Apŭng Cư Kuin ‘noh mĭnh lơ̆m rim tơring tơ̆ Dak Lăk đei lơ kon kông kiơ̆ lui khop. Lơ̆m au, lui Khop (tơmơ̆t 67%), lui Tin Lành (tơmơ̆t 26%) păng Phật giáo (tơmơ̆t vă jê̆ 7%). Hăm trong tơlĕch ăn hơtŏk măt bơngai đảng viên ‘noh bơngai lui khop, năr 14/12/2017 Hơnih bơ̆ jang Đảng apŭng Cư Kuin hlôi pơjing păng tơlĕch jang kiơ̆ Tơdrong vă jang kơsô̆ 02 găh”Hơtŏk kơtang atŏk tơ iung đảng viên ‘noh bơngai lui khop tơklep hăm pơprŏ, tơmơ̆t pơm kang ƀô̆ ‘noh bơngai lui khop lơ̆m khul jang chinh trĭ tơring”.

Trong tơlĕch jang kơ Tơdrong jang kơsô̆ 02 ‘noh pơjing tơdrong tơplih kơtang găh jơhngơ̆m đon tơchĕng lơ̆m kang ƀô̆, đảng viên păng kon pơlei, mă kăl ‘noh kon kông lui khop găh trong bơ̆ jang trŏ ƀlep kơ Đảng lơ̆m jang kiơ̆ vei lăng năng tông lui khop. Đơ̆ng noh lui kiơ̆ kơjăp trong chĕp pơgơ̆r đơ̆ng Đảng, tơdrong lăng ba, tơdrong vei lăng, chĕp pơgơ̆r đơ̆ng Teh đak.  Adoi tơgop tơplih hơmet pơ ‘lơ̆ng khul đảng viên lơ̆m rim Hơnih Đảng, atŏk kơtang hơnăp jang chĕp pơgơ̆r, jơhngơ̆m iung tơjră đơ̆ng hơnih jang đảng păng đảng viên tơ̆ dôm tơring kon kông lui khop.

Tơlĕch jang kiơ̆ rim trong tơlĕch jang păng rim tơdrong pơkăp jang kơ Tơdrong jang kơsô̆ 02 kơ Hơnih Đảng apŭng, rim hơnih đảng tơring hlôi tơlĕch jang kiơ̆ rim tơdrong tơchơ̆t ‘moi kiơ̆ sơnăm. Mă hơdăh, tơ̆ Hơnih Đảng tơring Hòa Hiệp hlôi tơlĕch jang kiơ̆ Tơdrong tơchơ̆t kơsô̆ 12 găh atŏk kơtang chĕp pơgơ̆r đơ̆ng Đảng hăm bơ̆ jang atŏk tơ iung đảng viên. Đơ̆ng noh sơkơ̆t hơdăh trong jang “Pơtrŭt kơtang tơdrong pơjing khul vă tơmơ̆t, pơtho pơhrăm, pôk tơmơ̆t đảng viên ‘nao ‘noh bơngai kon kông lui khop”. Đơ̆ng noh, rim chi ƀô̆ tơring hlôi tơlĕch jang kơtang rim trong jang păng trong pơgơ̆r phara dih băl. Ƀok Trần Văn Du, Bĭ thư Chi ƀô̆ thôn Giang Sơn, tơring Hòa Hiệp, apŭng Cư Kuin, dêh char Dak Lăk tơbăt:“ Chi bộ tơlĕch minh tơdrong jang, klăh asong trong jang ăn rim đảng viên lơ̆m chi ƀô̆ vă jang kiơ̆ tơdrong jang pơjing khul vă tơmơ̆t jang. Păng, pơjao tơdrong jang ăn rim kang ƀô̆, rim hơnih jei iŏk jang dôm tơdrong jang đei pơjao ăn”.

