Khei năr au ki, Dơnŏ anĭh vei lăng Hnam trương pơtho pơhrăm dêh char Đak lăk hlôi krao hơvơn rim khŭl vang chă tơgŭm ăn đei hlŏh 40 ti hlak jên ‘nŏh đei: 5 ti hlak jên đơ̆ng dơnŏ anĭh vei lăng pơtho pơhrăm chă hơvơn; 35 ti hlak jên tơgum djru đơ̆ng Grŭp jang Ŭnh hơyŭh Việt Nam kơ yuơ Dơnŏ anĭh tơm vei lăng Hnam trương pơtho pơhrăm tơlĕch ƀơk ăn dêh char. Lăp đơ̆ng rŏng sơng iok đei 35 ti hlak jên, Dơnŏ anih vei lăng Hnam trương pơtho pơhrăm dêh char Đăk Lăk hlôi iung jang hơdoi hăm Dơnŏ anĭh bơ̆ jang tĕch muk drăm dêh char pơgơ̆r tơchă bơngai tĕch răt kiơ̆ tơdrong tơchơ̆t.

Pơtôch pơgơ̆r, 3 Kŏng ty iŏk đei drơ̆ng nơ̆r tĕch ăn 14.000 kmăi tĭnh kơƀang ăn hŏk tro hăm kơjă  2.294.000 hlak jên lơ̆m 1 tŏ kmăi. Kon jên pơkom đei đơ̆ng rŏng tơchă bơngai tĕch ăn vă jê̆ 3 ti hlak jên hlôi đei Dơnŏ anĭh vei lăng Hnam trương pơtho pơhrăm dêh char pơtrŭh ăn kơdră kơpal vă răt dơ̆ng đơ̆ng nŏh tơgŭm ăn hŏk tro tơnap tap. Ƀok Đỗ Tường Hiệp, Kơ iĕng Kơdră chĕp pơgơ̆r Dơnŏ anĭh vei lăng Hnam trương pơtho pơhrăm dêh char Đak lăk tơbăt:“Hlŏh đơ̆ng chă hơvơn au, nhôn lang să nơ̆r hơvơn ư̆h khan lăp hơdrô̆ hơnĭh pơtho pơhrăm mă lei lơ hơnĭh jang anai, trŭh hloi kon pơlei vang chă tơra vă đĭ đăng đe ŏh lơ̆m dêh char đei hŏk pơhrăm lơ̆m lơ̆m khei ‘năr đei jĭ hơbuh Covid-19, ưh kơ lê̆ hŏk tro ayơ hơchăng hŭt tơ̆ rŏng”.