Tơƀơ̆p ‘nhŏng  Pờ Lò Hừ tơ̆ hơnih teh hoh kơpal kông. Sư hrăt hrot hăm vei hơchăng kơ pô rơ mo. Đơ̆ng nơ̆r krao jơva đơ̆ng ‘nhŏng Pờ Lò Hừ, kơ pô rơ mo grŭk grăk chông băl vih tơ̆ hơnih teh hoh kơ pal. Mĭnh kơ đôp ƀoh săy ăn ‘noh rơmo vih lơ hloh dơ̆ng.

Rơneh păng tih vơ̆ lơ̆m groi teh mơmat tat tơ̆ plei Chà Kế, hloh 10 sơnăm tơdrong arih năm choh pơtăm, oei sa hlôi hơ nhăk ŭnh hnam Hừ truh hăm groi teh Pha Bu, hơtăih kơ pơlei pơla hloh 60km. Sơnăm ‘lơ̆p kơ Hừ kŭm nhen dôm kon pơlei La Hủ nai tơring ‘nâu tă athei yak hloh dôm khei ‘năr druh kiơ̆ mĕ ƀă, ƀok yă năr ‘nâu ƀơ̆t dâu, dơning ƀơ̆t doh kiơ̆ rim tơƀôt bri vă chă jang sa. Khei ‘năr oei sa ưh kơ sơđơ̆ng ‘noh jĭ tơdrong tơm pơm ăn hơnhăk truh kơ sô̆ pơ ngot dơnuh hin đơ̆ng kon pơlei La Hủ lơ hloh lơ̆m 54 hơdrĕch hơdrŭng lơ̆m teh đak: ‘Nhŏng Pờ Lò Hừ tơroi: Đe yă ƀok ‘noh lôch hrôih, đang kơ ‘noh ƀă ĭnh ‘noh kon hơdruch ƀơ̆t doh sơ̆ oei ‘lơ̆p, ưh kơ oei kơ tă mĭnh ƀôt mă oei răh rai kơ ma mơmat tat tôch kơ dêh. Năm choh jang, oei sa tơdrong arih sa tôch kơ gleh hrat, jang mŭk drăm kŭm mơmat, ƀlă kơ ‘noh tơmam sa kŭm ưh kơ măh tôch kơ lơ. Oei dang ei hlôi tơplih lơ bơih, oei kơ tă mĭnh ƀôt păng sơđơ̆ng. Hơdrin jang sa vă hơtŏk tơiung mŭk drăm, đang kơ ‘noh dang ei teh đak kŭm tơgŭm ăn kon pơlei trong nơnăm vih vơ̆t kŭm sơđơ̆ng bơih, jang sa kiơ kŭm ƀônh ƀiơ̆.```

Tơ̆ hơnăp dôm tơdrong mơmat tat găh teh, tŏ ‘mi kial, tơdrong arih sa oei mơmat tat đơ̆ng ŭnh hnam, kŭm nhen hơdrĕch hơdrŭng sư, jĭ đảng viên, bí thư chi bộ pơm hloi bơngai pơgơ̆r pơlei, Pờ Lò Hừ hlôi hơdrin tơchă hŏk pơhrăm vă tơ iung mŭk drăm ŭnh hnam. Đơ̆ng rŏng lơ sơnăm pơnam, hơdrin, truh dang ei tơ̆ sơnăm 43 Hừ hlôi đei lơ̆m tơ pang ti mŭk drăm kơ ti hlak jên, hăm kơ pô rơmo hloh 100 tŏ, dôm jĭt héc ta quế, lơ ve, thảo quả, sâm...: Mơ̆t Đảng roi ‘năr roi hlôh băt ƀiơ̆, ƀlă kơ ‘noh hŏk hôp rim khei ‘noh tơroi tơbăt hai, pơma dơnuh hai, hŏk pơhrăm tơgŭm kon pơlei roi ‘năr roi chơt. Jĭ bí thư chi bộ, mă hơdrol ‘noh athei băt pơm jŭk yŭk trong hơlâu ăn kon pơlei băt jang mŭk drăm nhen vei rong kon tơrong, pơtăm dôm kơ loăi ‘long sa plei, ‘long kơ jă kăp gĭt. Ba ưh kơ jang hơdrol ăn kon pơlei ‘noh kon pơlei sa roi mơmat tat. Ưh kơ băt jang sa, kon pơlei ưh kơ tơchĕng đei, kơ̆l ‘ngok ưh kơ phuăng.

