Tơbăt tơ̆ Hop akŏm Kuô̆k hô̆i tơdra hơdrol 6 khei blŭng sơnăm, tŏk GDP kơ Việt Nam hơmet hơ iă, jơnei 5,8%. Rim kơdră tang măt akhan, 6 khei blŭng sơnăm mă đơ̆ng oei tơnap tap, mă lei tơdrong hơmŏ iŏk đei tŏk GDP pơđĭ sơnăm 2024 iŏk đei 65%, gơnơm đei dôm tơdrong tơgŭm ‘noh atŏk kơtang tơlĕch kon jên jang teh đak, tơdrong jang mơdro sa păng tĕch mơdro tơ̆ teh đak đe hơnơ̆ng hơmet pơ ‘lơ̆ng, mă kăl ‘noh rim trong jang tơgŭm djru, hơmet pơ ‘lơ̆ng tơnap tap ăn tơdrong jang mŭk drăm hơnơ̆ng đei Khul kơdră teh đak pơrô̆ jang kiơ̆ kơtang. 

Vă iŏk đei tŏk mŭk drăm 65% sơnăm 2024, mĭnh ƀar nơ̆r tơgop đơ̆ng kơdră tang măt Kuô̆k hô̆i akhan, kăl hơnơ̆ng tơlĕch jang hơdrol găh tơdrong tơm lơ̆m sơnăm pơtrŭt kơtang; atŏk kơtang tơlĕch kon jên teh đak tơmơ̆t jang trŏ ƀlep, mă kăl rim tơdrong vă jang trong nơnăm. Bơngai tang măt Trần Hoàng Ngân, khul pơlei tơm Hồ Chí Minh akhan: “Bơ̆n iung jang chinh trĭ kơtang, lui kơjăp sơnăm ou bơ̆n gô iŏk đei jơnei 65%. Bơ̆n hơnơ̆ng tơlĕch rim trong jang đơ̆ng blŭng sơnăm ‘noh 12 tơdrong jang tơm, lơ̆m ou đei 3 Trong jang kăl hloh. Mă blŭng ‘noh atŏk kơtang pơjao jang, gơ̆h jang ăn rim tơring vă tơlĕch jang kiơ̆ ‘lơ̆ng kơ tơring. Mă ƀar ‘noh atŏk kơtang găh trong hnam, bơ̆n hlôi jang kiơ̆ trong jang jên hu tơgŭm ăn hơmet pơ ‘lơ̆ng păng atŏk tơ iung mŭk drăm, atŏk lơ kon jên teh đak tơmơ̆t jang pơm trong nơnăm”.

Khul kơdră Teh đak tơlĕch rim trong jang, tơdrong jang kăl, lơ̆m ou, tơdrong jang kăl hloh ‘noh akŏm pơm keh đang tơdrong tơchơ̆t, khôi luơ̆t, trong jang tơgum djru hơmet pơ ‘lơ̆ng tơnap tap, tơhlăk tơhlĭn ăn hơnih mơdro sa hơmet pơ ‘lơ̆ng khul jang ăn pơtrŭt atŏk kơtang mŭk drăm-tơpôl. Bơngai tang măt Nguyễn Chu Hồi, Khul pơlei tơm Hải Phòng akhan, trong tơlĕch jang tŏk GDP ‘noh jĭ tôch trŏ lăp kĕ iŏk đei:“Mĭnh ‘noh oei kăl sơđơ̆ng mŭk drăm. Mă ƀar ‘noh ‘moi kiơ̆ yan ou kơ ƀar jăl blŭng sơnăm, mă đơ̆ng bơ̆n jei tơƀơ̆p tơnap tap mă lei pơrô̆ tơlĕch kơtang; lơ̆m khei năr hrei ou ‘noh kăl hloh dơ̆ng, tơdrong drơ̆ng lăp mĭnh đon đơ̆ng Trung ương truh tơ̆ tơring vang iung jang, kăl jang kiơ̆ dôm tơdrong hơdăh iŏk đei jơnei tơ̆ rim tơring, ƀơ̆t dŏh kơnh bơ̆n mă đei iŏk jơnei ‘lơ̆ng hơ iă pơ đĭ lơ̆m teh đak hloi”.

          Jei lơ̆m giĕng ou ki, Kuô̆k hô̆i hlôi mơ̆ng păng pơma dơnuh Hla bơar pơtruh đơ̆ng Khul kơdră teh đak găh kon jên khei đơ̆ng 1 triu 800.000 hlak jên tŏk 2 triu 340.000 hlak jên lơm 1 khei iŏk đơ̆ng năr 1/7/2024; hơmet ming jên khei hưu, tơgŭm djru ƀao hiêm tơpôl, tơgŭm ăn dôm bơngai đei iŏk yua ăn teh đak păng tơgŭm tơpôl. Rim kơdră tang măt drơ̆ng nơ̆r hăm khul kơdră teh đak găh jang kiơ̆ hơmet kon jên khei đơ̆ng 1 triu 800.000 hlak jên lơm 1 khei tŏk 2 triu 340.000 hlak jên lơ̆m 1 khei, akhan ‘nou jĭ tơdrong tŏk tôch trŏ lăp lơ̆m trong jang hơmet ming jên khei, tơgop pơm sơđơ̆ng hơrih sa ăn bơngai đei sa jên khei, pơjing hơyak pran ăn bơ̆ jang ‘lơ̆ng. Bơngai tang măt Trần Văn Lâm, khul Bắc Giang akhan:“Tŏk jên khei rŏ năng akŏp kon jên ăn jang kiơ̆ hơmet pơ ‘lơ̆ng jên khei ‘noh dang hloh 900.000 ti hlak jên. Iŏk kon jên ou vă hơtŏk jên khei jei pơm ăn sa jên khei lơ ‘noh đĭ đăng rim bơngai jei đei tŏk jên khei ngăl, gô pơjing ăn tơdrong chhôk hơ iă hloh”.

Mĭnh ƀar nơ̆r tơgop athei Khul kơdră teh đak lăng ba rim trong jang vei lăng sơđơ̆ng tơlĕch jang kiơ̆ lơ̆m đunh đai păng iŏk đei jơnei kơ kon jên bơ̆ jang teh đak; atŏk kơtang jang kiơ̆ trong jang dăr lăng, vei lăng kơjă păng rim trong jang tang găn kơjă tŏk jur lăp đơ̆ng rŏng tŏk kon jên khei. Bơngai tang măt Lê Minh Nam, Khul Hậu Giang athei: "Bơ̆n kăl đei trong jang pơm sơđơ̆ng pơm dă ƀiơ̆ đei tơdrong ưh kơlăp, mă kăl, pơm lơ liơ dă ƀiơ̆ đei lơ̆m mă tŏk jên khei mă lei kơjă tơmam drăm jei tŏk măt, ƀônh pơm ăn dôm bơngai đei sa jên khei lao đon. ‘Moi kiơ̆ đơ̆ng noh apĭnh Khul kơdră Teh đak lăng hơlen dôm tơdrong đei ƀơm truh nhen rim ‘măng tŏk jên khei hơdrol hlôi đei ƀơm kơnê̆ truh tơdrong ưh kơ ‘lơ̆ng, đei ƀơm truh tơdrong tŏk kơjă tơmam drăm. Mư̆h tŏk jên khei jei pơm ăn atŏk lơ kon jên răt sa, đei ƀơm truh tơdrong tŏk jur kơjă kăl lăng hơmet lăng hơlen truh dôm tơdrong đei pơm ăn truh kơjă tơmam drăm tơm”.