Pơma tơ̆ jơ pơm lêh, Kơdră Kuô̆k hô̆i Vương Đình Huệ ăn tơbăt, tơ̆ tơring ATK Việt Bắc, sơnăm 1948, Ƀok Hô tơlĕch nơ̆r krao hơvơn pơ jei băl ‘mêm tĕh đak păng đei nơ̆r pơlung: “Pơjei băl jĭ ‘mêm kơ tĕh đak, ‘mêm tĕh đak athei pơjei băl, dôm bơngai pơjei băl ‘nŏh jĭ dôm bơngai ‘mêm kơ tĕh đak”. Prăt 75 sơnăm âu ki, tơdrong ‘nâu jing jơhngâm pran tih đơ̆ng tơdrong pơjei băl ‘mêm tĕh đak đei jang tŏk hơnơ̆ng, vang tơgop pơjing đei lơ tơdrong jơnei tih tên, gĭt kăl lơ̆m jơhnơr arih bơ̆ jang tơiung pơjing păng vei lăng tĕh đak Việt Nam, pơjing đei tĕh đak ‘lơ̆ng hơ iă nhen hrei ‘nâu.

Tuyên Quang jĭ dêh char năm hơdrol lơ̆m tĕh đak găh tơdrong vei lăng păng atŏk tơiung mŭk drăm đơ̆ng bri ‘long. Tĕh bri ‘long đei truh 76% hơgăt tĕh bri brăh. Dêh char jang ‘lơ̆ng tơdrong chĕng hơmet, pơjing 3 kơloăi bri; tơlĕch jang ‘lơ̆ng tơdrong vei lăng păng atŏk tơiung bri; pơtăm ‘nao hlŏh 11 rơbâu ha ‘long bri rim sơnăm; pơjing đei tơring pơtăm ‘long pơm tơmam văjê̆ 200 rơbâu ha, yơ̆p bri đei hlŏh 65%; vei kơjăp ‘lơ̆ng cham char bri brăh, vang tơgop gĭt kăl ăn tơdrong vei lăng gen păng pơm tơđăh ‘long, kon yŏng; kơchăng tang găn ‘lơ̆ng ‘mi kial hơbŭt, đak lip, tŏ phang pơđang, tĕh hơlih… ăn tơring dơng dơi tŏk bŏk đak krong găh Tu. Kơdră Kuô̆k hô̆i Vương Đình Huệ pơma hơdăh, sơnăm 2023, Tuyên Quang athei hơtŏk tơdrong juăt đơ̆ng pơlei jang kăch mang păng dôm tơdrong jơnei hlôi iŏk đei, hơtŏk hlŏh dơ̆ng tơdrong pơjei băl ‘mêm tĕh đak, pơjing jơhngâm pran pơlung kăn ƀô̆, đảng viên păng kon pơlei dôm hơdrĕch hơdrung khŏm bơ̆ jang đei dôm tơdrong hlôi tơlĕch.

“Ƀlep ƀât ‘măng mă âu, inh athei dôm anih jang kơ Trung ương, blŭng a păng mă hơdăh ‘nŏh jĭ Anih tơm vei lăng choh jang xa păng atŏk tơiung tơring tơrang tơgŭm ăn dêh char Tuyên Quang hơtŏk pran hlŏh dơ̆ng tơdrong tơmât yoa kơmăy kơmŏk ‘nao lơ̆m tơdrong vei lăng păng atŏk tơiung bri, atŏk tơiung mŭk drăm đơ̆ng bri ‘long, tơmât tơdrong pơtăm bri, vei lăng bri hăm jang atŏk tơiung, pơvih pơvăn vei lăng cham char bri brăh păng chă tơmang lăng tơ̆ bri brăh, vei kơjăp tơdrong jŏh ayŏ kơ dŏ xoang păng pơjing tơring tơrang ‘nao”.

Kơdră Kuô̆k hô̆i athei rim anih jang kơpal, anih jang xa hơnơ̆ng tơplih ‘nao păng tưk hơtŏk tơdrong ‘lơ̆ng, đei yoa hlŏh dơ̆ng tơdrong pơjei băl ‘mêm tĕh đak tơklep hăm hŏk pơhrăm păng jang kiơ̆ jơhngâm đon ‘lơ̆ng đơ̆ng Ƀok Hô; hơnơ̆ng tưk tơiung tơdrong tơguăt 1 ƀơ̆r đon, jơhngâm pran đơ̆ng rim anih jang chinh trĭ, mât 1 jơhngâm đon đơ̆ng đĭ đăng kon pơlei bơ̆ jang ‘lơ̆ng dôm tơdrong tơchơ̆t đơ̆ng Ðảng, tơdrong tơchơ̆t đơ̆ng Kuô̆k hô̆i găh atŏk tơiung mŭk drăm, tơpôl păng thu mong, tơlĕch jên jang kơ tĕh đak sơnăm 2023 vă iŏk yoa đĭ rim tơdrong pran ‘lơ̆ng, hơtŏk tơdrong jang tŏk tôm tơdrong găh mŭk drăm, tơpôl, vei lăng ‘lơ̆ng tơdrong arih xa tơpôl hăm tơdrong tơm ‘nŏh pơm hơtŏk tơdrong arih xa rim tơdrong ăn kon pơlei.

