Khul tang măt Kuô̆k hô̆i dêh char Dak Lak pơgơ̆r Hop akŏm iŏk nơ̆r tơgop ăn dôm kơ luơ̆t rŏ năng gô đei Kuô̆k hô̆i hơnhăk tơlĕch vă pơma nuh lơ̆m 'măng hop akŏm âu. Tơ̆ hop akŏm, bơngai tăh hla Dak Lak tơgop lơ nơ̆r tôch đei yoa ƀơm truh Luơ̆t Viễn Thông (oei chih hơmet); Luơ̆t Tơmam đak (oei chih hơmet); Luơ̆t Dôm anih asong tŏk iŏk jên (oei chih hơmet); Luơ̆t vei lăng anih pơyoa ăn khul linh păng tơring khul linh; Luơ̆t Tĕch mơdro tĕh, hnam (oei chih hơmet); Luơ̆t Hnam oei (oei chih hơmet).

Tơgop ăn Luơ̆t tĕch mơdro tĕh, hnam (oei chih hơmet), lơ bơngai tang măt akhan: Hăm dôm tơdrong hơgăt ‘nao, chih pơjing tôm tơdrong, hrơ̆ch ‘lơ̆ng, drơ̆ng pôm nơ̆r vă vei lăng tơdrong tĕch mơdro tĕh, hnam, tơgŭm, tưk tơiung tơdrong tĕch mơdro tĕh, hnam tŏk pran ‘lơ̆ng. Pơjing tơdrong hiôk hian mưh tĕch mơdro hnam, tĕh, vei lăng sơđơ̆ng ‘lơ̆ng tơdrong tĕch mơdro, tĕh, hnam sơ đơ̆ng, trŏ ƀlep, rơđăh rơđong. Mă lei, vă hơtŏk hơnăp jang, jơhngâm jang đơ̆ng anih vei lăng tĕh đak găh tĕch mơdro tĕh, hnam, Luơ̆t athei chih tơmât dơ̆ng tơdrong hơlen năng mưh jang kiơ̆ Luơ̆t tĕch mơdro tĕh, hnam.

Ƀok Hoàng Trọng Hùng, Phŏ Kơdră Anih jang Tư phap dêh char Dak Lak đei nơ̆r tơgop: “Trong 6 Apăng 87 chih găh tơdrong vei lăng tĕh đak găh tĕch mơdro tĕh, hnam inh athei hơlen năng tơdrong jang kiơ̆ luơ̆t găh tĕch mơdro tĕh, hnam. ‘Nŏh jĭ 1 tơdrong tôch gĭt kăl lơ̆m tơdrong vei lăng tĕh đak. Păng tơ̆ apăng 89 kŭm đei nơ̆r chih pơjao ăn Anih tơm vei lăng ming man roi tơƀôh ăn Khul kơdră tĕh đak hơlen năng tơdrong jang kiơ̆ Luơ̆t lơ̆m tơdrong tĕch mơdro tĕh, hnam yoa thoi nŏh athei chih tơmât dơ̆ng tơdrong 'nâu."

Pơma pơtôch hop akŏm, Phŏ Kơdră chĕp kơ̆l Khul juăt jang kơtă lơ̆m Kuôk hô̆i, vei lăng Khul tang măt Kuô̆k hô̆i dêh char Dak Lak Lê Thị Thanh Xuân chih răk, tơchĕng ‘lơ̆ng dôm nơ̆r tơgop đơ̆ng lơ bơngai tang măt ăn dôm khôi luơ̆t. Atŭm hăm ‘nŏh hơpơi ‘mĕh dôm bơngai tang măt hơnơ̆ng tơchĕng hơlen păng đei dơ̆ng lơ nơ̆r tơgop hăm hla ar chih gơih ăn Khul tang măt Kuô̆k hô̆i dêh char, vă chih akŏm tơroi lơ̆m Hop akŏm mă 5.

Lơ̆m giĕng âu ki mơ̆n, Khul tang măt Kuô̆k hô̆i dêh char Kon Tum jang hơdoi hăm Khul kơdră chĕp kơ̆l Anih MTTQ Việt Nam dêh char Kon Tum păng Khul kơdră chĕp kơ̆l Liên đoàn Lao động dêh char pơgơ̆r hop akŏm tơƀâp bơngai tăh hla hăm vă jê̆ 100 ‘nu công nhân bơngai jang tơ̆ tơring vang akŏm.

