Khul tang năt Kuô̆k hô̆i dêh char Dak Nông hlôi pơgơ̆r 2 ‘măng tơƀơ̆p pơma dơnuh hăm bơngai tăh hla tơ̆ tơring Trường Xuân (apŭng Dak Song), tơring Dak Som (apŭng Dak Glong). Tơ̆ ‘măng hop akŏm ou ki, Kuô̆k hô̆i hlôi pơdrơ̆ng kiơ̆ tơdrong tơchơ̆t găh trong jang tơmơ̆t jên jang ming man trong glung rĕnh Gia Nghĩa- Chơn Thành hăm trong hơtăih kơjung 130km, akŏp kon jên tơmơ̆t jang 25.540 ti hlak jên.

      Lơ bơngai tăh hla tơbăt jơhngơ̆m đon chơt hơ iă, hôn bơnê kơtang hơnăp jang kơ Khul kơdră tang măt Kuô̆k hô̆i dêh char Dak Nông hlôi tơbăt hơdăh dôm tơdrong mă bơngai tăh hla hơpơi ‘meh vă ăn pơma dơnuh tơ̆ hop akŏm Kuô̆k hô̆i găh tơ iung pơjing ming man trong glung rĕnh. Bơngai tăh hla hơpơi ‘meh vă tơdrong vă jang ou hrôih đei tơlĕch jang, vă trong glung rĕnh hrôih đei tơpă, trŏ lăp ăn tơdrong ‘meh vă yơ yak, tĕch mơdro păng tơgŭm ăn kon pơlei chă yak năm ming hơmet jĭ jăn tơ̆ hnam pơgang tơm ƀônh ƀŏ hloh.

        Tơbăt găh tơdrong ou, ƀok Ngô Thanh Danh, Ƀĭ thư Đảng dêh char, Kơdră khul kơdră tang măt Kuô̆k hô̆i dêh char Dak Nông tơbăt, hăm hơnăp jang kơtang đơ̆ng ƀar dêh char Dak Nông păng Bình Phước, hloh đơ̆ng lơ ‘măng chă apĭnh, Khul kơdră Teh đak hlôi hơmet ming trong tơlĕch jang ming man trong glung rĕnh Gia Nghĩa (Dak Nông) - Chơn Thành (Bình Phước) gô iung jang đơ̆ng vă đĭ sơnăm 2024, ming man keh đang lơ̆m sơnăm 2026, tơmơ̆t ăn gơ̆h rok lơ̆m sơnăm 2027. Dêh char hơnơ̆ng apĭnh athei ming man trong glung rĕnh Gia Nghĩa - Buôn Ma Thuột vă pơih trong să hloh tơgum ăn Tây Nguyên atŏk tơ iung:“Bơngai tăh hla apĭnh athei pơih să trong glung 14 đơ̆ng Gia Nghiã truh tơ̆ gơng 20, ‘noh trong ou nhôn hlôi chă apĭnh bơih. ‘Noh lăp đơ̆ng rŏng ming man trong glung rĕnh Gia Nghĩa – Chơn Thành, ‘noh nhôn gô hơnơ̆ng chă apĭnh tơmơ̆t jên jang pơm trong glung rĕnh Gia Nghĩa – Buôn Ma Thuột, păng ưh kơ jor lơ̆m jăl jang truh ou kơnh. Hăm trong glung ou jĭ tôch kơ gĭt kăl pơjing đei trong yak kloh klĕch Tây Nguyên dơ̆ng lei mă kĕ atŏk tơ iung. Dang ei gre chă kơdou găn hloh dêh char Dak Nông tôch kơ lơ, hmă hmă lơ̆m mĭnh năr đei dang 2.500 tong gre yak hloh, găh dôm năr lêh năr pơdơ̆h ‘noh gre kơdou rok trong ou lơ hloh 2-3 ‘măng”.

