Lơ̆m vă jê̆ 40 nơ̆r tơgop đơ̆ng bơngai tăh hla tơ̆ jơ tơƀơ̆p, găh lơ pơma truh tơdrong tơgar dih băl teh đunh đai ƀar păh kon pơlei hăm rim mir đak lar, hơnih mơdro sa đei Teh đak pơjao ăn teh. Kiơ̆ đơ̆ng bơngai tăh hla, tơdrong chă bơbĭt, tơgar dih băl teh ou hlôi truh mơjĭt sơnăm mă lei oei tim mă sek tơlang keh đang. Bơngai tăh hla Nguyễn Hữu Tân, tang măt ăn hloh 60 ŭnh hnam oei lơ̆m thôn Hiệp Hòa, tơring Ninh Gia, pơma:  “Năr 29/8/1988, Hơnih vei lăng kon pơlei dêh char pơjao ăn Hơnih tơm jang hơdrĕch ‘long pơtăm Lang Hanh ‘noh 200ha mă lei lơ̆m ou đei teh kon pơlei nhôn tŏk bŏk choh jang sa. Lơ̆m tơdrong tơchơ̆t tơ̆ apăng 3 pơma hơdăh, hăm hơgăt teh kon pơlei oei choh jang sa ‘noh athei rim hơnih jang xek tơlang kiơ̆ khôi luơ̆t, mă lei đơ̆ng mă noh truh dang ei ưh kơ đei xek tơlang. Kon pơlei nhôn hlôi năm tơroi tơbăt đơ̆ng tơring năm tơ̆ apŭng, đơ̆ng apŭng năm tơ̆ dêh char, đơ̆ng noh dêh char pơjao ăn dơ̆ng tơring chă xek tơlang ăn”.

Ƀôh hơdăh rim tơdrong đei ƀơm truh bơ̆ jang vei lăng, iŏk yua păng tơgar dih băl teh tơ̆ tơring Ninh Gia jĭ đei tơdrong tôch mơmat tat păng đunh đai, ƀok Phan Đình Trạc, Kơdră jang lơ̆m Hơnih tơm Chinh trĭ, Bí thư Trung ương Đảng, Kơdră chĕp pơgơ̆r Ban nội chính Trung ương athei khul kơdră dêh char Lâm Đồng tĕnh koăng dăr lăng, xek tơlang keh đang tơdrong ou. Hăm dôm tơdrong gơ̆h jang, Khul kơdră tang măt Kuô̆k hô̆i dêh char Lâm Đồng gô chih pơtruh hla bơar athei Hơnih tơm Ƀô̆ đô̆i vei lăng sơlam teh đak iung jang xek tơlang. Ƀok Phan Đình Trạc, pơma:“Găh tơdrong đei ƀơm truh groi teh, ĭnh athei Kơ iĕng Kơdră chĕp pơgơ̆r Hơnih vei lăng kon pơlei dêh char Nguyễn Ngọc Phúc, Hơnih jang vei lăng Mŭk drăm bri brăh păng Cham char atŭm hăm rim kơdră ƀôh kang bang kơl tơ̆ ou pơrô̆ xek tơlang mă keh đang. Kon pơlei tơroi akhan apĭnh apŭng ‘noh apŭng akhan kơdră dêh char tim đei nơ̆r chă pơrô̆ athei, găh dêh char ‘noh akhan tơdrong jang ou găh apŭng, hơnơ̆ng chă tơpu dih băl lơ lou kon pơlei vă băt gơnang kơ bu kơnh. Hơdrô̆ găh teh đei ƀơm truh Mir Đak lar 78 ‘noh ĭnh athei Hơnih bơ̆ jang chih hla bơar kơ Khul kơdră tang măt Kuô̆k hô̆i dêh char tơbăt hơdăh dôm tơdrong hrei ou kơ mir đak lar vă pơtruh ăn Hơnih tơm Ƀô̆ đô̆i vei lăng sơlam teh đak, đe sư gô năm tơ̆ ou chĕp pơgơ̆r, iung jang hơdoi hăm dêh char, hăm Hŏk viê̆n Lục quân vă xek tơlang keh đang hloi”.

