Jăl trong vih vơ̆t tơ̆ tơring Sóc Bưng, săh Thạnh Phú, apŭng Mỹ Xuyên đei man hăm ƀê tŏng ataih jê̆ 500m, să 3m, tơmơ̆t iŏk yua đơ̆ng hơtuch sơnăm 2022 hlôi pơm trong hiôk ăn kơ hrĕng unh hnam kon pơlei Khmer vih vơ̆t hiôk hian hloh. Ƀok Lý Văn Nâu, tơ̆ tơring Sóc Bưng chơt hơ-iă tơroi: “Kơplah tam mă bơ̆ trong nơnăm âu ‘noh kon pơlei vih vơ̆t tơnap tap, mă kăl trong ‘mê̆ ‘mach, trôk ưh gơh yak ôh, tơdrong tĕch pơdro ưh kơ hiôk. Dang ei đei trong bơih, đe truh tĕch răt, kon hơ-ioh năm hŏk hiôk hian mơ̆n, kon pơlei nhôn hmach bơnê kơ Đảng, Teh đak hlôi man asong ăn jăl trong âu”

Ưh hơdrô̆ asong man trong nơnăm tơ̆ tơring, sơnăm sơ̆, kơchơ săh Thạnh Phú đei man ‘nao hăm kơsô̆ jên hloh 1 ti hlj vă pơtăl ăn kơchơ so hlôi răm, tơgŭm ăn kon pơlei tĕch răt tơmam drăm ƀônh hiôk hloh. Ƀok Phú Việt Bền, Phŏ Kơdră Anih pơgơ̆r vei lăng kon pơlei săh Thạnh Phú tơroi, săh đei hloh 57% kon pơlei noh hơdrung Khmer, gơnơm đei asong ming man tơdrong kăl brư̆ brư̆ keh đang, tơdrong hơrih kon pơlei đei tơplih ƀiơ̆:  “Lăng atŭm kon pơlei lơ̆m tơring đei sa yua đơ̆ng tơdrong jang âu ‘noh chhôk lơ̆m jơhngơ̆m. Hăm tơring adoi chă tơroi pơtho kon pơlei adrin vei lăng tơnăp tơdrong ming man vă gơh yua đunh sơnăm hloh.  Lơ̆m khei năr truh hăm tơring adoi hơpơi ‘meh đei tơgŭm asong lơ tơdrong jang hloh đơ̆ng teh đak vă ƀônh hloh ăn kon pơlei pơm jang, tĕch pơdro adoi nhen hơtŏk tơdrong hơrih, đon bơnôh ăn kon pơlei gơh ‘lơ̆ng”

Ah hơtuch sơnăm sơ̆, hloh 200 unh hnam kon pơlei tơ̆ săh Liêu Tú, apŭng Trần Đề chơt hơ-iă ƀơ̆t đei man gơng Ta Ốc ataih truh 20m, să 3,4m hăm kơsô̆ jên asong hloh 1,3 ti hlj tơmơ̆t yua. Ƀok Tăng Rô Qui Sa, bơngai oei tơ̆ tơring tơroi, adrol ki, gơng âu so sĕch, gơng să 1m kơyua kon pơlei kơdih chă pơm, kơlih iĕ noh đe hơ-ioh năm hŏk ah pơyan ‘mi hơnơ̆ng ƀơm sar bar, kon pơlei chơ tơmam choh pơtăm adoi tơnap tap. Đơ̆ng mă gơng Ta Ốc keh đang, kon pơlei ƀônh ƀŏ hloh lơ̆m chă jang mŭk drăm: “Đơ̆ng rŏng teh đak man ăn gơng să hloh 3m âu ‘noh kon pơlei chơt hơ-iă dêh kơlih hăp ƀônh hiôk ăn kon pơlei adoi nhen ăn kon hơ-ioh năm hŏk tơ̆ trưng. Pơhlom hloh 200 unh hnam iŏk yua gơng âu noh kon pơlei xô̆ hơ̆k dêh”

Tơdrong tơchơ̆t jang kơ teh đak gah hơtŏk mŭk drăm – tơpôl tơring kon kông jing trong tơchơ̆t jang trŏ ƀlep đơ̆ng Đảng, Teh đak. Tơdrong hơkŏm 118 tơchơ̆t hăm 10 tơdrong jang, 14 tơdrong jang iĕ, 36 tơdrong tơchơ̆t jang tơm, lơ̆m noh đei lơ asong ming man tơdrong kăl pơyua ‘măn ăn tơdrong pơm jang păng hơrih sa tơ̆ tơring kon kông.

Ƀok Trần Khắc Trung, Phŏ Kơdră Anih jang gah Kon kông dêh char Sóc Trăng ăn tơbăt, dêh char hloh 35% ‘noh kon pơlei kon kông, lơ̆m noh hloh 30% hơdrung Khmer. Tơdrong tơlĕch jang hlôi tơgop hơtŏk tơdrong kăl ăn tơring, pơm trong hiôk ăn kon pơlei kon kông hơtŏk jang sa, hơtŏk tơdrong hơrih ăn kon pơlei tơring kon kông pơma atŭm păng kon pơlei Khmer pơma hơdrô̆.

Đơ̆ng sơnăm 2021- 2023, kơsô̆ jên asong ming man tơdrong kăl đei asog ăn dêh char hloh 267 tih hlj, lơ̆m noh jên mong Trung ương hloh 236 tih hlj. Jô̆ truh dang ei, dêh char hlôi asong ‘nao 113 tơdrong jang, man trong nơnăm tơ̆ tơring, kơchơ, hnam hơkŭm tơpôl..., hơmet ming hloh 50 tơdrong kăl ăn tơring kon kông tơnap tap. Ƀok  Trần Khắc Trung ăn tơbăt dơ̆ng: “Vei sơđơ̆ng pơyua kơjăp jên jang ming man tơdrong kăl yua noh dêh char gô pơtoi akŏm jang kiơ̆ tơchơ̆t trŏ ƀlep hăm jăl sơnăm đơ̆ng 2021-2025 hlôi tơlĕch, mă kăl noh tơdrong hơtŏk pơyua đơ̆ng lơ tơdrong tơchơ̆t jang kơ teh đak gah hơtŏk mŭk drăm – tơpôl tơring kon kông hăm dôm tơchơ̆t jang đơ̆ng teh đak gah pơjing tơring pơsĕl ‘nao, tơjur hin dơnuh kơjăp sơđơ̆ng, dôm tơdrong tơchơ̆t jang đei tơlĕch asong jang lơ̆m tơring teh kơ dêh char, mă kăl noh tơdrong hơvơn jên asong jang tơnăp đơ̆ng tơpôl”

Dêh char Sóc Trăng tơlĕch tơchơ̆t truh sơnăm 2025, mă kăl keh đang tơdrong ming man kăl pơyua vă hơtŏk mŭk drăm – tơpôl tơring kon kông vă pơm kiơ̆ ƀlep hơtŏk mŭk drăm – tơpôl, hơtŏk tơdrong hơrih ăn kon pơlei kon kông pơma atŭm păng kon pơlei Khmer pơma hơdrô̆.