VOV4.Bahnar - Tơ̆ hơ năp tơ drong kŏh phă tôch dêh, ƀât mă lơ tơ drong hơ găt đơ̆ng luơ̆t, trong jang, tơ drong tơ gŭm ưh lăp hăm yăn âu, dêh char Dak Lak ‘nao gơih hla ar athei hơ met ming 1,2 tơ drong hơ găt đơ̆ng luơ̆t, trong jang, tơ drong tơ gŭm vă pơm hơ tŏk tơ drong đei yoa mưh vei lăng, atŏk tơ iung bri tơ̆ tơ ring. Dôm nơ̆r athei, apinh đei Dơ nŏ anih vei lăng kon pơ lei dêh char Dak Lak tơ lĕch lơ̆m jơ bơ̆ jang ‘nao âu đơ̆ng kơ dră chĕp kơ̆l dêh char hăm kơ dră Anih tơm vei lăng choh jang xa păng atŏk tơ iung tơ ring tơ rang.

Kiơ̆ Dơ nŏ anih vei lăng kon pơ lei dêh char Dak Lak, jên vei lăng bri kiơ̆ tơ drong tơ chơ̆t 38 sơ năm 2016 đơ̆ng Thủ tướng tĕh đak lăp 300.000 1ha 1 sơ năm ‘nŏh tŏ sĕt dêh hnang, ưh đei pơm ‘lơ̆ng ăn tơ drong vei lăng bri. Dak Lak athei Anih tơm vei lăng choh jang xa păng atŏk tơ iung tơ ring tơ rang roi tơ ƀôh ăn Khul kơ dră tĕh đak hơ tŏk jên tơ gŭm tŏ sĕt hlŏh ‘nŏh 1,3 triu 1ha 1 sơ năm. 

Dêh char Dak Lak oei tơ chĕng hơ len, khul vei lăng bri hrei ‘nâu oei ưh kơ măh tôch lơ păng đei lơ tơ drong ưh kơ lăp găh trong tơ gŭm, tôch mơ mat vă gơ̆h vei lăng ‘lơ̆ng bri. Đắk Lắk apinh Khul kơ dră tĕh đak đei trong tơ gŭm hơ drô̆ ăn khul vei lăng bri, atŭm hăm 'nŏh, apingh Khul kơ dră tĕh đak hơ tŏk tơ drong gơ̆h jang ăn khul vei bri păng khul juăt jang vei lăng bri đơ̆ng dôm tơ 'ngla bri vă hơ tŏk tơ drong đei yoa đơ̆ng vei lăng bri.

Dơ̆ng: Tơ blơ̆