Ưh khan lăp bơngơ̆t hơdrô̆ ăn kơdih kâu păng ‘nhŏng oh kơ tum kơ tŏng, hăm hơnăp jang đơ̆ng bơngai đảng viên, lơ sơnăm kơ âu Pờ Lò Hừ oei tơgŭm kơ hrĕng ŭnh hnam kon pơlei lơ̆m pơlei, lơ̆m xăh. Ưh khan lăp pơm tơdrong jang hơnơ̆ng ăn kơ 5 ‘nu bơngai jang păng jang kiơ̆ khei ‘năr ăn hloh 30 ‘nu bơngai jang, rim sơnăm dôm ŭnh hnam pơngot ƀơ̆t ƀa tŏk bŏk hoăt Hừ asong ăn ƀa, asong ăn phe; ŭnh hnam ưh kơ đei jên păng ưh kơ băt jang sa sư asong tŏk iŏk jên ưh kơ jô̆ jên cheh, đang kơ ‘noh pơtho trong jang mŭk drăm. Bu ưh kơ măh kiơ, kăl kơ kiơ sư tơgŭm ‘noh, dang ei  Hừ hlôi đei kon pơlei sư lui yom: Mŏ Ly Mò Nu, kon pơlei oei tơ̆ plei Pha Bu, xăh Pa Ủ chhôk hơiă tơroi:  Gơnang đơ̆ng bí thư chi bộ Hừ tơgŭm jang sa, đơ̆ng rŏng lơ sơnăm pơngot mơmat tat, dang ei ŭnh hnam nhôn hlôi klăih đơ̆ng dơnuh hin. Tơdrong arih sa ưh pă mơmat tat nhen hơdrol kơna đe kon ĭnh kŭm đei kiơ̆ hŏk chư ‘lơ̆ng ƀiơ̆. Ưh khan lăp ŭnh hnam nhôn đĕch ôh, mă lơ ŭnh hnam lơ̆m pơlei lơ̆m tơring kŭm đei tơgŭm, kơna tơdrong arih sa tôm măh ƀiơ̆ kơ hơdrol. Kon pơlei lơ̆m pơlei tôch chhôk hơiă!

Ling lang iung jang hơdrol lơ̆m hơtŏk tơiung mŭk drăm pơ gar, groi, bri tơ̆ tơring, lơ sơnăm âu kĭ hui đei bu băt akhan lơ̆m kon pơlei  La Hủ oei tơ̆ xăh sơlam Pa Ủ ‘noh đei 1 ‘nu bơngai tôch pơdrŏng jang chŭn mir. Đơ̆ng tơdrong jang mŭk drăm pơgar să đơ̆ng bí thư chi bộ, bơngai pơgơ̆r pơlei plei Pha Bu Pờ Lò Hừ, truh dang ei tơ̆ xăh Pa Ủ hlôi đei ƀôh lơ tơdrong jang nai tơ̆ plei Thăm Pa, Nhú Ma, Ứ Ma, Xà Hồ, Mu Chi... Tơroi găh hơnăp jang đơ̆ng đảng viên Pờ Lò Hừ tơ̆ tơring, ƀok Phạm Hồng Bình, Phŏ Bí thư Anih jang Đảng xăh Pa Ủ, apŭng Mường Tè tơbăt: Hăm dôm tơring mơmat tat, tơdrong arih sa kon pơlei tam mă hlôh vao lơ kŭm nhen hlôh vao lơ̆m hơtŏk tơiung, dôm bơngai thoi âu tôch hơ iă. Đe sư ‘noh jĭ bơngai kơ tă oei tơ̆ tơring, jĭ bơngai lơ̆m kon pơlei kon kông hlôi đei lui yom hăm kon pơlei. Kiơ̆ đơ̆ng tơdrong jang yan âu đơ̆ng đe sư ‘noh hlôi pơm lang să păng jing bơngai vă  pơlung păng tơgŭm, krao hơvơn kon pơlei tơring hŏk păng pơm kiơ̆, kŭm tơgŭm ăn mŭk drăm - tơpôl kơ xăh ƀrư̆ ƀrư̆ đei hơtŏk ‘lơ̆ng.

Pa Ủ hlôi đei băt truh ‘noh jĭ tơring dơnuh hin kơ dêh char Lai Châu, ƀơ̆t đei khei ‘năr kơ sô̆ ŭnh hnam dơnuh hin đei truh 95%. Mă lei, gơnang đơ̆ng dôm đảng viên năm hơdrol pơih trong klăih đơ̆ng dơnuh hin nhen  Pờ Lò Hừ, dang ei kơ sô̆ ŭnh hnam pơngot dơnuh hin kơ tơring hlôi jur oei pă hloh 77%. Dôm tơdrong jang yua kơ kon pơlei ‘noh hlôi chih iŏk, ƀơ̆t ŭnh hnam sư ‘noh jĭ 1 lơ̆m 8 ŭnh hnam đei jang hơgei lơ̆m Hŏk pơhrăm păng pơm kiơ̆ jơhngơ̆m đon ‘lơ̆ng đơ̆ng Ƀok Hồ sơnăm 2023, đei Anih tơroi tơbăt kơ Anih jang Đảng dêh char Lai Châu athei Kơdră Anih vei lăng kon pơlei dêh char hơpăh Bằng khen./.