Đơ̆ng rim tơdrong jang ‘lơ̆ng hơ iă tơ̆ tơring, rim chi ƀô̆ chă rơih dôm kon pơlei ‘lơ̆ng hơ iă lơ̆m tơring kon kông vă pơtho pơhrăm jơhngơ̆m đon, pôk tơmơ̆t vang jang lơ̆m khul Đảng, tơgop pơjing khul kang ƀô̆, đảng viên ăn tơring. Ƀok Trần Văn Thục, Bĭ thư Đảng tơring Hòa Hiệp, apŭng Cư Kuin, dêh char Dak Lăk tơbăt:“Nhôn hlôi pơgơ̆r hop akŏm găh bơ̆ jang atŏk tơ iung đảng viên, lơ̆m au, lăng kơjăp bơ̆ jang atŏk tơ iung đảng viên lơ̆m tơring kon kông lui khop, adoi nhen atŏk tơ iung đảng viên bơngai kon kông. Vă đơ̆ng rŏng au kơnh đei khul tơplih ăn dôm kang ƀô̆ lơ̆m khul jang chinh trĭ, mă truh dang ei sơnăm đĭ ‘lŏ kră jei ‘meh vă pơdơ̆h bơ̆ jang”.

Kiơ̆ đơ̆ng yă Phúc Bình Niê Kdăm, Bĭ thư Đảng apŭng Cư Kuin, hăm lơ tơdrong hơdrin hơmet pơ ‘lơ̆ng rim tơdrong tơhlăk tơhlĭn, jang kiơ̆ ‘lơ̆ng hơ iă rim tơdrong tơchơ̆t đơ̆ng Trung ương lơ̆m atŏk tơ iung đảng, truh dang ei, Hơnih Đảng apŭng Cư Kuin đei 33 hơnih đảng tơring, đei 25 đang ƀô̆, 8 chi ƀŏ, hăm hloh 4.400 đảng viên. Măt bơngai đảng viên ‘noh bơngai lui khop roi năr roi lơ, tơdrong mă au hlôi tơgop tơplih ‘nao lơ̆m đảng viên, atŏk kơtang hơnăp chĕp pơgơ̆r, jơhngơm iung tơjră pran kơtang đơ̆ng rim hơnih đảng:“Măt bơngai păng tơdrong jang ‘lơ̆ng kơ đảng viên ‘noh bơngai lui khop roi năr roi tŏk kơtang. Lơ̆m sơnăm 2016, akŏp măt bơngai đảng viên ‘noh bơngai lui khop lơ̆m apŭng đei 108 ‘nu. Lăp đơ̆ng rŏng tơlĕch jang kiơ̆ tơdrong jang au truh dang ei, akŏp măt bơngai đảng viên ‘noh bơngai lui khop kơ apŭng đei 245 ‘nu, tơmơ̆t 5,5% akŏp măt bơngai đảng viên lơ̆m apŭng. Apŭng jei hlôi pôk tơmơ̆t 13 ‘nu đảng viên ‘noh bơngai lui khop mơ̆t jang kang ƀô̆ tơm dơnơm păng rim kơdră, kơ iĕng kơdră rim hơnih jang chinh trĭ tơpôl tơring”.

Dôm tơdrong jơnei lơ̆m bơ̆ jang atŏk tơ iung đảng viên bơngai lui khop hlôi tơƀôh hơdăh tơdrong tôch trŏ lăp hăm yan au tơ̆ apŭng Cư Kuin, pơjing dơ̆ng gơng tơroh kloh klĕch, tơklep kơjăp ƀar păh “tơdrong lui khop” păng hơrih sa yan au”. Đơ̆ng noh jơhngơ̆m pran tơgoăt tơgoăl rim hơdrĕch hơdrung, lui khop roi năr roi atŏk kơtang, tơgop lơ̆m atŏk tơ iung mŭk drăm-tơpôl, tang găn trong hơlĕnh pơdăr, tơchă tơdrong đơ̆ng ayăt oei hơnơ̆ng pơlơ̆m lơ̆m tơdrong lui khop vă pơm chere, pơm ưh sơđơ̆ng ăn tơdrong tơgoăt tơgoăl pôm nơ̆r ƀơ̆r đon hơdrĕch tơdrung tơ̆ tơring.