Khei 2/2023, Ƀô̆ đô̆i vei lăng tơring sơlam teh đak kơ dêh char Cao Bằng hlôi jang jơnei tơdrong jang CB223p găh pơm glăi tĕch mơdro bơngai, bơngai răm ‘noh nge tam truh 1 khei. Khŭl lĭnh kơpal hlôi rôp vei Lê Thị Mỹ Lệ păng Phạm Thành Sinh (vang oei tơ̆ apŭng Krông Pắc, dêh char Đắk Lắk). Dôm bơngai ‘nâu đei rôp tom măt ƀơ̆t tŏk bŏk pơm glăi ba nge klĕch tơring sơlam (găh hơgăt teh kueng Tềnh Quốc, xăh Cần Nông, apŭng Hà Quảng). Khei 7/2023, Kŏng an dêh char Cao Bằng hơnơ̆ng chă rôp, jang jơnei tơdrong jang kơsô̆ 623M, dŏng iŏk 2 ‘nu hơdruh ‘noh bơngai răm đơ̆ng pơm glăi tĕch mơdro bơngai đơ̆ng Myanmar vih tơ̆ Việt Nam.

Tơroi găh tơdrong tĕch mơdro bơngai hlôi đei ƀôh tơ̆ tơring, mŏ Hứa Thị Thạch, Kơdră Khŭl vei lăng drŏ kăn xăh Cần Nông, thị trấn Thông Nông, apŭng Hà Quảng, dêh char Cao Bằng tơbăt: Xăh Cần Nông ‘noh jĭ xăh sơlam. Găh tơdrong tĕch mơdro bơngai klĕch tơring sơlam ‘noh oei đei ƀôh lơ̆m tơring, mă loi ‘noh jĭ lơ̆m dôm sơnăm âu ki kŭm hlôi đei ƀôh 1,2 ‘nu tơ̆ xăh, 1 ‘măng tơdrong ‘nao hloh ‘noh jĭ lơ̆m khei 2 sơnăm 2023 ‘noh 1 tơdrong nge drŏ nglo 16 năr đei khŭl tĕch mơdro chă lơ lăng păng đei tơchĕng vă ba nge năm tơ̆ Trung Quốc mă lei hlôi đei khŭl lĭnh kơpal chă ƀôh tơ̆ jrăng sơlam 614 xăh Cần Nông. Đơ̆ng rŏng kơ anih jang kơpal chă ƀôh păng rôp vei ‘noh kơdih kâu ĭnh ‘noh jĭ Kơdră Khŭl vei lăng drŏ kăn xăh, đơ̆ng rŏng kơ băt kơtơ̆ng ang kŭm hlôi kơtă năm vei lăng nge tơ̆ kơđông lĭnh vei lăng tơring sơlam păng krao hơvơn dôm ŭnh hnam đei kon iĕ tơgŭm ta lơ̆k păng tơgŭm đak toh đang kơ ‘noh krao hơvơn jên mong pơtrŭt hŏk kơ apŭng kŭm asong đei 2 triệu hlak jên vă răt đak toh ăn kơ nge, đơ̆ng rŏng ‘noh ĭnh ba nge năm pơjao ăn Hơnih vei lăng tơgŭm tơpôl dêh char vă hơnơ̆ng vei lăng păng rong ‘me  nge.

Vă tang găn kơloăi pơm glăi krê hơmơt ‘nâu, ‘ngoăih kơ tơdrong mơ̆t jang kơtang đơ̆ng khŭl lĭnh kơpal nhen Kŏng an, Ƀô̆ đô̆i vei lăng tơring sơlam, lơ̆m tơdrong bơ̆jang kiơ̆ dôm tơdrong jang 8 “Bơ̆jang kiơ̆ hơtŏ băl đơ̆ng drŏ nglo hăm drŏ kăn păng hơmet pơ ‘lơ̆ng dôm tơdrong kăl hăm drŏ kăn păng hơioh”, Khŭl vei lăng drŏ kăn dêh char Cao Bằng hlôi đei lơ tơdrong jang tơroi tơbăt hơgei păng đei yua.

Mŏ Hứa Thị Thạch, Kơdră Khŭl vei lăng drŏ kăn xăh Cần Nông roi tơbăt dơ̆ng: Lơ̆m tơdrong hlôh vao đơ̆ng kon pơlei tơring ‘nâu, ‘noh tơdrong tĕch mơdro kon hơ ‘lơ̆p vă năm tơ̆ păih to rơring sơlam vă jang thuê, vă chă klo teh đak đe... ‘noh sư kŭm tôch kơ hơmơt păng kŭm tŏk bŏk oei đei ƀôh. Nhôn tơroi tơbăt tơ̆ tơring ‘noh hơnơ̆ng tơroi tơbăt truh mih ma duch nă kon pơlei, truh bơngai đei hơmơt tĕch bơngai ‘noh nhôn athei tơblang hơdăh găh dôm tơdrong pơm glăi mưh bơ̆jang tĕch mơdro bơngai păng kŭm hơtŏk ‘lơ̆ng đon hlôh vao dơ̆ng ‘noh jĭ tơdrong jang tơnăp đơ̆ng tơpôl lơ̆m tơdrong tơroi, tơkêng, dôm kơ loăi pơm glăi ƀơ̆t mă bơ̆n ‘noh kon pơlei tơring sơlam mă bơ̆n chă ƀôh dôm bơngai hlĭch mă ƀôh tơdrong thoi noh ‘noh athei roi tơbăt hloi hăm khŭl kơdră dăh mă khŭl lĭnh kơpal vă hơmet pơ ‘lơ̆ng tơtom.