Tơ̆ rim ‘măng tơƀơ̆p pơma dơnuh, bơngai tăh hla rim tơring hơnơ̆ng tơbăt hơdăh ăn Kơdră tang măt Kuô̆k hô̆i lơ tơdrong đei ƀôh ưh kơ hơ iă hrei ou. Bơngai tăh hla apŭng Phú Thiện, dêh char Gia Lai tơbăt găh tơdrong pơm hla bơar ƀơk ăn hla bơar pơm tơ-‘ngla teh oei mơmat tat. Bơngai tăh hla Hoàng Thanh Tùng, Koeng kơphô̆ 3, thĭ trân Phú Thiện tơbăt.“Lơ ‘măng kon pơlei năm pơm hla bơar găh teh vă ming man hnam rong sem pleng. Hơnih bơ̆ jang vei lăng groi teh sơng iŏk hla bơar, ba hla bơar trŏ ƀlep bơih, mă lei hơnơ̆ng akhan gô chang apĭnh Hơnih bơ̆ jang pơm hla bơar groi teh dêh char ‘mơ̆i. Truh dang ei, dôm hla bơar apĭnh pơm hnam au hlôi ba đĭ 5 khei bơih, mă lei oei tim mă kơtơ̆ng tơroi tơbăt hơdăh hăm gơ̆h pơm dăh mă ưh ‘mơ̆i. Kơ yuơ ưh kơ tơplih ăn kon pơlei kiơ̆ ƀlep tơdrong tơchơ̆t, mă tă akhan gô apĭnh kơdră kơpal ‘mơ̆i? Lơlou jăl ăn hơnih bơ̆ jang pơm hla bơar teh apŭng ăn kơ apŭng vei lăng ‘nei mă ‘lơ̆ng hơ iă ƀiơ̆?”

Bơngai tăh hla pơlei tơm Bảo Lộc, dêh char Lâm Đồng ‘noh tơbăt, tơdrong pơprŏ jang sir iŏk mŭk drăm lơ̆m teh oei hơdrom dih băl hăm lơ trong pơprŏ vă jang anai kơ Trung ương hăm tơring. Tơdrong mă ou pơm ăn lơ tơdrong tơhlăk tơhlĭn lơ̆m tơlĕch jang kiơ̆ mĭnh ƀar hơnih ming man tơm kơ dêh char. Yă Phạm Thị Hường, oei tơ̆ phương Lộc Tiến, pơlei tơm Bảo Lộc tơbăt, pơđĭ 2ha kơ unh hnam jei tơhlăk tơhlĭn lơ̆m pơprŏ kơna ưh kơ gơ̆h vă pơdơ̆ng ăn hơnih mong jên vă apĭnh tŏk iŏk jên jang sa, tơdrong ming hơmet hnam oei, chĕng asong teh ăn kon hơ ‘lơ̆p atŭm hăm lơ tơdrong jang anai đei ƀơm truh jei ưh kơ gơ̆h pơm ngăl. Tơdrong hơrih sa kơ ŭnh hnam jĭ tơƀơ̆p tôch mơmat tat kơ yuơ tơhlăk tơhlĭn lơ̆m pơprŏ vă jang:“Hăm ŭnh hnam nhôn ‘noh tơpă mơ̆n tôch mơmat tat. Ĭnh oei tơ̆ ou dôm jĭt sơnăm kơ ou bơih, dang ei apĭnh tơplih iŏk yoa teh jei ưh kơ gơ̆h, pơm hnam ăn kon hơ ‘lơ̆p jei ưh kơgơ̆h kơna ŭnh hnam tôch mơmat tat. Ŭnh hnam nhôn jei nhen rim ŭnh hnam kon pơlei lơ̆m tơring jei hlôi tơbăt hơdăh găh trong pơprŏ tơchă hơlen mŭk drăm lơ̆m teh ou, tơdăh gơ̆h jang lei jang hloi, tơdăh ưh lei hơmet pơ ‘lơ̆ng ăn kơ nhôn, tơdăh hơnơ̆ng gôchang lơ lou kon pơlei tơtăm dêh!”.

Tơgoăt iŏk nơr tơbăt, nơ̆r apĭnh athei, rim Khul kơdră tang măt Kuô̆k hô̆i athei kơdră tang măt ăn rim hơnih bơ̆ jang păng kơdră chĕp pơgơ̆r rim tơring tơl hơdăh hloi lơ nơ̆r apĭnh ou. Găh lơ̆m dôm tơdrong gơ̆h jang kơ hơnih tơm, hơnih bơ̆ jang păng Kuô̆k hô̆i ‘noh hơnơ̆ng chih akŏm dôm nơ̆r tơgop vă pơtruh ăn rim kơdră kơpal sek tơlang ăn.