Ăh 'Năr akŏm dôm bơngai tang măt păng kon pơlei thôn Đăk Tiêng Kơ Tu, xăh Đăk La, apŭng Đăk Hà, dêh char Kon Tum hlôi atŭm tơbăt tơdrong juăt jue nuih mơng kơ Măt trâ̆n tôh kuôk Việt Nam găn ga 92 xơnăm tơ-iung pơjing păng hơtŏk. Pơm kiơ̆ Tơdrong hơvơn “Tôm kon pơlei tơguăt pơjing tơring pơxĕl 'nao, tơring kơdrâ̆m gơh rơgei” păng Tơdrong hơvơn “Pơm tơplih đon kơchĕng trong pơm jang đơ̆ng kon pơlei kon kông, pơm ăn kon pơlei kon kông hơtŏk pơm jang klaih đơ̆ng hin dơnuh kơjăp xơđơ̆ng”, xơnăm âu ki, 147 unh hnam kon pơlei hăm jê̆ 1.000 măt bơngai, mă lơ noh kon pơlei Bahnar thôn Đăk Tiêng Kơ Tu hlôi hăt hot pơm jang, tơguăt tơguăl tơgŭm dih băl atŭm hơtŏk mŭk drăm hơmet tơdrong erih.

Dang ei tôm thôn oei pă 3 unh hnam hin dơnuh păng 9 unh hnam tơjê̆ hin dơnuh; 136 unh hnam đei xơkơ̆t jing unh hnam erih rơgei.

Tang măt ăn Khul Kơpal Đảng, Teh đak, Anih jang Trung ương Măt trâ̆n tôh kuôk Việt Nam Đăi tươ̆ng Phan Văn Giang, jang lơ̆m Anih tơm Chĭn trĭ, Phŏ Ƀĭ thư Anih Linh Trung ương, Ƀô̆ trưởng Anih tơm Linh thơ thâu, hmach bơnê kơ dôm tơdrong mă Kon pơlei thôn Đăk Tiêng Kơ Tu đei iŏk jơnei. Đăi tươ̆ng ră hơdăh: Tơguăt tơguăl jing trong pơkăp jang tih đơ̆ng Đảng păng Ƀok Hô vă chĕp vei jơhngơ̆m pran đơ̆ng tôm kon pơlei. Hlôi jing juăt, đơ̆ng lơ xơnăm kơ âu tơdrong pơgơ̆r 'Năr akŏm tơguăt tơguăl tôm kon pơlei tơ̆ dôm tơring oei xa ƀơ̆t tơbăt 'Năr juăt jue tơ-iung pơjing Măt trâ̆n Kon pơlei rơngei hiôk hian Việt Nam hlôi jing um ai juăt jue 'lơ̆ng rŏ, hơ 'nhăk tơdrong jang măt trâ̆n truh hăm tơring kon pơlei, truh hăm rim unh hnam păng rim 'nu kon pơlei. 'Năr akŏm Tơguăt tơguăl kon pơlei xơnăm âu roi kăp gĭt hloh đơ̆ng rŏng hloh 2 xơnăm ƀơm răm đơ̆ng pơrang jĭ  COVID-19, chŏng mă hăm tơdrong pơgơ̆r đơ̆ng Đảng, Khul kơpal teh đak, tơdrong vang jang đơ̆ng tôm anih jang chĭn trĭ păng tơdrong atŭm jơhngơ̆m đơ̆ng tôm kon pơlei, teh đak hlôi đei iŏk jơnei tih tên lơ̆m tôm tơdrong jang.

