Tơ̆ Hop akŏm mă 4, Jơnŭm pơgơ̆r kon pơlei dêh char Kon Tum jăl XII (đơ̆ng 2021- 2026), hơlen năng tơdrong jang đei lơ̆m sơnăm 2022 ăn ƀôh, lơ tơdrong hơgăt đei tơlĕch jang ưh kơ kĕh. Mă hơdăh, sơnăm 2022 tơdrong jang tŏk mŭk drăm đơ̆ng dêh char Kon Tum đei 9,5% pơtêng hăm sơnăm 2021. Iŏk yoa jô̆ kiơ̆ kơ̆l bơngai tŏk đơ̆ng vă jê̆ 47 triu truh hlŏh 52 triu hlak jên. Thu mong jên ăn tĕh đak pơhlom dang 4.000 ti, lăp hăm kơsô̆ đei pơjao. Lơ̆m sơnăm dêh char Kon Tum sơng đei 19 tơdrong tơmât jên jang, hăm kơsô̆ jên kĭ pơkăp vă tơmât jang dang 1.600 ti.  

Hơdai hăm dôm tơdrong jang đei, oei đei 4 tơdrong hơgăt gĭt kăl dêh char Kon Tum jang ưh kĕh, ‘nŏh: Tơdrong jang tŏk mŭk drăm ưh đei dang kơsô̆ hơgăt jang tŏk đơ̆ng 10% tŏk tơ̆ kơpal; Tơlĕch jên jang tơ̆ tơring; Jên jang đơ̆ng tĕh đak păng pơjing tơring tơrang ưh đei lăp hăm tơdrong hơgăt ‘năi. Kŭm hăm ‘nŏh, tơdrong jang hơmet ming trong pơm hla ar, hơmet pơ ‘lơ̆ng anih tơmât jên jang, hơtŏk kơsư̆k pơjei đơ̆ng dêh char tam đei tơplĭh ‘lơ̆ng; Tơdrong hrŭ ‘mong, chưk pơ ‘ngoăih tĕh ăn 1,2 tơdrong jang kăl oei hiơ̆, sơng iŏk jên tơmât jang oei đei lơ tơdrong ưh kơ ‘lơ̆ng…

Kơtă ƀât nơ̆r pơma pơih blŭng hop akŏm, ƀok Dương Văn Trang, Bí thư đảng dêh char, Kơdră Jơnŭm pơgơ̆r kon pơlei dêh char Kon Tum athei dôm bơngai tang măt pơm hơdăh dôm tơdrong oei ưh ‘lơ̆ng hơiă păng chih hơdăh trong hơmet pơ ‘lơ̆ng: “Iĕm athei akŏm jơhngâm pơma nuh, tơblang hơdăh, roi tơƀôh dôm tơdrong mơmat tat, tơhlăk tăk, dôm tơdrong tam mă ‘lơ̆ng păng kơlih yoa kiơ, mă loi hăm tơdrong yoa đon kơdih bơ̆n ‘nŏh athei jăh hơmet pơ ‘lơ̆ng hloi. Kiơ̆ đơ̆ng nŏh, chih hơdăh dôm trong jang mă 'lơ̆ng, mă lăp vă gơ̆h bơ̆ jang đei jơnei dôm tơdrong vă jang, tơdrong hơgăt atŏk tơiung mŭk drăm tơpôl, jên thu mong, tơlĕch jang lơ̆m sơnăm 2023”.

Tơ̆ hop akŏm âu, Jơnum pơgơ̆r kon pơlei dêh char Kon Tum jăl XII chă hơlen năng, tơchơ̆t 22 hla ar chih tơroi păng 31 tơdrong tơchơ̆t găh tơdrong jang hăm lơ tơdrong gĭt kăl ƀơm truh tơdrong arih xa, jang mŭk drăm, tơpôl kơ kon pơlei tơ̆ dêh char.

Lơ̆m giĕng âu ki mơ̆n, tơ̆ Hop akŏm mă 5, Jơnŭm pơgơ̆r kon pơlei dêh char Dak Lak jăl X, đơ̆ng 2021 – 2026, lơ tơdrong tơtŏ yoa jang ưh pran ‘lơ̆ng mưh tơlĕch jên jang đơ̆ng tĕh đak, pơjing tơring rei pơtăm đei kơsô̆ chih tơbăt vă tĕch tơ̆ tĕh đak đe, chă tơdrong jang ăn druh dăm… đei pơma tơlĕch.

