Kiơ̆ đơ̆ng Khul bơngai măt tol dêh char Đak Lăk, hrei au dêh char đei hloh 530 ‘nu bơngai măt tol. Lơ̆m 5 sơnăm au ki, dêh char hlôi pơjing 20 tơdrong vă jang pơjing đei tơdrong jang ăn vă jê̆ 270 ‘nu bơngai măt tol mơ̆t jang, akŏm lơ̆m choh jang sa, rong kon tơrong păng tĕch mơdro iĕ.

Khul bơngai măt tol dêh char Đắk Lắk oei iung jang hơdoi hăm rim Hơnih pơtho tơdrong jang chă pơtho jang găh tơpĕt hoan jơ̆ng ti ăn mơjit ‘nu bơngai lơ̆m khul, tơdrong jang. Mĭnh ƀar ‘nu lăp đơ̆ng rŏng hŏk đang ei pơjing hơnih jang, tơgop đei tơdrong jang sơđơ̆ng păng đei iŏk yua kơjăp lơ̆m 1 khei 1 ‘nu jang sa đei iŏk yua truh 3 triu 500.000 hlak jên. Dôm tơdrong hơdrin đơ̆ng dêh char lơ̆m 5 sơnăm au ki hlôi tơgop sơđơ̆ng tơdrong hơrih sa ăn bơngai măt tol. Ŭnh hnam dơnuh kơ bơngai măt tol hlôi tơjur đơng 4%, đơ̆ng 17,5% jur pă 13,4%.