Đơ̆ng mă lơ̆m hŏk tro jăl pêng, Hoàng Tiến Dũng hlôi hưch hanh hăm tơdrong jang kmăi kmŏk kơtơ̆ng ang. Lăp đơ̆ng rŏng lĕch ‘măng khoă lăm 12 ƀơ̆t sơnăm 2003, kiơ̆ tơdrong ‘meh vă kơ ŭnh hnam, ‘nhŏng mơ̆t hŏk trung kâp Quân lực hnam trương Đăi hŏk Trần Đại Nghĩa păng lĕch ‘măng khoă đơ̆ng noh đei tơmơ̆t jang lơ̆m Hơnih chĕp pơgơ̆r Ƀô̆ đô̆i thĭ xah Buôn Hồ bơ̆ jang. Tơ̆ au, kơ yuơ đei jơhngơ̆m đon hưch hanh kơtang hăm kmăi kmŏk kơtơ̆ng ang, ‘nhŏng đei kơdră kơpal pơjing rơvơn ăn năm hŏk pơhrăm lâp trinh tơ̆ Đăi hŏk Khoa học Tự nhiên pơlei tơm Hồ Chí Minh.

Lĕch ‘măng khoă hăm kơ loăi hơgei, Hoàng Tiến Dũng hlôi iung jang kiơ̆ hloi dôm tơdrong đei băt păng đei hŏk pơhrăm lơ̆m tơdrong jang yan au. Lăp lơ̆m 4 sơnăm, ‘nhŏng chih 2 phân mêm vei lăng păng mĭnh trong tơchăr trĕng prăh hăm rim kơ loăi tiểu liên AK. Thiếu tá Hoàng Tiến Dũng tơbăt:“Găh phân mêm au ‘noh tơgŭm ăn vei lăng kon pơlei lơ̆m sơnăm gơh mơ̆t pơm ƀô̆ đô̆i; vei lăng đei dôm khul bơngai ayơ ‘noh găh dôm bơngai chih hơnăn mơ̆t pơm hmŏ hơdrol, đơ̆ng noh khul mă 1, khul 2; tơgŭm ăn kang ƀô̆ bơ̆ jang krao tơmơ̆t pơm ƀŏ đô̆i iung jang rim tơdrong bơ̆ jang găh au.”

Ưh khan lăp hưch hanh chih tơlĕch phân mêm, Thiếu tá Hoàng Tiến Dũng jei tôch tơnăp vang iung jang hơdoi hăm bôl boăl chă tơchĕng tơchăr đei rim trong iŏk yua phao păng rim kơ loăi phao kơtoang tơgŭm ăn pơhrăm tơblăh. Đơ̆ng blŭng sơnăm au, ‘nhŏng atŭm hăm Trung tá Phạm Văn Đông – Kơdră chĕp pơgơ̆r Khul ƀô̆ đô̆i thĭ xah Buôn Hồ, chă tơchĕng tơchăr jơnei ứng dụng “Tơmơ̆t atŭm trĕng prăh” kiơ̆ nhoong phao tiểu liên AK pơma atŭm păng phao AR-15. Trong tơchăr au hlôi đei Khul kơdră chĕp pơgơ̆r Ƀô̆ đô̆i thĭ xah Ƀuôn Hô, Khul kơdră chĕp pơgơ̆r Ƀô̆ đô̆i dêh char Dak Lăk kĭ pơkăp păng gô đei tơlĕch jang kiơ̆ lơ̆m khei năr au kơnh. Trung tá Phạm Văn Đông tơbăt:“Hăm trong tơchăr ba ‘noh akŏm lơ̆m dăr lăng chă trĕng tơ̆ kơ ‘năr adoi nhen tơ̆ gơmăng ‘moi kiơ̆ ‘moi kiơ̆ tĭch hơp kam ƀiên jơ̆ng ‘năr; găh ‘nhŏng Dũng ‘noh kơpi hơlen hơnih trĕng gơih pơtruh lơ̆m điên thoăi. Ƀar tơdrong au akŏm jing mĭnh trong tơchăr “Hơlen trong trĕng lơ tơdrong” păng truh dang ei măr nhi ‘nhŏng Dũng hlôi tơmơ̆t hơgrop, đơ̆ng noh chă tơchĕng hơlen pơjing đei tơmam drăm ‘noh.”

