VOV4.Bahnar - Tơ̆ Hà Nội ‘nao pơ gơ̆r Hop akŏm trong jang tơ gŭm kơ teh đak hăm hơ druh tơ dăm, hăm hơ năn “ Pơ tho pơ hrăm tơ drong jang ăn hơ druh tơ dăm”. Hop akŏm vă hơ len lăng tơ drong, pơ truh tơ drong yan âu ăn Anih jang kơ Kuôk hô̆i apĭnh Kuôk hô̆i, Khŭl kơ dră teh đak dôm trong jang tơ gŭm pơ tho tơ drong jang ăn hơ druh tơ dăm lăp hăm tơ drong ‘nao. Pơ ma tơ̆ hop akŏm, Phŏ kơ dră chĕp kơ̆l Kuôk hô̆i Trần Thanh Mẫn athei: kiơ̆ lơ̆m tơ drong tơ lĕch đơ̆ng hơ druh tơ dăm, rim anih jang tơ chĕng hơ len, apĭnh hăm Kuôk hô̆i, Khŭl kơ dră teh đak tơ lĕch ăn dôm trong jang tơ tom hơ met pơ ‘lơ̆ng mơ mat tat, dôm trong jang tơ gŭm ‘lơ̆ng vă tŭn pran pơ tho pơ hrăm tơ drong jang ăn hơ druh tơ dăm, tơ klep hăm tơ drong jang tơ iung ming păng hơ tŏk tơ iung mŭk drăm - tơ pôl kơ teh đak.

Tơ̆ hop akŏm, hơ druh tơ dăm tơ roi tơ drong hơ pơi ‘meh vă, apĭnh hăm dôm anih jang teh đak găh tơ drong jang pơ tho pơ hrăm tơ drong jang ăn hơ druh tơ dăm. Đơ̆ng noh tơ gŭm anih jang kơ pal băt hơ dăh păng hơ met pơ ‘lơ̆ng, tơ gop hơ tŏk ‘lơ̆ng đon hlôh vao đơ̆ng hơ druh tơ dăm păng đĭ đăng lơ̆m tơ pôl găh trong jang tơ gŭm pơ tho pơ hrăm tơ drong jang. ‘Nhŏng Nguyễn Tường Lâm, Bí thư Trung ương Đoàn hơ druh tơ dăm Cộng sản Hồ Chí Minh tơ băt lơ grŭp hơ druh tơ dăm tơ lĕch ăn dôm tơ gop apĭnh đơ̆ng yan âu lơ̆m kơ plăh pơ tho pơ hrăm tơ drong jang ăn hơ druh tơ dăm, tơ chă tơ drong jang đei yua đơ̆ng kơ hŏk đang tơ drong jang:

       “Nhôn rơ̆ih iŏk 150 ‘nu buăl hơ druh tơ dăm lơ̆m noh đei hloi hơ druh tơ dăm đei ‘meh vă tơ drong jang, dôm bơ ngai hơ druh tơ dăm nhen hơ druh tơ dăm kŏng nhân, hơ druh tơ dăm tơ ring tơ rang, ƀô̆ đô̆i lĕch đơ̆ng pơm lĭnh, hơ druh tơ dăm rim tơ ring, hơ dai hăm ‘noh nhôn đei hơ vơn truh dôm bơ ngai iŏk yua bơ ngai jang, hơ druh tơ dăm tơ iung tơ drong jang sa kơ tă pơ jing tơ drong jang hơ druh tơ dăm pơm tơ drong jang ăn hơ druh tơ dăm nai... dang ei dôm buăl kŭm hlôi đei tơ drong hơ met ăn dôm nơ̆r tơ gop apĭnh”.

            Đe đoàn viên, hơ druh tơ dăm kŭm hlôi tơ roi dôm tơ drong mơ mat tat, tơ hlăk tơ hlĭn lơ̆m pơ tho pơ hrăm tơ drong jang păng tơ chă tơ drong jang đơ̆ng rŏng kơ hŏk đang tơ drong jang ăn hơ druh tơ dăm tơ ring tơ rang, hơ druh tơ dăm kon kông, hơ druh tơ dăm jo jăn, hơ druh tơ dăm ‘noh ƀrŏk đơ̆ng pơm ƀô̆ đô̆i. Apĭnh tơ lĕch dôm trong jang tơ gŭm pơm tơ drong hiôk ăn hơ druh tơ dăm tơ chă tơ drong jang păng đei pơ tho pơ hrăm lăp hăm tơ drong gơh jang đơ̆ng kơ dih.

