Truh akŏm păng pơma tơ̆ Tơdrong akŏm, bơngai juăt jang Ƀan Ƀĭ thư Võ Văn Thưởng ră hơdăh, dôm xơnăm kơ âu, Đảng, Khul Kơpal teh đak bơ̆n hơnơ̆ng tơrĕk, đei lơ trong pơm jang, hơvơn tơdrong vang jang kăp gĭt đơ̆ng dôm jăl jang, dôm anih jang păng tơpôl tơgŭm ăn kon pơlei, mă hăt noh kon pơlei tơring ataih yaih, tơring xơlam teh, achon đak dơxĭ.

Lơ̆m tơdrong jang noh đei tơdrong tơgop tih tên đơ̆ng khul Ƀô̆ đô̆i vei xơlam teh jâ̆p teh đak hlôi iŏk rong 'me păng tơgŭm jê̆ 3.000 hŏk tro tơ̆ tơring xơlam teh, achon đak dơxĭ. Tơdrong akŏm "Puih mak Anih linh xơlam teh tơnŏ đon kon pơlei” Têt Quý Mão 2023 hlôi pơm hơdăh trong pơkăp jang đơ̆ng Đảng, Khul kơpal teh đak găh xut lê̆ pơngot, tơjur hin dơnuh; tơnăp pơm kiơ̆ tơlĕch jang "Jâ̆p teh đak atŭm jơhngơ̆m kơyuơ bơngai hin dơnuh – Ưh đei prơih lê̆ bơngai yơ tơ̆ rŏng" kơyuơ Khul Kơpal teh đak tơlĕch.