Tơ̆ jơ tơƀơ̆p pơma dơnuh, kon pơlei tah hla xăh Đạ Nhim, apŭng Lạc Dương (Lâm Đồng) apĭnh truh Khŭl tang măt Kuôk hhô̆i dêh char Lâm Đồng mĭnh ƀar tơdrong apŭng, dêh char păng Trung ương kăl kơ jăh bơngơ̆t truh, set hơlen pơ ‘lơ̆ng. Lơ̆m noh, đei tơdrong Trong gre 27C kơ nê̆, hơnơ̆ng ưh kơ gơh kơdâu vih vơ̆t yua đơ̆ng teh hơlih, lơ trong kuĕch krê hơmơt păng ưh kơ sơđơ̆ng mưh năm vih vơ̆t tơ̆ trong; tơtĕnh dăr hơlen, asong hla ar gơh yua teh ăn kon pơlei; trong tơgŭm đơ̆ng kang ƀô̆ ưh kơ joăt jang tơ̆ xăh tŏ sĕt dêh....

Tang măt Khŭl bơngai tang măt Kuôk hô̆i dêh char Lâm Đồng, ƀok Phan Đình Trạc, Kơdră Anih jang Nội chính Trung ương chih iŏk dôm nơ̆r tơgop apĭnh đơ̆ng bơngai tăh hla păng gô akŏm, đei roi tơbăt pơtruh ăn Kuôk hô̆i lơ̆m dôm ‘măng hop akŏm truh. Lơ̆m noh, pơma hơdăh, athei tơmơ̆t jên jang pơih să, pơm hơmet ming Trong gre 27C ‘noh jĭ nơ̆r apĭnh tôch kơ kăl đơ̆ng bơngai tăh hla păng lăp hăm trong vă jang hơtŏk tơiung tơring Tây nguyên đơ̆ng Anih tơm Chĭnh trĭ.

‘Măng âu, tang măt Anih jang Nội chính Trung ương, ƀok Phan Đình Trạc hlôi pơjao asong 20 tơpu tơmam ăn kơ dôm ŭnh hnam mơmat tat, ŭnh hnam teh đak tơgŭm lơ̆m xăh Đạ Nhim; năm ngôi tơ̆ Hơnih dăr hơlen păng vei lăng tơdrong hơgơh hơgei kơ apŭng Lạc Dương./.