Kiơ̆ đơ̆ng Thượng tá Tống Văn Quang – Chính trị viên Hơnih chĕp pơgơ̆r Ƀô̆ đô̆i thĭ xah Ƀuôn Hô, dôm sơnăm au ki, tơpôl kang ƀô̆ ƀô̆ đô̆i ling lang atŏk kơtang jang kiơ̆ kơjăp rim tơdrong, trong pơtho pơhrăm chinh trĭ, pơtho pơhrăm khôi luơ̆t; Pơgơ̆r ăn kang ƀô̆, đang viên kĭ pơkăp, hŏk pơhrăm, pơgoăt jơhngơ̆m đon ‘lơ̆ng kiơ̆ jơhngơ̆m đon ‘lơ̆ng, trong jang hơgei kơ Ƀok Hô; Pơm hơtŏk jơhngơ̆m đon kơchăng lơ̆m chă tơchĕng hơlen, jang kiơ̆ khoa hŏk kmăi kmŏk lơ̆m bơ̆ jang pơtho pơhrăm tơblăh ... Đơ̆ng noh roi năr roi ƀôh lơ bơngai hơgei lơ̆m lơ tơdrong bơ̆ jang, lơ̆m au mă kăl ‘noh Thiếu tá Hoàng Tiến Dũng hăm rim phân mêm “Vei lăng tơdrong jang ƀrơ̆m phao kơtoang”, "Vei lăng chih hơnăn apĭnh mơ̆t pơm ƀô̆ đô̆i”…Rim phân mêm au hlôi păng tŏk bŏk tơlĕch jang kiơ̆ kơtang lơ̆m yan au, tơgop pơm hơtŏk iŏk đei jơnei lơ̆m jang kiơ̆ tơdrong jang vei lăng năng tông Teh đak. Thượng tá Tống Văn Quang, pơma tơbăt găh Thiếu tá Hoàng Tiến Dũng:“4 sơnăm hơnơ̆ng, ‘nhŏng Dũng ‘noh đảng viên ling lang jang keh đang ‘lơ̆ng tơdrong jang kơ hơnih au, găh rim trong tơchăr ‘noh sư hlôi đei Hơnih tơm Ƀô̆ đô̆i vei lăng sơlam teh đak, Quân khu 5 păng Khul kơdră chĕp pơgơ̆r Ƀô̆ đô̆i dêh char Dak Lăk pôk ăn hla bơar hôn bơnê, pôk pơ ư. Rim phân mêm Vei lăng khul hmŏ păng trong tơchăr kơ yuơ sư pơjing jei đei tơmơ̆t jang kiơ̆ jơ̆p jang hrei au păng dôm sơnăm truh au kơnh dơ̆ng.”

Vă jê̆ 20 sơnăm tơklep kơjăp hăm Khul kơdră chĕp pơgơ̆r Ƀô̆ đô̆i thĭ xah Buôn Hồ, Thiếu tá Hoàng Tiến Dũng hlôi păng tŏk bŏk tơchăr đei lơ phân mêm păng trong tơchăr tơgŭm ăn bơ̆ jang pơtho pơhrăm tơblăh jơnei. Hăm dôm tơdrong hơdrin lơ̆m bơ̆ jang, ‘nhŏng hlôi đei kơdră chĕp pơgơ̆r pôk ăn lơ tơma hơpăh gĭt kăl. Mă lei hăm ‘nhŏng, tơmam hơpăh gĭt kăl hloh ‘noh tơdrong ‘mêm kơ eng đơ̆ng ŭnh hnam păng bôl boăl. ‘Nau gô jing tơdrong hơlêm kơtang hloh vă ‘nhŏng hơnơ̆ng hŏk pơhrăm, tơchăr, tơchĕng pơjing đei dôm phân mêm gĭt kăl ‘lơ̆ng hơ iă tơgop lơ̆m jang kiơ̆ jơnei rim tơdrong jang vei lăng năng tông Teh đak lơ̆m chăl hle.