‘Nau ‘măng tơgŭm djru ‘măng mă 2 sơnăm 2023 kơ Hơnih mong jên Công đoàn. Hơnih tơm vei lăng Tơdrong jang hlôi pơjing Tơdrong tơchơ̆t hơnơ̆ng tơlĕch tơnô̆ tơgŭm djru đoàn viên, bơngai jang kơjă kơjên 145 ti hlak jên.

Mă hơdăh, bơngai jang pơm tơjur jơ jang lơ̆m năr, ăn jang tŏ sĕt năr lơ̆m giĕng dăh mă lơ̆m khei; pơdơ̆h ăn jang đơ̆ng 14 năr năm tơ̆ đunh găh tơdrong jang sa iŏk đei tŏ sĕt hloh kon jên khei pơkăp dih băl lei đei tơgŭm ăn 1 triu hlak jên. Bơngai ăn pơdơ̆h jang ‘mơ̆i, pơdơ̆h jang hloi ưh kơ sa jên khei đơ̆ng 30 năr năm tơ̆ đunh ‘nŏh gô tơgŭm ăn 2 triu hlak jên. Bơngai jang hiong tơdrong jang mă lei ưh kơ đei tôm tơdrong pơkăp gơ̆h sơng iŏk tơdrong tơgŭm djru hiong tơdrong jang lei tơgŭm ăn 3 triu hlak jên. Tơdrong tơchơ̆t au ưh kơ đei pơlăp hăm bơngai pơrơ̆ng pơdơ̆h kơ dih pơm glăi hăm khôi luơ̆t, bơngai pơm glăi hơnih jang tơlĕch, jang pơlong năng ưh kơ gan gơ̆h dăh mă mĭnh pang hŭt tơdrong drơ̆ng mĭnh nơ̆r, bơngai đei sa jên khei pơdơ̆h jang, sơng iŏk kon jên tơgŭm kơ yuơ jang sa ưh kơkĕ rim khei. Tơdrong sơng iok hô sơ đei iung jang lơ̆m vă đĭ khei 8 truh đĭ khei 1/2023 păng pơtôch lơ̆m năr 31/1/2024. Hơdrin jang keh đang tơnô̆ tơgŭm djru klui hloh hơdrol năr 31/3/2024.