Tơ̆ dôm anih truh ngôi, ƀok Hầu A Lềnh ăn tơbăt, Đảng, tĕh đak păng Khul kơdră tĕh đak dar dĕh hơmet pơ ‘lơ̆ng dôm tơdrong răm yoa đơ̆ng jĭ Covid-19. Lơ̆m nŏh đei tơdrong tơgop tih đơ̆ng kon pơlei dôm hơdrĕch kon kông, đei hloi kon pơlei Khmer tơ̆ plt HCM. Mă đơ̆ng tơdrong jang mŭk drăm oei đei lơ pơmat tat, mă lei Ƀok Kơdră pơgơ̆r Anih vei lăng hơdrĕch kon kông lui hăm tơdrong adrin, tơguăt đĭ đăng hơdrĕch hơdrung, kon pơlei hrôih hơmet pơ ‘lơ̆ng dôm tơdrong pơmat tat vă gơ̆h đei tơdrong arih phĭ tơnŏ ƀiơ̆, hiôk chơt ƀiơ̆ tơ̆ hơnăp kơnh.

Ƀok Kơdră pơgơ̆r Anih vei lăng hơdrĕch kon kông athei hnam chuơ kŭm hăm khul kơdră pơgơ̆r tơring păng plt HCM vei kơjăp tơdrong tơguăt đĭ đăng hơdrĕch hơdrung, hơnơ̆ng bơ̆ jang vei lăng, năng tông, tơgŭm ăn kon pơlei, bơngai lui phât, vei lăng ‘lơ̆ng tơdrong arih xa tơpôl. Ƀlep ƀât ‘măng mă âu, Anih vei lăng hơdrĕch kon kông păng Anih vei lăng kon pơlei plt HCM hơpăh tơmam, hơ iă kơ sơnăm ‘nao tơ̆ dôm hnam chuơ păng 37 ‘nu bơngai đei kon pơlei lui yom lơ̆m tơpôl bơngai Khmer.