VOV4.Bahnar - Lơ̆m 2 năr (29-30/9), Khul linh so dêh char Dak Lak pơ gơ̆r hop akŏm bơ ngai tang măt ‘măng mă 7, jăl jang đơ̆ng 2022-2027. Tơ drong hơ iă hlŏh lơ̆m tơ drong jang đơ̆ng Khul jăl jang âu ki ‘nŏh jĭ akŏm đei jơ hngâm tơ gŭm ăn hlŏh 1.700 unh hnam linh so klăih đơ̆ng tơ nuh hin, jang tŏk mŭk drăm.

Lơ̆m 5 sơ năm âu ki đei 1.753 unh hnam linh so tơ̆ Dak Lak tŏk klăih đơ̆ng tơ nuh hin

Jĭ anih đei pơ jao dơ̆ng tang mưh tŏk iŏk jên, rim khul linh so lơ̆m dêh char oei vei lăng vă jê̆ 30 rơ bâu unh hnam tŏk iŏk jên, hăm kơ sô̆ jên đei tŏk iŏk hlŏh 1.100 ti, chă tơ drong jang ăn rơ bâu ‘nu bơ ngai jang lơ̆m khul păng kon hơ ‘lơ̆p đe sư; pơ jing anih mong jên lơ̆m khul, mong đei vă jê̆ 92 ti hlak jên, năng kăl tưk tơ iung păng pơih xă dôm trong jang xa, tĕch mơ dro rơ gei đơ̆ng đe linh so.

Lơ̆m jăl jang ‘nao, hăm nơ̆r pơ ma “Mĭnh ƀơ̆r đon – Tơ gŭm băl – Tơ năp ‘lơ̆ng – Tơ plih ‘nao”, Khul linh so dêh char Dak Lak tơ lĕch đon pơ hnŏng 1 sơ năm pơ jing đei đơ̆ng 1-2 trong jang xa, tĕch mơ dro rơ gei đơ̆ng linh so, đei tơ drong jang pơ yoa ăn tơ drong pơ jing tơ ring tơ rang ‘nao, tơ ring kơ drâm rơ gei, vang vei sơ đơ̆ng tơ pôl, sơ đơ̆ng tơ̆ trong nơ năm păng pơih xă dôm grŭp linh so vei lăng cham char tơ̆ tơ ring.

VOV Tây Nguyên – Dơ̆ng tơ blơ̆