Xăh Ea Tiêu (apŭng Cư Kuin, dêh char Đắk Lắk) dang ei đei vă jê̆ 5.400 unh hnam găh 18 hơdrĕch hơdrung, arih xa tơ̆ 21 pơlei. Lơ̆m nŏh, bơngai kon kông đei văjê̆ 40%. Lơ̆m dôm sơnăm âu ki, bơngai tơnuh lơ̆m xăh đei tơgŭm 175 tŏ hnam kiơ̆ tơdrong Tơchơ̆t 167 đơ̆ng Khul kơdră tĕh đak, hăm kơsô̆ jên truh 6,9 ti; 72 tŏ rơmo yŏng; man 4 tŏ hnam tơgŭm ăn bơngai pơmat tat.

Chĕp vei tơdrong juăt mât mĭnh ƀơ̆r đon, kon pơlei lơ̆m xăh adrin jang xa, atŏk tơiung mŭk drăm, vang pơjing tơring tơrang ‘nao. Gơnơm thoi nŏh, truh dang ei um ai tơring tơrang đei tơplih ‘lơ̆ng hơiă, hlŏh 98,6% kơsô̆ unh hnam lơ̆m xăh đei man kơjăp ‘lơ̆ng, 98% kơsô̆ unh hnam đei gre hon đa, hlŏh 90% unh hnam đei yoa đak rơgŏh ‘lơ̆ng, 100% unh hnam đei unh điên sơđơ̆ng ‘lơ̆ng. Xăh đei hlŏh 4.000 unh hnam đei năng jĭ unh hnam arih xa ‘lơ̆ng rơgei, 18 pơlei pơla arih xa ‘lơ̆ng. Dôm tơdrong juăt ‘lơ̆ng đơ̆ng sơ̆ lơ̆m tơpôl đei chĕp vei kơjăp nhen: tơdrong tôn chĭng, tanh brai, vai khăn.

Tơ̆ năr âu, lơ̆m jơva chĭng chêng tôn djrơ djrĭng păr ang păng tơdrong hơxoang pơsưt tôch hơiă, dôm bơngai tang măt chă pơđou dơ̆ng dôm tơdrong jang đơ̆ng sơ̆ đơ̆ng Mặt trận tổ quốc Việt Nam, chă et ngôi tơdrô ge păng vang ngôi pơchơt nhen: thi pĕh ƀa, chô̆ măt tôn chĭng, pơplŏng ƀao tă păng dui băl. Đei măt đơ̆ng hrôih tơ̆ anih pơgơ̆r, yă H’Bel Knul, tơ̆ plei Kram, xăh Ea Tiêu tơroi: năr pơchơt jĭ năr vă kon pơlei tơ̆ pơlei pơla lơ̆m xăh  tơƀâp băl, pơma nuh păng thi dôm tơdrong tơplŏng kơdâu so sơ̆, pơjing đei jơhngâm đon hưch hanh, čhôk ‘nă: “Năr pơchơt vă rim kon pơlei vang akŏm, truh ngôi pơchơt, tôch hơiă. Dôm tơdrong jang ngôi pơchơt đơ̆ng kră sơ̆ kơ kon pơlei nhôn, nhen hơri hơxoang, tôn chĭng, dui băl hăm tơlei, pơplŏng hăm ƀao tă, pĕh ƀa inh vang akŏm ngăl”.

Kiơ̆ ƀok Chu Thanh Tấn, Kơdră Anih Mặt trận tổ quốc Việt Nam apŭng Cư Kuin, Năr tơguăt đĭ đăng hơdrĕch hơdrung đĭ jing tơdrong jang đei pơgơ̆r hơnơ̆ng lơ̆m khei 11 rim sơnăm tơ̆ tơring. Qua đó góp phần củng cố tốt hơn mối quan hệ tốt đẹp giữa các địa bàn dân cư. Lơ̆m năr âu, rim pơlei pơla chă pơgơ̆r lơ tơdrong pơchơt ăn tơpôl păng mong akŏm bơ̆n kon jên, tơmam vă tơgŭm ăn dôm bơngai pơmat tat, ưh pŭn ai: “Pơtêng hăm rim sơnăm ‘nŏh tơdrong pơgơ̆r năr pơchơt roi đunh roi hơiă ƀiơ̆, đei lơ pơlei vang pơgơ̆r ƀiơ̆, tơdrong pơgơ̆r kŭm roi tih ƀiơ̆. Kon pơlei truh akŏm tôch lơ, đei tơdrong vang akŏm, mât hơdai ƀơ̆r đon đơ̆ng dôm hơdrĕch hơdrung arih xa păng bơ̆ jang lơ̆m apŭng, bơngai vang akŏm truh ngôi pơchơt roi lơ păng đei lơ tơdrong jang hue lăng truh tơdrong vei sơđơ̆ng tơdrong arih xa tơpôl đơ̆ng dôm anih jang kơpal ‘năi”.

