Mĕ Việt Nam nuih mơng Nguyễn Thị Khả tơ̆ plei La Bông, xăh Hoà Tiến, apŭng Hoà Vang, plt Đà Nẵng đei klo hăm kon drŏ nglo tơtă linh lôch tang ăn tĕh đak ngăl. Sơnăm 1968, klo yă ‘nŏh Võ Văn Cảnh, lôch tang ƀât oei bơ̆ jang tơ̆ apŭng Nông Sơn, dêh char Quảng Nam. Truh sơnăm 1978, kon drŏ nglo ‘nŏh Võ Văn Bình ƀât oei năm jang tơgŭm hlôi lôch tang tơ̆ kơdrăn tơblăh Campuchia. Sơnăm ‘nâu đĭ 84 sơnăm bơih, mĕ Nguyễn Thị Khả ƀât lăp ƀlŏk, ƀât lăp hiơt. Hơmet ăn Năr linh jĭ rơka, linh lôch tang tĕh đak (27/7 âu), đei anih chĕp kơ̆l đảng, khul kơdră pơgơ̆r tơring năm ngôi, mĕ Khả ƀôh tôch čhôk lơ̆m jơhngâm: “Klo, kon lôch đĭ kŭm sơ ‘ngon tơpă, mă lei gơnơm đei tĕh đak tơrĕk truh unh hnam kơna kŭm hiơt hiong ƀiơ̆ tơdrong ơh sơ ‘ngon. ‘Năr 27/7 rim sơnăm đei Khul drŏ kăn păng khul kơdră tơring truh ngôi, pơma nuh hăm mĕ. Ƀôh tĕh đak hơnơ̆ng pơngơ̆t truh unh hnam kơna inh hiôk jơhngâm ‘năi.”

Dôm năr ‘nâu, unh hnam ƀok Ngô Văn Hồng, tơ̆ xăh Hoà Bắc, apŭng Hoà Vang, plt Đà Nẵng tôch hơiă mưh đei tŏk oei lơ̆m hnam ‘nao. Sơnăm 1966, ƀok Hồng pơm du kich đei hơyăt prăh rơka. Dang ei jĭ linh jĭ rơka 4/4. Tơdrong arih xa tôch pơmat tat, unh hnam tam đei lai yơ tơchĕng truh man hnam oei. Ƀât blŭng sơnăm ‘nâu, ƀok Ngô Văn Hồng đei Khul kơdră pơgơ̆r plt Đà Năng tơgŭm 60 triu, ƀok chă tŏk iŏk dơ̆ng jên man đei hnam kơjăp ‘lơ̆ng: “Inh ‘nŏh linh jĭ rơka, đei tĕh đak tơgŭm jên rim khei. Brei drou tĕh đak tơgŭm jên pơm hnam, inh ƀôh čhôk ‘nă dêh, đơ̆ng âu năm tơ̆ hơnăp kơnh ưh pă hli ‘mi kial kiơ bơih.” 

Plt Đà Nẵng dang ei đei hlŏh 100.000 ‘nu bơngai đei kŏng hăm kăch mang. Đơ̆ng jên Trung ương, jên plt, jên đơ̆ng dôm bơngai đei jơhngâm đon ‘lơ̆ng, đơ̆ng anih tĕch mơdro vang tơgop, truh dang ei, plt đĭ man ‘nao păng pơm hơmet hlŏh 10 rơbâu tŏ hnam ăn bơngai đei kŏng, akŏm đĭ đăng kơsô̆ jên vă jê̆ 330 ti.

Ƀok Lê Văn Minh, Phŏ Kơdră Anih vei lăng bơngai jang xa, linh jĭ rơka păng tơpôl plt Đà Nẵng tơroi: adrol sơ̆, kơsô̆ jên tơgŭm man hnam ăn bơngai đei kŏng đơ̆ng 30 triu truh 40 triu 'nŏh dang ei tŏk truh 60 triu 1 pôm hnam, đei hnam đei tơgŭm truh 100 triu, man đei hnam kơjăp 'lơ̆ng, huei pă hli 'mi kial hơbŭt: “Tơdrong tơgŭm ăn unh hnam đei kŏng pơmat tat, mă loi jĭ unh hnam tơnuh, plt hơnơ̆ng tơrĕk truh păng pơtho ăn dôm tơring bơ̆ jang mă ‘lơ̆ng. Pơm thoi yơ vă tơdrong arih xa kơ dôm unh hnam đei kơđĕh hlŏh kŭm dang ăi mă ưh ‘nŏh hlŏh ƀiơ̆ kơ tơdrong arih xa păh lăp tơ̆ tơring. Plt lăng kiơ̆ nơ̆r pơtho đơ̆ng Trung ương hơtŏk jên tơgŭm mưh man hnam ‘nao. Tơdrong man ‘nao kŭm nhen hơmet ming hnam so ăn unh hnam bơngai đei kŏng tơpă mơ̆n sư tôch gĭt kăl, pơjing tơdrong ‘lơ̆ng, hiôk hian ăn bơngai đei kŏng gơ̆h đei anih oei xa kơjăp păng rơgŏh ‘lơ̆ng”.