Hơlen năng tơdrong bơ̆ jang lơ̆m sơnăm 2022, dôm bơngai tang măt akhan, tơdrong jang mŭk drăm, tơpôl lơ̆m dêh char Dak Lak sơnăm ‘nâu đei lơ tơdrong ‘lơ̆ng. Mă lei, tơdrong tơlĕch jên jang đơ̆ng tĕh đak lăp tŏsĕt đĕch (lăp đei 29,5%), hơdai hăm ‘nŏh jĭ tơdrong hơmet ming tơdrong vă jang lơ ‘măng, jing ưh ‘lơ̆ng, ƀơm kơnê̆ truh đon lui đơ̆ng kon pơlei kŭm nhen tơdrong jang tŏk dơ̆ng mŭk drăm đơ̆ng rŏng kơ jĭ covid-19.

Yoa thoi nŏh, bơngai tang măt Tô Thị Tâm, apŭng Ea Kar, athei: “Tơmât jên ăn dôm tơdrong jang athei đei yoa ‘lơ̆ng. Đei lơ tơdrong jang mưh hơlen năng đơ̆ng blŭng sơnăm truh hơtuch sơnăm jang tam mă kĕh. Tơdrong ‘lơ̆ng đơ̆ng tơdrong jang kŭm oei đei lơ tơdrong kăl tơrĕk truh ‘năi vă kon pơlei đei xa yoa đơ̆ng dôm tơdrong jang ‘nŏh đe sư hiôk jơhngâm, lui kiơ̆ dôm trong jang, tơdrong tơgŭm, tơmât jên jang lăp 'lơ̆ng”.

Hăm tơdrong choh jang xa, dôm bơngai tang măt Jơnŭm pơgơ̆r kon pơlei dêh char Dak Lak athei tơlĕch lơ trong jang, tơdrong tơgŭm mă hơdăh vă tơgŭm ăn kon pơlei jang chŭn mir bơ̆ jang tưk tơiung choh jang xa hăm kơmăy kơmŏk ‘nao, pơjing trong jang hơdoi đơ̆ng anih tĕch mơdro hăm kon pơlei. Găh noh dơ̆ng, athei chĕng hơmet mă hơdăh, pơjing kơsô̆ chih tơbăt ăn tơring pơtăm dôm kơloăi 'long xa plei, mă loi hăm 'long sâu riêng, vă vĕh ver tơdrong tơgar băl pơtăm, hơnơ̆ng đei tơdrong “pơtăm - kŏh” mưh jang đei 'nŏh kơjă jur, tơmam rơkăh rơkai.

Bơngai tang măt Lại Thị Loan – Kơdră vei lăng Khul kon pơlei jang chŭn mir dêh char Dak Lak đei nơ̆r pơma: “Trong jang ưh đei pơih xă tĕh pơtăm sâu riêng mă athei akŏm jơhngâm hơtŏk tơdrong ‘lơ̆ng ăn plei ‘long ‘nŏh, bơ̆n athei đei trong chĕng hơmet thoi yơ mă hơdăh, tơdăh ưh ‘nŏh kon pơlei pơjei băl kŏh phă chĕh phe vă pơtăm sâu riêng dơ̆ng. Oei kiơ̆ tơdrong tơdra đơ̆ng dôm bơngai juăt jang dang 5 sơnăm dơ̆ng plei sâu riêng yoa Trung Quốc pơtăm, gô đei tôch lơ”.

Hơdai hăm ‘nŏh, dôm bơngai tang măt oei pơma tơlĕch lơ tơdrong tơtŏ tơ̆ dêh char Dak Lak, nhen chă tơdrong jang ăn bơngai jang vih đơ̆ng dôm dêh char găh Pơbăh yoa ƀơm ưh ‘lơ̆ng đơ̆ng kơjă tơmam tok, hiong tơdrong jang; hơmet ƀiên chê̆ mă tôm kơsô̆ kăn ƀô̆, bơngai jang tơ̆ dôm anih jang kơ tĕh đak lơ̆m apŭng; pơjing trong tơgŭm ăn khul kăn ƀô̆ bơ̆ jang tơ̆ tơring; hơtŏk iŏk yoa, jên khei vă đe thây kô sơđơ̆ng jơhngâm pơtho chư.

Lơ̆m giĕng âu ki mơ̆n, Hop akŏm mă 23, Khul kơdră chĕp kơ̆l Jơnŭm pơgơ̆r kon pơlei dêh char Dak Nông jăl IV hlôi pơma nuh, hơlen năng, pơdrơ̆ng nơ̆r ăn dôm hla ar chih, tơdrong tơchơ̆t vă roi tơbăt lơ̆m Hop akŏm mă 5, Jơnŭm pơgơ̆r kon pơlei dêh char jăl IV, đơ̆ng 2021-2026. Lơ̆m nŏh đei lơ hla ar chih, tơdrong tơchơ̆t đei bơngai tang măt tôch tơrĕk, tơgop lơ nơ̆r vă pơm ‘lơ̆ng, gơ̆h jang kiơ̆ mưh tơlĕch jang.