Giĕng âu ki, Bơngai jang lơ̆m Anih tơm Chĭnh trĭ, Bí thư Trung ương Đảng, Kơdră Ban nội chính Trung ương Phan Đình Trạc kŭm hăm Khŭl tang măt Quốc hội dêh char Lâm Đồng hlôi tơƀơ̆p pơma dơnuh hăm bơngai tăh hla ‘noh kang ƀô̆, bơngai jang teh đak kơ pơlei tơm Đà Lạt. Hơdai hăm dôm nơ̆r tơgop jum dăr tơdrong jên khei, jên tơgŭm kang ƀô̆ joăt jang tơring oei tŏ sĕt, bơngai tăh hla pơlei tơm Đà Lạt (Lâm Đồng) tôch kơ bơngơ̆t truh tơdrong jang tang găn sa pơgơ̆m pơjĭp. Bơngai tăh hla Lê Xuân Ninh tơroi nơ̆r tơgop: “Dôm sơnăm tơjê̆ âu, tơdrong jang tang găn sa pơgơ̆m pơjĭp tôch kơ đei yua. Mă lei, oei đei dôm khŭl jang, dôm anih jang tam mă đei ‘lơ̆ng. Athei hơtŏk loi dơ̆ng tơdrong jang tang găn sa pơgơ̆m pơjĭp mă kơtang hloh. Mưh sek tơlang dôm tơdrong tih găh mŭk drăm, ĭnh athei iŏk pơdreo pơgoh mŭk tơmam đei hiong kơ Teh đak”.

Iung pơma tơ̆ jơ tơƀơ̆p, ƀok Phan Đình Trạc, Bơngai jang lơ̆m Anih tơm Chĭnh trĭ, Bí thư Trung ương Đảng, Kơdră Ban nội chính Trung ương akhan, dôm nơ̆r tơgop, apĭnh đơ̆ng bơngai tăh hla ‘noh tôch kơ trŏ ƀlep. Khŭl tang măt quốc hội dêh char Lâm Đồng gô chih iŏk păng gơih truh Quốc hội lơ̆m ‘măng hop akŏm truh. Hơdrô̆ tơdrong jang tang găn sa pơgơ̆m pơjĭp, ƀok Phan Đình Trạc tơbăt đơ̆ng blŭng sơnăm truh dang ei, lơ̆m teh đak hlôi bơ̆jang kiơ̆ tơkêng, dăr hơlen hloh 1.800 tơdrong, hăm 3.493 ‘nu bơngai pơm glăi găh sa pơgơ̆m pơjĭp, mŭk drăm păng kơchư̆k jang, tŏk 63,8% kơsô̆ tơdrong păng 44,8% kơsô̆ bơngai đei pơm glăi pơting hăm khei ‘nâu sơnăm sơ̆. Tơdrong jang tang găn sa pơgơ̆m pơjĭp tŏk bŏk hơnơ̆ng đei tơlĕch tôch kơtang, ưh kơ đei pơdơh, ưh kơ đei tơring kơ̆m păng ưh kơ đei lon bu. Ƀok Phan Đình Trạc pơma: “Lơ̆m lơ tơdrong glăi tơ jê̆ âu, trong jang dăr hơlen, jô̆ hơlen, pơvang găn mŭk tơmam, tài khoản vă vei sơđơ̆ng pơm kiơ̆ sek phak đei Anih pơgơ̆r jang bơngơ̆t truh hloi đơ̆ng blŭng păng roi ‘năr roi đei iŏk yua. Tơdrong ‘nao đei ƀôh lơ̆m 4 khei blŭng sơnăm ‘nâu găh tang găn sa pơgơ̆m pơjĭp ‘noh jĭ đơ̆ng tơkêng blŭng a găh dôm tơdrong pơm glăi mŭk drăm nhen klĕnh kơ thuê̆, pơm glăi tơdrong hơgăt găh chă rơih bơngai iŏk jang, pơm glăi iŏk yua teh, mŭk tơmam teh đak pơm ăn hiong lơ... anih jang dăr hơlen hlôi pơm rơđăh păng tơkêng dôm tơdrong pơm glăi găh sa pơgơ̆m pơjĭp yak mơ̆t lơ̆m ƀlep tơdrong hloh.”

