Khul tang măt Kuô̆k hô̆i dêh char Gia Lai đei jơ tơƀâp bơngai tăh hla tơ̆ dôm apŭng Phú Thiện, Đức Cơ, Chư Păh, Đak Đoa, Kbang, Chư Prông, Đak Bơ păng Ia Grai. Tơ̆ dôm jơ tơƀâp, bơngai tăh hla dêh char Gia Lai tơƀôh đon hơiă hăm tơdrong jơnei đơ̆ng Hop akŏm mă 4 Quốc hội jăl XV. Bơngai tăh hla oei tơchĕng ‘lơ̆ng đon jang tơnăp đơ̆ng dôm bơngai tang măt Kuô̆k hô̆i dêh char Gia Lai đei lơ nơ̆r tơgop gĭt kăl ăn tơdrong jơnei kơ Hop akŏm.

Bơngai tăh hla pơma tơlĕch lơ tơdrong tam mă ‘lơ̆ng hơiă tơ̆ tơring, nhen athei tơ rĕk truh tơdrong tơmât jên jang, pơm hơmet anih jang, trong nơnăm tơ̆ tơring tơrang, mă loi jĭ trong nơnăm. Tơdrong glơ̆k tơ̆ đak hăm đe hơiŏh roi tŏk lơ̆m sơnăm âu ki, anih pơm ngôi ăn hơiŏh tơ̆ tơring tơrang, tơring kon kông oei. Tơ̆ jơ tơƀâp, lơ bơngai tăh hla athei dôm anih jang kơpal đei trong jang vei sơđơ̆ng kơjă phŏng, tơmam pơyoa ăn tơdrong choh jang xa vă kon pơlei sơđơ̆ng jơhngâm jang xa.

Bơngai tăh hla Lê Văn Trung, oei tơ̆ thôn 3, xăh Ia Tô, apŭng Ia Grai đei nơ̆r pơma: “Tơdrong kơjă tơmam ưh sơđơ̆ng, mă 2 dơ̆ng ‘nŏh kơjă phŏng oei măk dêh, kon pơlei pơtăm, vei rong chĕh phe ưh đei lơi, mă lei đĭ bơh ƀơm pơtăm dôm sơnăm bơih, đei dôm yơ tơtă tuh pơđĭ tơ̆ jên răt phŏng ngăl. Adrol ki 600 rơbâu 1 ƀao, dang ei tŏk văjê̆ truh 1 triu 1 ƀao, oei kŏng phĕ âu to dơ̆ng… Mih ma duch nă hơpơi ‘mĕh Kuô̆k hô̆i, Khul kơdră tĕh đak set hơlen vă hơmet pơ ‘lơ̆ng kơjă tơmam đơ̆ng choh jang xa đei păng kơjă phŏng”.

Oei tơ̆ dêh char Dak Nông, Khul tang măt Kuô̆k hô̆i dêh char ‘nâu pơgơ̆r dôm ‘măng tơƀâp bơngai tăh hla tơ̆ dôm apŭng Đak Rlấp, Đak Mil, Cư Jút păng plt Gia Nghĩa. Bơngai tăh hla Dak Nông tơchĕng ‘lơ̆ng hơnăp jang đơ̆ng khul tang măt dêh char mưh vang pơma nuh, tơgop nơ̆r păng apinh jet tơ̆ Hop akŏm Kuô̆k hô̆i. Bơngai tăh hla tơ̆ Dak Nông oei tơ lĕch lơ nơ̆r pơma ƀơm truh tơdrong hơmet ming trong pơm hla ar tĕh, tơdrong tơlĕch trong iŏk yoa tĕh, tơmât jên ăn dôm tơdrong jang pơm trong, man anih jang tơ̆ tơring tơrang, vei lăng cham char...

Lơ̆m tơdrong jang tang găn xa pơjĭp, bơngai tăh hla hơpơi ‘mĕh dêh char Dak Nông hơtŏk hlŏh dơ̆ng vă sek tơlang kĕh dôm tơdrong tơtŏ tơ̆ tơring. Nhen tơ̆ xăh Đak Nia, plt Gia Nghĩa, lơ bơngai tăh hla athei jăh pơm hơdăh hơnăp jang păng hơmet pơ ‘lơ̆ng trong mât tơ̆ chơkơi Liêng Nung hlŭn, hơđăh, ưh gơ̆h yak vih vât.

