2 sơnăm âu ki, pơgar dâu tây xă tam mă truh 1.000m2 kơ ŭnh hnam đảng viên Cil Pam Ka Duyên, oei tơ̆ plei Đạ Tro, xăh Đạ Nhim, apŭng Lạc Dương (Lâm Đồng) hlôi jing hơnih tơ ƀôh tơdrong jang pơm tơlĕch ‘nao đei yua ăn kon pơlei lơ̆m tơring năm chă hơlen lăng, hŏk pơhrăm. Đảng viên Cil Pam Ka Duyên tơbăt, đei bơngai tơ pă, tơdrong jang tơ pă ‘noh tơdrong jang tơ roi tơbăt, krao hơvơn rim trong jang đơ̆ng Đảng, trong jang tơgŭm, khôi luơ̆t đơ̆ng teh đak mă hơnhăk ăn iŏk yua ‘lơ̆ng, kon pơlei mă tơmơ̆t yua jang kiơ̆:

 “Ƀơ̆t jing đảng viên, ĭnh đei dơ̆ng tơdrong hiôk vă hlôh hơdăh hloh găh dôm trong jang đơ̆ng Đảng, tơdrong jang tơgŭm khôi luơ̆t đơ̆ng Teh đak. Gơnang đơ̆ng noh, ĭnh mă gơh jang ‘lơ̆ng tơdrong jang đei Anih jang Đảng, khŭl kơdră pơjao. Păng kŭm đơ̆ng noh, ĭnh tơ gŭm kon pơ lei nhôn đei lơ hloh. Mă hơdăh, hơvơn kon pơlei tơplih ‘long pơtăm, hơdrin pơtăm dơ̆ng ‘long kơ đeh năr vă hơtŏk tơiung mŭk drăm ŭnh hnam. Dang ei tơdrong arih sa kơ kon pơlei kon kông tơring ‘nâu hlôi dă ƀiơ̆ kơ mơ mat tat lơ pơ têng hăm hơdrol sơ̆.”

Ưh khan lăp đảng viên Cil Pam Ka Duyên, lơ đảng viên nai ‘noh jĭ bơngai kon kông kơ xăh Đạ Nhim kŭm hlôh vao đei hơnăp jang đơ̆ng kơ dih lơ̆m iung jang hơdrol lơ̆m rim tơdrong jang. Lơ̆m noh, athei tơ roi truh dôm tơdrong jang tơplih ming ‘long pơtăm, tơgŭm băl hơtŏk tơiung jang sa, tơgŭm năr jang, ‘long hơdrĕch, ki thuơ̆t pơtăm....Gơnang đơ̆ng noh, choh jang sa kơ Đạ Nhim hlôi đei lơ ‘long pơ tăm, ƀrư̆ ƀrư̆ pơm tơlĕch choh jang sa kiơ̆ hla ar răt tơmam păng hơtŏk kơ jă tơmam. Đơ̆ng hơnih pơtăm hơdrô̆ ‘long cheh phe, truh dang ei, Đạ Nhim hlôi hơtŏk tơiung đei 16hek tar ‘long pơgang Atisô, 6hek tar dâu tây, 40 hek tar pơkao kăt dơng, 300 hek tar ‘nhot tơh rim kơ loăi păng hloh 330hek tar ‘long sa plei. Kơ sô̆ ŭnh hnam dơnuh hin kŭm tơ jur lơ, dang ei lăp oei pă 7% kiơ̆ tơdrong hơgăt ‘nao. Đảng viên Cil Pam Ka Phương, Thôn trong plei Đarahoa, xăh Đạ Nhim, tơbăt:

“Nhôn tơroi tơbăt, krao hơvơn ăn dôm ŭnh hnam bơngai kon kông lơ̆m pơlei bơngơ̆t hơtŏk tơiung mŭk drăm - tơpôl. Đunh kơ âu ‘long pơ tăm tơm đơ̆ng kon pơlei ‘noh cheh phe, dang ei krao hơvơn tơplih ‘long pơtăm kiơ̆ trong anih tĕch mơdro nhen ‘nhot, pro, tơh rim kơ loăi vă hơtŏk tơiung.”

Đảng bộ xăh Đạ Nhim đei đĭ đăng 122 đảng viên, hŏk hôp tơ̆ 10 chi bộ, lơ̆m noh đảng viên bơngai kon kông đei 52%. Kiơ̆ kơ ƀok Kon Sơ Ha Vương, Kơdră Anih jang MTTQ xăh Đạ Nhim, kŭm hăm pơm tơlĕch mŭk drăm, hơnăp jang iung jang hơdrol đơ̆ng rim đảng viên hlôi đei hơtŏk lơ̆m lơ tơdrong jang, mă loi ‘noh jĭ lơ̆m dôm tơdrong jang tơgŭm pơjing tơring tơrang ‘nao, tơjur dơnuh hin kơjăp, tơgoăt 1 ƀơ̆r đon, pơjing khŭl jang chĭnh trĭ pran kơjăp:

“Bơ̆jang kiơ̆ trong jang đơ̆ng Đảng păng khôi luơ̆t đơ̆ng teh đak, khei ‘năr âu ki, Anih jang Đảng, khŭl kơdră hlôi tơroi tơbăt ăn kon pơlei bơ̆jang kiơ̆ ‘lơ̆ng tơdrong jang pơjing tơring tơrang ‘nao. Hăm tơdrong jang tơm teh đak păng kon pơlei vang jang, lơ tơdrong jang trong nơnăm, gơng rok, đing đak hlôi đei tơmơ̆t jên jang pơm kơjăp. Kŭm hăm mŭk drăm sơđơ̆ng, tơdrong arih sa tơmam drăm păng jơhngơ̆m đon kon pơlei hlôi đei hơtŏk ‘lơ̆ng tôch kơ lơ.”

 Hơtŏk hơnăp jang đơ̆ng đảng viên lơ̆m tơring kon pơlei kon kông, bơ̆jang kiơ̆ đei jơnei dôm tơdrong jang yua đơ̆ng tơring tơlĕch ăn, mŭk drăm - tơpôl kơ Đạ Nhim hlôi đei tơdrong tơplih rơdăh ‘lơ̆ng păng tŏk bŏk ưh kơ đei pơdơh hơtŏk tơiung rim năr.