Kŭm hăm dôm tơdrong ƀơm truh jang atŏk tơiung mŭk drăm - tơpôl, vei sơđơ̆ng teh đak tơ̆ tơring, dôm tơdrong găh tơdrong ‘lơ̆ng đơ̆ng pơtho pơhrăm păng tơƀôh trong ăn hŏk tro tốt nghiệp lăm 9 năm hŏk đei dôm bơngai tang măt pơma lơ hlŏh. Tơ̆ hơnăp tơdrong thi mât hŏk lăm 10, sơnăm hŏk 2024-2025 tơ̆ Đắk Lắk đei điêm tôch tŏ sĕt, lơ bơngai tang măt ăn tơbăt, bơngai tăh hla tơƀôh đon tôch pơngơ̆t hăm tơdrong pơtho, hŏk pơhrăm hrei ‘nâu.

Kŭm hăm ‘nŏh, tơdrong tơƀôh trong ăn hŏk tro năm hŏk đơ̆ng rŏng kơ hŏk đang lăm 9 kiơ̆ tơdrong jang “Pơtho kiơ̆ trong hŏk tơdrong jang păng klăih song, rơih iŏk hŏk tro năm hŏk phô thŏng đơ̆ng 2018-2025” tơ̆ dêh char oei đei lơ tơdrong ưh kơ lăp. Tơ̆ jơ pơma nuh, dôm bơngai tang măt Jơnŭm pơgơ̆r kon pơlei dêh char Đắk Lắk oei tơgop lơ nơ̆r, tơlĕch lơ trong jang vă hơtŏk tơdrong ‘lơ̆ng ăn pơtho hŏk pơhrăm tơ̆ dêh char tơ̆ hơnăp kơnh. Mă loi jĭ tơdrong tơgŭm ăn hŏk tro tơ̆ tơring pơmat tat, tơring kon pơlei kon kông oei xa.