Kŭm lơ̆m giĕng âu ki, Khŭl tang măt Quốc hội dêh char Đăk Lăk hlôi đei jơ bơ̆jang hăm Anih vei lăng kon pơlei dêh char păng dôm anih jang. Tơ̆ jơ bơ̆jang, tang măt kơdră chĕp kơ̆l dôm anih jang dêh char Đăk Lăk hlôi tơroi lơ tơdrong mơmat tat păng athei Trung ương set hơlen, hơmet pơ ‘lơ̆ng ăn hơtŏk tơiung mŭk drăm tơpôl tơ̆ tơring tơ̆ hơnăp kơnh. Lơ̆m noh, tơdrong găh pơ ‘nhŏ hơdrol ‘noh jĭ hơtŏk tơiung trong nơnăm tơƀưh lơ tơring Tây Nguyên. Ƀok Võ Ngọc Tuyên, Kơdră vei lăng Anih Tơlĕch nơ̆r sơkơt păng Tơmơ̆t jên jang dêh char Đắk Lắk apĭnh: “Lơ̆m ‘măng hop akŏm âu Quốc hội gô tơchơ̆t pơdrơ̆ng kiơ̆ trong jang tơmơ̆t jên jang Gia Nghĩa – Chơn Thành ‘noh vă hơtŏk đei yua, 2 păh ‘noh pơm lăp hăm ‘meh vă đơ̆ng kon pơlei Tây Nguyên kŭm pơ̆n athei tơmơ̆t dôm trong Buôn Ma Thuột – Gia Lai păng Gia Lai – Gia Nghĩa lơ̆m tơmơ̆t jên jang jăl jang 2030. Hơdrol sơ̆ đei lơ̆m trong jang proh hơmet pơm trong gre kơdâu hrĕnh Việt Nam oei lơ̆m jăl jang đơ̆ng rŏng sơnăm 2030. Bơ̆n kăl kơ proh hơmet tơrih pơ ‘nhŏ ăn sơnăm 2030 ‘noh mă tơƀưh hrơ̆ch đơ̆ng dôm trong gre kơdâu hrĕnh lơ̆m tơring Tây Nguyên”.

Ƀơm truh bơ̆jang kiơ̆ dôm tơdrong jang tơm teh đak, dôm nơ̆r tơgop athei Quốc hội set hơlen pơgơ̆r athei dôm anih tơm, anih jang hơnơ̆ng akŏm dăr hơlen dôm hla ar khôi luơ̆t vă veh ver kơ hơdrom băl. Ƀok Đỗ Đức Hà, Phŏ Kơdră vei lăng Anih jang Tư pháp Đắk Lắk tơroi rơđăh: “Tơpă yan âu găh tơdrong jang tơm teh đak găh tơpă sư ưh kơ sĭ hla ar chih khôi luơ̆t, mă lei vă tơlĕch jang ‘noh tơ̆ tơring athei tơlĕch hla ar chih khôi luơ̆t bơ̆jang kiơ̆, mă tơdrong ‘nâu kiơ̆ hơgăt rơđăh rơđong đei tơdrong tơplơ̆ luơ̆t. Mă đơ̆ng dang ei tŏk bŏk bơ̆jang kiơ̆ dôm tơdrong jang tơm teh đak bơ̆n athei hơmet ming mă lăp vă drơ̆ng 1 nơ̆r."

 Tơ̆ jơ bơ̆jang, dôm bơngai tang măt kŭm apĭnh lơ tơdrong ƀơm truh tơdrong jang: tơmam drăm lơ̆m teh, ƀao hiêm, tư pháp, hơmet ming jên khei, hnam oei, tơdrong đei yua ăn bơngai jang, biên chế ăn kơ anih vei lăng pơtho pơhrăm, tơdrong jang chĕng hơmet, iŏk yua teh... Khŭl tang măt Quốc hội dêh char Đăk Lăk chih iŏk, akŏm dôm nơ̆r tơgop vă gơih truh Quốc hội păng dôm Anih tơm, anih jang set hơlen.