Rim anih jang, rim tơring, rim khul grŭp hơnơ̆ng chih hơdăh păng chĕp kơ̆l pơgơ̆r mă kơjăp ‘lơ̆ng tơdrong pơjei hăm đon pơhnŏng, pơjei băl rơđăh rơđong, tơdrong pơjei lăp ‘lơ̆ng, gơ̆h jang kiơ̆ vă sơng đei đĭ đăng kon pơlei, rim jơhnơr găh rim tơdrong jang, tơring tơrang, pơm ăn tơdrong pơjei băl tơpă jing tơdrong ‘lơ̆ng lơ̆m tơdrong arih xa rim năr, jing tơdrong ‘mĕh vă hăm dôm tơdrong đei yoa tơgăl; pơlung đei jơhngâm đon pơm kiơ̆ trong ‘mơ ‘met, vang tang găn xa pơjĭp, pơm glăi, pơhuach kư̆ kă, hơmet ming trong pơm hla ar; mă loi jĭ jang ‘lơ̆ng tơdrong chă ƀôh, pơtho pơhrăm, pơih xă dôm trong jang rơgei đei yoa; tơplih ‘nao tơdrong pơ ư, pôk hơpăh, pơjing jơhngâm pran pơlung dôm anih jang, khul grŭp, rim bơngai jang đang ‘lơ̆ng tơdrong jang kiơ̆ hơnăp jang păng tơdrong jang đei pơjao, chơt hơiă tơbăt 75 sơnăm năr Ƀok Hô krao hơvơn pơjei băl ‘mêm tĕh đak (11.6.1948 -11.6.2023).

Kơdră Kuô̆k hô̆i pơma hơdăh, Pơyan Puih mak Quý Mão 2023 oei hơnơ̆ng jing “Têt pơtăm ‘long” đei tơlĕch blŭng a đơ̆ng pơyan Puih mak Canh Tý tơ̆l 63 sơnăm adrol sơ̆, kiơ̆ nơ̆r krao hơvơn đơ̆ng Ƀok Hô; ‘nŏh jĭ nơ̆r pơkăp khŏm bơ̆ jang kiơ̆ nơ̆r athei đơ̆ng Ban Bí thư lơ̆m tơdrong tơchơ̆t kơsô̆ 13 đơ̆ng Trung ương găh hơtŏk tơdrong chĕp kơ̆l pơgơ̆r đơ̆ng Đảng hăm tơdrong vei lăng păng atŏk tơiung bri vă pơjing mĭnh “tơdrong jang mŭk drăm rơgŏh ‘lơ̆ng”, jang tŏk pran kơjăp:

“Đĭ đăng khŏm bơ̆ jang truh đei tơdrong tơm hlŏh ‘nŏh: Dôm bơngai pơtăm ‘long bri athei gơ̆h arih xa đơ̆ng bri păng tŏk pơdrŏng đơ̆ng bri, khŏm bơ̆ jang đei tơdrong jang tơm pơjing Tuyên Quang jing tơring tơm găh bri ‘long đei tơmât yoa kơmăy kơmŏk vei lăng ‘nao păng jing tơring pơm tơlĕch tơ̆r ‘long tơm tơ̆ tơring dơng dơi tŏkbŏk đak krong păng tơring groi kông găh Tu kiơ̆ nơ̆r athei lơ̆m tơdrong Tơchơ̆t 11 đơ̆ng Anih tơm Chinh trĭ găh trong jang atŏk tơiung mŭk drăm, tơpôl, vei sơđơ̆ng tĕh đak tơ̆ tơring găh Tu truh sơnăm 2030, trong jang truh 2045, ‘nâu jĭ đon pơhnŏng đei tôm tơdrong”.

Hăm jơhngâm pran ‘nao, đon pơhnŏng ‘nao, trong jang ‘nao, Kơdră Kuô̆k hô̆i lui “Têt pơtăm ‘long rim jơhnơr ƀlŏk hơdơ̆r kơ Ƀok Hô” pơyan Puih mak Quý Mão sơnăm 2023 kơ dêh char Tuyên Quang ưh jor gô iŏk đei jơnei ‘lơ̆ng hlŏh dơ̆ng, tơgop ăn tơdrong pơjing tĕh đak Việt rơgŏh ‘lơ̆ng, jang tŏk pran kơjăp, nhen thoi tơdrong ‘mĕh vă tôch kăp gĭt đơ̆ng Ƀok Hô: "Pơyan Puih mak jĭ Têt pơtăm ‘long/ Pơm ăn tĕh đak roi đunh roi ‘lơ̆ng rŏ hlŏh dơ̆ng".