Hop akŏm tơ roi tơ băt hăm khŭl chih kơ tơ̆ng ang hơ drol kơ pơ gơ̆r hop akŏm trong jang tơ gŭm kơ teh đak găh hơ druh tơ dăm Việt Nam

         Kơ tă tơ̆l nơ̆r apĭnh bơ ngơ̆t đơ̆ng hơ druh tơ dăm găh tơ drong jang pơ tho pơ hrăm tơ drong jang kơ măy kơ mŏk ‘nao. Ƀok Trương Anh Dũng, Kơ dră Anih jang, anih vei lăng pơ tho pơ hrăm tơ drong jang ( Anih tơm vei lăng găh bơ ngai jang, lĭnh jĭ rơ ka păng tơ pôl) tơ băt: Dang ei khŭl kơ dră teh đak hlôi đei chĕng hơ met teh pơm dôm hnam trưng ‘lơ̆ng. Tơ chĕng hơ drol, sơ năm 2025 đei 70 hnam trưng ‘lơ̆ng, 135 tơ drong jang tơm tơ̆ rim jăl, lơ̆m noh akŏm dôm tơ drong jang ƀơm truh kơ măy kơ mŏk ‘nao. Âu ki, Anih tơm hlôi jang tơ gŭm păng Khŭl kơ dră teh đak hlôi ăn phep pơ jao dôm tơ drong jang pơ tho pơ hrăm đơ̆ng dôm teh đak pơ drŏng vă pơ tho pơ hrăm, asong ƀăng hŏk đang. Dang ei tŏk bŏk tơ lĕch jang 12 tơ drong jang pơ long lăng đơ̆ng Austraila, păng 25 tơ drong jang pơ long lăng đơ̆ng Đức. Khŭl kơ dră teh đak păng Thủ tướng teh đak hlôi đei trong jang tơ gŭm tơ ƀôh trong păng roi tơ ƀôh tơ drong jang ăn kơ hŏk tro, sinh viên lăp đơ̆ng rŏng tôt ngiêp dôm jăl hŏk. Dang ei hlôi đei rơ̆ih hnam trưng rơ̆ih tơ drong jang păng anih pơ tho pơ hrăm, roi tơ ƀôh, video pơ tho tơ drong jang mă hơ dăh:

“Tơ chơ̆t hăm tơ drong jang đei ‘meh vă tih rim anih pơ tho pơ hrăm gơh pơ jing tơ drong jang, ăn phep pơ tho pơ hrăm pơ long lăng. Hơ dai hăm ‘noh, Khŭl kơ dră ‘nao kĭ ăn tơ drong jang găh tơ plih kơ sô̆ lơ̆m pơ tho pơ hrăm tơ drong jang, 4 tơ drong hơ găt tơ lĕch ăn lơ̆m tơ drong jang gô đei tơ lĕch jang tơ̆ hơ năp kơnh ƀơm truh hơ met ăn tơ drong băt kơ sô̆, ming man anih hŏk pơ hrăm, tơ mam hŏk pơ hrăm”.

        Kiơ̆ lơ̆m dôm nơ̆r apĭnh, tơ lĕch đơ̆ng hơ druh tơ dăm tơ̆ hopa kŏm, Phŏ kơ dră chĕp kơ̆l Kuôk hô̆i Trần Thanh Mẫn athei rim anih jang kơ Kuôk hô̆i, Khŭl kơ dră teh đak, rim anih tơm, anih jang Trung ương, tơ ring tơ chĕng hơ len păng đei dôm trong jang đei yua, pơ plih dôm đon tơ chĕng, nơ̆r pơ ma jing bơ̆ jang, vă hơ tŏk ‘lơ̆ng bơ ngai jang, pơ trŭt hơ tŏk mŭk drăm, tơ drong kĕ pơ jei kơ teh đak. Ƀok Trần Thanh Mẫn athei:

        “Anih jang joh ayŏ, pơ tho pơ hrăm kơ Kuôk hô̆i, Anih tơm vei lăng găh bơ ngai jang, lĭnh jĭ rơ ka păng tơ pôl păng Anih jang kơ teh đak găh Hơ druh tơ dăm Việt Nam hơ nơ̆ng jang hơ dai kơ jăp, tơ lĕch bơ̆ jang kiơ̆ mă ‘lơ̆ng păng dăr hơ len bơ̆ jang kiơ̆ găh pơ tho pơ hrăm tơ drong jang ăn hơ druh tơ dăm; hơ dai hăm tơ chĕng hơ len, tơ lĕch, apĭnh hăm Kuôk hô̆i, Khŭl kơ dră teh đak tơ lĕch ăn dôm trong jang tơ tom hơ met pơ ‘lơ̆ng mơ mat tat, dôm tơ drong jang tơ gŭm ‘lơ̆ng vă tŭn pran pơ tho pơ hrăm tơ drong jang ăn kơ hơ druh tơ dăm, tơ klep hăm tơ drong jang tơ iung ming păng hơ tŏk tơ iung mŭk drăm - tơ pôl kơ teh đak”.

        Tơ̆ hop akŏm, Phŏ Thủ tướng Vũ Đức Đam pơ ma hơ dăh, tang măt Anih tơm vei lăng găh bơ ngai jang hlôi kơ tă tơ̆l nơ̆r apĭnh đơ̆ng hơ druh tơ dăm, mă lei Anih tơm kăl kơ jang hơ dai hăm lơ anih jang ƀơm truh pơ ma dơ nuh chă trong tơ lĕch jang  lơ̆m yan âu. Phŏ Thủ tướng akhan, hăm hơ druh tơ dăm, ‘ngoăih kơ dôm tơ drong gơ̆h jang tơ drong jang ‘noh kăl kơ pơ tho pơ hrăm dơ̆ng tơ drong gơh jang ‘lơ̆ng vă hơ druh tơ dăm gơh vang tơ gop ăn tơ pôl lơ hloh dơ̆ng.

Thuem: Tơ blơ̆