoàn dêh char Đắk Lắk vă krao hơvơn, tơgŭm dơ̆ng 73 tŏ “Hnam công đoàn” vă pơjao ăn đe công đoàn viên, bơngai jang pơmat tat găh hnam oei:

“Tơ̆ hơnăp kơnh, Liên đoàn Lao động dêh char vă hơnơ̆ng pơtho tơƀôh tơlĕch jang ‘lơ̆ng dôm tơdrong jang tơm vei lăng năng tông truh tơdrong đei yoa trŏ luơ̆t, tôch tơgăl ăn bơngai jang păng adrin mong akŏm jên vă bơ̆ jang tơgŭm ‘lơ̆ng ƀiơ̆ ăn bơngai jang. Mă 2 ‘nŏh hơnơ̆ng tơplih ‘nao trong vei lăng năng tông mă lăp hăm tơdrong ‘mĕh vă đơ̆ng đoàn viên tơ̆ tơring, lơ̆m nŏh hơnơ̆ng tơlĕch trong pơjing anih mong jên tơgŭm ăn đoàn viên công nhân, bơngai jang tơ̆ Đăk Lắk vă bơ̆ jang ‘lơ̆ng tơdrong jang man hnam công đoàn.”

Lơ hnam đei man hăm kơsô̆ jên đơ̆ng Anih mong jên “Bơbŭng hnam Công đoàn” tơ̆ Đắk Lắk hlôi tơgŭm ăn lơ đoàn viên, bơngai jang đei tơdrong arih xa pơmat tat dêh hlŏh gơ̆h đei hnam oei sơđơ̆ng ‘lơ̆ng, tơiung jơhngâm đon hưch hanh vă jang tŏk lơ̆m tơdrong arih xa.