Kiơ̆ kơ mŏ Hoàng Trang Định, Kơdră Khŭl vei lăng drŏ kăn thị trấn Thông Nông, apŭng Hà Quảng, hăm hơnăp jang ‘noh jĭ bơngai tơroi tơbăt, krao hơvơn păng tơgŭm drŏ kăn, hơioh đei tĕch mơdro vih hơ lơ̆k hăm tơpôl, 1 ‘nu bơngai drŏ kăn jang lơ̆m khŭl jing 1 ‘nu bơngai tơroi tơbăt tơ̆ tơring. Tơdrong ‘nâu gô tơgŭm bơngai jang tơdrong jang tơroi tơbăt krao hơvơn tơ̆ tơring pơih să tơroi tơbăt truh grŭp drŏ kăn kăl kơ tơgŭm: Găh tơdrong jang tơroi tơbăt tang găn tĕch mơdro bơngai ‘noh lơ̆m khei ‘năr âu ki kŭm đei kơdră đảng, khŭl kơdră tơring tôch kơ bơngơ̆t truh. Lơ̆m dôm sơnăm hơdrol ‘noh kŭm đei 1 ‘nu bơngai lơ̆m khŭl đei tĕch tơ̆ Trung Quốc. Đơ̆ng rŏng kơ vih hơlơ̆k tơ̆ tơring, buăl drŏ kăn jang lơ̆m khŭl âu kŭm kơ dơ̆ mơlâu, đơ̆ng rŏng ‘noh đei dôm khŭl tơpôl kŭm nhen rim kơdră Khŭl bơngơ̆t truh pơm tơdrong hiôk păng kơchăng băt hơdăh jơhngơ̆m đon tơchĕng ‘meh vă, pơma dơnuh ƀlep trong păng đei dôm nơ̆r pơlung ‘noh sư hŭt đei tơdrong kơ dơ̆ mơ lâu đơ̆ng kơdih păng ƀrư̆ ƀrư̆ mơ̆t oei hơdai lơ̆m tơpôl păng sư kŭm hlôi pơ̆n, nuih ƀiơ̆, kơchăng vang jang lơ̆m dôm khŭl grŭp tơ̆ tơring.

Khei ‘năr âu ki, Khŭl vei lăng drŏ kăn dêh char Cao Bằng lăng tơdrong tơroi tơbăt tang găn tĕch mơdro bơngai ‘noh jĭ 1 lơ̆m dôm tơdrong tơm lơ̆m jang kiơ̆ hơtŏ băl đơ̆ng drŏ nglo hăm drŏ kăn păng hơmet pơ ‘lơ̆ng dôm tơdrong kăl ƀơm truh drŏ kăn păng hơioh tơ̆ dêh char. Kiơ̆ kơ yă Nông Thị Tuyết, Kơdră Khŭl vei lăng drŏ kăn dêh char Cao Bằng, vă jang kiơ̆ jơnei dôm Tơdrong jang 8, mă loi ‘noh jĭ tơroi tơbăt tang găn tĕch mơdro bơngai athei đei trong gơh băt, pơgơ̆r jang kiơ̆ ‘nao lăng truh tơdrong hơgăt hơtŏk ‘lơ̆ng đei yua lơ̆m bơngai jang lơ̆m khŭl, drŏ kăn vă sut hŭt tơdrong lăng ưh kơ hơtŏ drŏ nglo hăm drŏ kăn, teh dong băl lơ̆m ŭnh hnam, tĕch mơdro drŏ kăn, hơioh.

Kŭm kiơ̆ Kơdră Khŭl vei lăng drŏ kăn dêh char Cao Bằng, khei ‘năr âu ki, Khŭl hlôi athei dôm grŭp tơroi tơbăt kăl kơ pơma hơdăh tơroi tơbăt găh krê hơmơt, hơlĕnh pơdăr, tơdrong răm đơ̆ng tĕch bơngai; tơdrong tơchơ̆t khôi luơ̆t sek phak pơm glăi tĕch mơdro bơngai păng trong hơmet pơ ‘lơ̆ng tơdrong mưh đei ƀôh tơdrong tĕch mơdro drŏ kăn, hơioh gô đei ƀôh lơ̆m yan âu; 1,2 tơdrong jang tơgŭm păng pơvih pơvăn đơ̆ng khŭl drŏ kăn rim tơring lơ̆m tơgŭm, vei lăng bơngai răm đei tĕch mơdro vih hơlơ̆k tơ̆ pơlei...

Dôm tơdrong jang tơroi tơbăt tơ̆ Cao Bằng ăn ƀôh tơdrong tơplih ‘nao, pơcheh hơgei đơ̆ng kang ƀô̆, bơngai jang lơ̆m khŭl drŏ kăn, grŭp tơroi tơbăt tơpôl lơ̆m tơdrong tang găn tĕch mơdro bơngai, vang tơgŭm pơjing hơnih sơđơ̆ng hiôk ăn drŏ kăn păng hơioh drŏ kăn.