Vang truh hăm năr ‘nâu, ƀok Bùi Văn Cường, Tổng thư ký, Kơdră Anih pơvih ăn Quốc hội tơchĕng ‘lơ̆ng dôm tơdrong jơnei mă khul kơdră pơgơ̆r păng kon pơlei xăh Ea Tiêu jang đei khei ‘năr âu ki. Tơƀôh đon lui păng hơpơi ‘mĕh kon pơlei hơnơ̆ng mât 1 ƀơ̆r đon, lui kiơ̆ tơdrong chĕp kơ̆l pơgơ̆r đơ̆ng Đảng păng teh đak, hơtŏk đon kơchăng, phă hŭt rim tơdrong hơlinh pơdăr, pơm che re hơdrĕch hơdrung. ‘Nâu jĭ tơdrong đei ƀôh tôch hơiă păng pôk pơ ư jơhngâm đon čhôk ‘nă đơ̆ng Năr tơguăt đĭ đăng hơdrĕch hơdrung lơ̆m tơdrong arih xa tơpôl. “Hăm ƀĕnh jơhngâm đon chơt hơiă đơ̆ng lơ kon pơlei dôm hơdrĕch kon kông Việt Nam bơ̆n, hăm 1 jơhngâm đon pơvei băl tôch ‘lơ̆ng, mă kăl hăm apŭng Cư Kuin, 1 apŭng ‘nao đei tơdrong ưh hơiă lơ̆m ‘năr 11/6. Yoa thoi nŏh mă tơdrong pơgơ̆r păng jơhngâm đon čhôk ‘nă đơ̆ng kon pơlei roi đei yoa hlŏh dơ̆ng, kiơ̆ đơ̆ng noh roi hơmet kơjăp tơdrong pơvei, mât 1 ƀơ̆r đon đơ̆ng đĭ đăng hơdrĕch hơdrung”.

Ƀlep ƀât ‘măng mă âu, ƀok Bùi Văn Cường păng ƀok Y Thanh Hà Niê Kđăm hơpăh jên man hnam hôp ăn thôn 10 xăh Ea Tiêu păng thôn 2 xăh Cư Êwi, 1 pôm hnam hôp đei kơjă 300 triu hlak jên; hơpăh tơmam ăn dôm pơlei, unh hnam đei kŏng, bơngai đei bưng ai, đei grih tơ̆ apŭng Cư Kuin. Anih MTTQ Việt Nam apŭng Cư Kuin oei pơjao jên man 9 tŏ hnam tơgŭm ăn dôm unh hnam pơmat tat tơ̆ dôm xăh hai.

Tơdrong pơgơ̆r Năr tơguăt đĭ đăng hơdrĕch hơdrung tơ̆ dôm tơring kon pơlei oei xa đĭ jing tơdrong juăt tôch ‘lơ̆ng, hơnhăk tơdrong jang Mặt trận truh hăm tơpôl kon pơlei, hue lăng truh rim unh hnam păng rim bơngai. Tơdrong tơm đơ̆ng năr âu ‘nŏh vă pơjing, hơmet kơjăp păng tưk tơiung tơdrong pơm tơm đơ̆ng kon pơlei; hơtŏk jơhngâm pran đơ̆ng tơguăt đĭ đăng hơdrĕch hơdrung păng hơtŏk hơnăp jang đơ̆ng Mặt trận Tổ quốc Việt Nam lơ̆m chăl ‘nao.