Bơngai tăh hla Nguyễn Đình Thi, tơ̆ plei Sê rê u, xăh Đak Nia, đei nơ̆r pơma: “Athei tơroi ăn bơngai tăh hla nhôn băt đơ̆ng rŏng kơ pơjing Anih pơgơ̆r jang tang găn xa pơjĭp kơ dêh char truh dang ei Anih jang hlôi iŏk sek tơlang, hơlen năng dôm tơdrong pơm glăi tơ̆ dêh char bơih? Hrei 'nâu bơngai tăh hla xăh Đak Nia nhôn tôch tơtŏ đon, 'nŏh jĭ văjê̆ 30 ti hlak jên tơmât ăn Anih chă tơmang lăng Liêng Nung jô̆ hloi pơm trong dang ei ưh đei yoa yă kiơ, oei tơ̆ âu ‘nŏh jĭ anih chă tơmang lăng lơ̆m tơpôl tŏk bŏk pơjing ming man”.

Lơ̆m giĕng âu ki mơ̆n, ƀok Phan Đình Trạc, Kơdră jang lơ̆m Anih tơm Chinh trĭ, Bí thư Trung ương Đảng, Kơdră chĕp kơ̆l Ban Nội chính Trung ương kŭm hăm Khul tang măt Kuô̆k hô̆i dêh char Lâm Đồng đei jơ tơƀâp bơngai tăh hla tơ̆ xăh Đạ Nhim, apŭng Lạc Dương. 

Tơ̆ jơ tơƀâp, mih ma duch nă bơngai tăh hla xăh Đạ Nhim, apŭng Lạc Dương tơƀôh đon hơiă hăm dôm tơdrong iŏk đei gĭt kăl lơ̆m hop akŏm mă 4 Kuô̆k hô̆i jăl XV, mă loi jĭ dôm kơ luơ̆t, tơdrong Tơchơ̆t gĭt kăl hlôi đei drơ̆ng nơ̆r. Atŭm hăm ‘nŏh, hơnơ̆ng pơtruh nơ̆r pơma hăm Khul tang măt Kuô̆k hô̆i dêh char Lâm Đồng găh 1,2 tơdrong ưh kơlăp păng athei apŭng, dêh char păng Trung ương tơrĕk, jăh sek tơlang hrôih. Lơ̆m nŏh đei trong gre 27C hư pơchăh, hơnơ̆ng tơ hlăk ưh gơ̆h yak vih vât yoa đơ̆ng tĕh hơlih, lơ anih trong kuĕch kuĕl tơ kăl tôch hơmơt; jăh hơlen năng, pơm, ƀơk hla ar tĕh ăn kon pơlei; tơdrong tơgŭm ăn kăn ƀô̆ jang tơ̆ xăh lăp tŏsĕt đĕch; kăl đei trong asong tŏk iŏk jên vă choh jang xa… Kơdră chĕp kơ̆l Dơnŏ anih vei lăng kon pơlei dêh char Lâm Đồng, Dơnŏ anih vei lăng kon pơlei apŭng Lạc Dương hlôi iung roi tơbăt, tơl tơblang 1,2 tơdrong găh hơnăp jang kơdih đei bơngai tăh hla xăh Đạ Nhim pơma truh.

Ƀok Phan Đình Trạc, Kơdră chĕp kơ̆l Ban Nội chính Trung ương chih iŏk dôm nơ̆r pơma apĭnh đơ̆ng bơngai tăh hla păng vă tơroi ăn Kuô̆k hô̆i lơ̆m dôm hop akŏm truh. Lơ̆m nŏh, athei tơmât jên pơih xă, hơmet pơ ‘lơ̆ng trong gre 27C ‘nŏh jĭ nơ̆r athei tôch tơgăl đơ̆ng bơngai tăh hla păng lăp hăm trong jang tŏk tơring Tây Nguyên đơ̆ng Anih tơm Chinh trĭ.

Ƀok Phan Đình Trạc, pơma: “Găh trong gre 27C, inh ƀôh Khul tang măt Kuô̆k hô̆i bơ̆n kăl đei jơ bơ̆ jang hăm Anih tơm vei lăng trong nơnăm vă kŭm hăm dêh char hơmet pơ ‘lơ̆ng dôm tơdrong mơmat tat nhen thoi âu. ‘Nâu kŭm jing tơdrong đei lơ̆m trong jang atŭm đơ̆ng Anih tơm Chinh trĭ găh Tơdrong tơchơ̆t ăn tơring Tây Nguyên. Lơ̆m nŏh, mĭnh trong jang tôch gĭt kăl ‘nŏh tơguăt hơdai rim tơring, tơring Tây Nguyên hăm dôm tơring jang tŏk pran tơ̆ găh Hơlĕch, hăm plt HCM, hăm Khánh Hòa…”.