Tơ̆ hop akŏm, bơngai tăh hla ‘nŏh jĭ đe công nhân, bơngai jang tơ̆ dêh char Kon Tum apinh Khul tang măt Kuô̆k hô̆i dêh char 6 grŭp tơdrong jang hăm 38 tơdrong tơm, đei: Grŭp tơdrong chĕp kơ̆l pơgơ̆r, bơ̆ jang kiơ̆ tơdrong tơgŭm; Grŭp tơdrong choh jang xa, pơtăm ‘long; Grŭp tơdrong tĕch mơdro xa; Grŭp tơdrong jang pơgang; Grŭp tơdrong pơtho pơhrăm păng Grŭp tơdrong tơgŭm, vei sơđơ̆ng tơdrong arih xa tơpôl.

Nơ̆r tơroi ăn bơngai tăh hla, ƀok Phạm Đình Thanh, Phŏ Kơdră vei lăng Khul tang măt Kuô̆k hô̆i dêh char Kon Tum ăn tơbăt, dôm tơdrong bơngai tăh hla  ‘nŏh jĭ đe công nhân bơngai jang lơ̆m dêh char apinh hăm Khul tang măt Kuô̆k hô̆i dêh char hlôi đei roi tơbăt tôm ăn Khul kơdră tĕh đak, Kuô̆k hô̆i păng dôm Anih tơm, anih jang kơpal đei ƀơm truh bơih. Mă hơdăh nhen tơdrong tơgŭm hăm bơngai jang ăn tĕh đak, bơngai bơ̆ jang tơ̆ dôm Anih vei lăng bri; tơdrong tơgŭm hăm y ƀak si, mă loi jĭ lơ̆m khei ‘năr bơ̆ jang tang găn tơdrong jĭ…

Vă đĭ đăng nơ̆r pơma, apinh đơ̆ng bơngai tăh hla ‘nŏh jĭ công nhân bơngai jang lơ̆m dêh char đei mơ̆ng, chih răk, sek tơlang ăn, ƀok Phạm Đình Thanh, athei: “Khul tang măt Kuô̆k hô̆i dêh char athei Khul kơdră chĕp kơ̆l Liên đoàn Lao động dêh char hơlen năng rim nơ̆r pơma hăm rim tơdrong, vă akhan lơ̆m 38 tơdrong tơm âu, hơnơ̆ng hơlen năng păng athei đei nơ̆r apinh mă hơdăh, ưh kơ đei chih hrâu atŭm hơdai. Yoa chih atŭm hơdai 'nŏh tôch mơmat ăn anih jang kơ tĕh đak sek tơlang, tơl tơblang. Dôm tơdrong ƀơm truh hơnăp jang kơ anih jang ăn tĕh đak tơ̆ Trung ương 'nŏh nhôn vă chih akŏm, pơtruh nơ̆r kiơ̆ Anih chĕp kơ̆l pơgơ̆r Kuô̆k hô̆i”.

Tơ̆ dôm anih tơƀâp bơngai tăh hla, Khul tang măt Kuô̆k hô̆i dôm dêh char lơ̆m tơring Tây Nguyên hlôi roi tơbăt dôm tơdrong vă pơma nuh lơ̆m hop akŏm mă 5, Kuô̆k hô̆i jăl XV; atŭm hăm ‘nŏh mơ̆ng, chih iŏk dôm nơ̆r pơma, apinh đơ̆ng bơngai tăh hla vă chih akŏm, roi tơbăt ăn anih jang kơpal set hơlen, sek tơlang kiơ̆ hơnăp jang.

Tổng Thư ký Kuô̆k hô̆i, Kơdră Anih pơvih ăn Kuô̆k hô̆i Bùi Văn Cường ăn tơbăt, Hop akŏm mă 5 Kuô̆k hô̆i jăl XV pơih pơgơ̆r ‘năr 22/5; pơtôch lơ̆m ‘năr 20/6/2023 (hơmet hiă dơ̆ng 1 năr ‘nŏh ‘năr 21/6/2023). Tơchĕng adrol, akŏm đĭ đăng năr Kuô̆k hô̆i bơ̆ jang lơ̆m hop akŏm mă âu ‘nŏh 22 năr. Tơdrong hơmet rim tơdrong lơ̆m hop akŏm hlôi đei dôm anih jang kơpal bơ̆ jang tôch tơnăp, pơm ‘lơ̆ng, trŏ năr, tơtom vă pơvih ‘lơ̆ng hlŏh ăn hop akŏm.