Hơdrol kơ ‘noh, tơ̆ tơring Trạm Hành, pơlei tơm Đà Lạt, Kơdră jang lơ̆m Hơnih tơm Chinh trĭ, Bí thư Trung ương Đảng, Kơdră chĕp pơgơ̆r Ban nội chính Trung ương Phan Đình Trạc atŭm hăm Khul kơdră tang măt Kuô̆k hôi dêh char Lâm Đồng hlôi tơƀơ̆p pơma dơnuh hăm bơngai tăh hla ‘noh dôm kŏng nhân bơngai jang păng kang ƀô̆, đoàn viên công đoàn.

Tơ̆ jơ tơƀơ̆p, lơ bơngai tăh hla akhan, khul bơ̆ jang vei lăng năng tông bri ‘noh jĭ dôm bơngai kăl hloh iung jang hloi tơdrong jang vei lăng năng tông bri, mă lei hrei ou khul ou tim mă đei lăng tông nông gia trŏ lăp păng ưh kơ đei lăng akhan tơdrong jang gleh hrat, hơmơt tơt nhen bơngai jang vei lăng bri. Bơngai tăh hla athei lăng hơlen, hơmet ming tơdrong tơchơ̆t găh tơgŭm djru ou vă sơđơ̆ng đei iŏk yua sa hơpăh kơ khul bơ̆ jang vei lăng bri tơring-hơnih đei groi teh bri tơmơ̆t mĭnh poăt hơgăt teh bri lơ̆m dêh char.

Iung pơma tơ̆ jơ tơƀơ̆p, ƀok Phan Đình Trạc, Kơdră jang lơ̆m Hơnih tơm Chinh trĭ, Bí thư Trung ương Đảng, Kơdră chĕp pơgơ̆r Ban nội chính Trung ương akhan, dôm nơ̆r tơgop đơ̆ng bơngai tăh hla ‘noh tôch trŏ lăp. Khul kơdră tang măt Kuô̆k hô̆i dêh char Lâm Đồng gô tơgoăt iŏk, chih akŏm păng tơroi tơbăt ăn rim hơnih bơ̆ jang Trung ương.“Tơdrong khul jang vei lăng bri tim mă đei lăng jing hơnih jang greh grat, hơmơt tơt nhen Hơnih jang vei lăng bri mă lei tơdrong bơ̆ jang jei nhen lĕ bơngai kang ƀô̆ vei lăng bri đĕch, tơdrong mă ou ĭnh athei Khul kơdră tang măt Kuô̆k hôi dêh char Lâm Đồng chih răk vă tơroi tơbăt ăn Khul kơdră chĕp pơgơ̆r Teh đak. ‘Ngoaih kơ ‘noh, rim tơdrong găh tơdrong jang pơgang, pơtho pơhrăm, tơdrong jang ... nhôn gô chĕp răk tơƀăk mong mă hơdăh tôm tong vă tơroi tơbăt ăn rim hơnih bơ̆ jang tơ̆ Trung ương”.

Jơ ‘năr ou, Khul kơdră tang măt Kuô̆k hô̆i dêh char Lâm Đồng hlôi pôk ăn 20 tơnô̆ tơmam drăm ăn ŭnh hnam đei iŏk yua ăn teh đak, ŭnh hnam tơnap tap oei lơ̆m tơring Trạm Hành, pơlei tơm Đà Lạt, 20 tơnô̆ tơmam drăm pôk ăn ŭnh hnam đei iŏk yua ăn teh đak, ŭnh hnam tơnap tap oei lơ̆m tơring Ninh Gia, apŭng Đức Trọng, dêh char Lâm Đồng.