Hăm xơnong jang khei năr truh Đăi tươ̆ng Phan Văn Giang, Ƀô̆ trưởng Anih tơm Linh pơkăl dêh char Kon Tum, apŭng Đăk Hà păng kon pơlei thôn Đăk Tiêng Kơ Tu pơtoi chĕp vei đon bơnôh tơguăt tơguăl pơm jang đei jơnei dôm tơchơ̆t hơtŏk tơ-iung mă Đảng, Khul kơpal teh đak hlôi tơlĕch: “Kơchăng jang hơdăh păng tơlĕch jang đei jơnei Tơchơ̆t 19 găh choh jang xa, kon pơlei jang mir păng tơring pơxĕl truh xơnăm 2030 păng xơkơ̆t truh xơnăm 2045. Tơchơ̆t 23 đơ̆ng Anih tơm Chĭn trĭ găh hơtŏk mŭk drăm tơpôl vei xơđơ̆ng tơpôl lơ̆m tơring Tây Nguyên xơkơ̆t truh xơnăm 2045. Pơgơ̆r tơnăp dôm tơdrong pơlong jang băt 'mêm kơ teh đak đơ̆ng Kon pơlei. Hơlêm, hơvơn dôm bơngai jang rơgei, dôm anih jang, tơ 'ngla bơngai jang rơgei pơjing tơdrong pơlong 'nao. Hăt hot vang pơ 'lơ̆ng Đảng, pơjing jơnŭm pơgơ̆r, pơjing dôm anih jang chĭn trĭ, tơpôl hlăng 'lơ̆ng pran kơjăp. Tơlĕch jang tơnăp Tơdrong hơvơn Tôm kon pơlei tơguăt pơjing tơring pơxĕl 'nao, tơring kơdrâ̆m gơh rơgei”.

Ƀơ̆t vih akŏm 'Năr tơguăt tơguăl tôm kon pơlei hăm kon pơlei thôn Đăk Tiêng Kơ Tu, tang măt ăn Kơdră Đảng, Khul Kơpal teh đak, Anih jang Trung ương Măt trâ̆n tôh kuôk Việt Nam, Đăi tươ̆ng Phan Văn Giang, jang lơ̆m Anih tơm Chĭn trĭ, Ƀô̆ trưởng Anih tơm linh pôk axong 100 tŏ hnam tơguăt tơguăl ăn Kon pơlei kon kông dêh char Kon Tum hăm kơjă 5 tih hlj. Đăi tươ̆ng atŭm hăm Khul kơpal kơ Anih jang Trung ương Măt trâ̆n tôh kuôk Việt Nam păng dêh char Kon Tum duh hlôi axong tơmam ăn jê̆ 100 unh hnam mă teh đak tơchơ̆t tơgŭm păng unh hnam hin dơnuh kơ xăh Đăk La.

Adoi lơ̆m 'măng pơm jang tơ̆ dêh char Kon Tum ƀơ̆t 'măng âu, Đăi tươ̆ng  Phan Văn Giang – jang lơ̆m Anih tơm Chĭn trĭ, Ƀô̆ trưởng Anih tơm Linh truh apong, bơ̆ jang tơ̆ Sư đoan 10, Kuân đoan 3. Năm tơmang păng hơlen tơdrong jang pơhrăm linh tơ̆ dôm anih jang linh, Ƀô̆ trưởng Phan Văn Giang hlôi hơvơn kang ƀô̆ linh, mă hăt noh đe linh kon kông, kăl yak hloh rim tơdrong tơnap tap, hơtŏk tơdrong tơguăt tơguăl, kơchăng pơhrăm pơtâ̆p, vă hơlen iŏk yua phao kơtuang kơmăi kơmŏk 'nao.

Đăi tươ̆ng Phan Văn Giang pơkăl kơdră kơ dôm anih linh kăl pơm kiơ̆ tơnăp tơdrong pơtâ̆p pơhrăm tơjră kơnê̆, pơm kiơ̆ tơnăp xơnong jang linh, vei xơđơ̆ng tơpôl tơring Tây Nguyên. Đăi tươ̆ng Phan Văn Giang pơkăl, khei năr truh, rim anih linh kơ sư đoan 10 kăl jang hadoi kơjăp hăm dôm jăl pơgơ̆r păng dôm khul linh tơ̆ tơring vă băt hơdăh tơdrong đei ƀôh tơ̆ tơring, jang tơnăp tơdrong hơvơn kon pơlei vang jang tơgŭm kon pơlei hơtŏk mŭk drăm, tơjur hin dơnuh, pơjing anih jang chĭn trĭ tơ̆ tơring kơjăp kơtang.