Khei 9 sơ năm 2022, ŏh Lương Thị Trâm Anh, Đoàn viên tơ̆ Chi đoàn lăm 12A4, hnam trưng THPT Phan Bội Châu, apŭng Krông Năng, dêh char Dak Lak chơt hơ iă đei mât lơ̆m Đảng ƀât ‘nao tơ̆l 18 sơ năm. ‘Nâu jĭ tơ drong hưch hanh yoa đei thây kô, bôl boăl băt truh tơ drong adrin lơ̆m tơ drong hŏk pơ hrăm đơ̆ng ŏh lơ̆m lơ sơ năm âu ki. Trâm Anh tơ roi:

“Jơ hngâm đon inh kơ plăh dŏh tôch hơ iă, nhen thoi jing 1 ‘nu bơ ngai nai. ‘Nŏh jĭ 1 hơ yak tôch gĭt kăl lơ̆m jơ hnơr arih kơ dih kâu inh. Yoa thoi noh mă inh athei adrin jang kĕh ‘lơ̆ng hơ năp jang kơ dih”

Oei ŏh Võ Thị Như Ngọc - Bí thư Chi đoàn lăm 12A1, hnam trưng THPT Lê Quí Đôn, pơ lei tơm Buôn Ma Thuột, dêh char Dak Lak tơ roi, lơ̆m khei ‘năr hŏk pơ hrăm, ŏh hơ nơ̆ng adrin, pơ tâp pơ hrăm kơ dih kâu vă ‘moi kiơ̆ tơ drong juăt lơ̆m unh hnam vă gơ̆h dơ̆ng hơ doi hăm khul jang Đảng. Lơ̆m dôm sơ năm hŏk tơ̆ hnam trưng ŏh hŏk rơ gei tôm tong ngăl, jang đoan akŭm tôch tơ năp. Gơ nơm dôm tơ drong adrin đơ̆ng kơ dih kâu, khei 10 âu ki, ŏh chơt hơ iă đei Anih jang đảng lơ̆m hnam trưng rơih, ăn hŏk găh Đảng. ‘Nâu jĭ hơ yak blŭng a mă lei ŏh tôch hơ iă:

“ Inh ƀôh tôch hưch hanh mưh jing 1 lơ̆m dôm ‘nu boăl đei năm hŏk hơ len găh Đảng. ‘Nâu kŭm jing tơ drong ‘lơ̆ng vă hơ tŏk đon hlôh vao ăn kơ dih kâu păng lang xă tơ drong ‘lơ̆ng, đon adrin truh hăm bôl boăl jŭm dăr lơ̆m hnam trưng”.

Kô Nguyễn Thị Xuân Hương, Bí thư Đảng, Hiê̆u trơng hnam trưng THPT Lê Quý Đôn akhan, tơ drong chă ƀôh, pơ tho pơ hrăm atŏk tơ iung đảng viên ƀât đe ŏh oei hŏk tơ̆ hnam trưng ‘nŏh tôch kăl păng hơ nhăk đei lơ tơ drong ‘lơ̆ng. Yoa jang ‘lơ̆ng tơ drong jang ‘nâu, ưh lăp hơ met ming khul jang, hơ tŏk tơ drong ‘lơ̆ng ăn rim anih jang đảng, tơ jur ƀiơ̆ sơ năm bơ ngai jang đảng, mă oei tơ gop gĭt kăl lơ̆m tơ drong tơ ƀôh trong pơ tho pơ hrăm chinh trĭ, đon tơ chĕng tơ̆ hnam trưng. Atŭm hăm ‘nŏh, tơ ƀôh đon lui đơ̆ng jơ hnơr mơ lôh hăm bơ ngai mơ lôh hăm Đảng, tơ gŭm ăn đe boăl mơ lôh arih xa đei đon ‘lơ̆ng păng ƀĕnh tơ drong hơ pơi ‘mĕh.

“Sơ năm mơ lôh nhôn hrei ‘nâu tôch tơ năp, athei tơ mât jang đảng đơ̆ng blŭng hloi vă mưh mât tơ̆ hnam trưng đăi hŏk ‘nŏh đe ŏh đei tơ drong ‘lơ̆ng, tơ ƀôh đon rơ gei hrôih ƀiơ̆”

Vă atŏk tơ iung đảng viên mơ lôh lơ̆m hnam trưng hŏk, Đảng ủy, Khŭl Hiê̆u trơng kăl kơ pơ gơ̆r, pơ tho dôm khŭl grŭp tơ pôl hơ tŏk hloh dơ̆ng hơ năp jang đơ̆ng khŭl jang Đoàn hơ druh tơ dăm lơ̆m tơ drong jang tơ ƀôh trong, pơ tho pơ hrăm đon tơ chĕng, chĭnh trĭ, hlôh vao găh Đảng ăn hŏk tro. Hơ dai hăm, pơ gơ̆r dôm tơ drong jang vă pơ hrăm vă băt đei tơ drong hơ pơi ‘meh vă păng tơ ƀôh trong ăn đe oh adrin. Đơ̆ng hlôh vao hơ tŏk tơ iung đảng viên lơ̆m hnam trưng hŏk đơ̆ng kơ dih, ƀok Lã Mạnh Hà, Bí thư Đảng uỷ, Hiê̆t trơng hnam trưng THPT Phan Bội Châu, apŭng Krông Năng tơ roi:

“ Khŭl jang Đoàn hơ druh tơ dăm cộng sản Hồ Chí Minh lơ̆m hnam trưng đei tơ drong tơ gŭm ‘lơ̆ng đơ̆ng anih jang Đoàn apŭng kŭm nhen dôm khŭl jang chĭnh trĭ tơ pôl kơ na đe oh vang hlôh vao băt hloi đơ̆ng blŭng kơ na hnam trưng kŭm vei sơ đơ̆ng tơ drong hơ găt đei rơih iŏk ‘lơ̆ng. Lơ̆m tơ drong jang pơ tho pơ hrăm ‘noh đe thây kô pơ tho bộ môn kŭm nhen thây kô vei lăng lăm tơ ƀôh ăn păng răp hơ len vă tơ gŭm hnam trưng jang đang hơ năp jang chĭnh trĭ gĭt kăl hơ tŏk tơ iung đảng viên ‘noh jĭ hŏk tro.”

Kiơ̆ kơ ƀok Phạm Đăng Khoa, Kơ dră chĕp kơ̆l Anih vei lăng găh pơ tho pơ hrăm Dak Lak, sơ năm hŏk 2021-2022 đei 18 ‘nu hŏk tro, trung học phổ thông đei tơ mơ̆t Đảng. ‘Nâu jĭ kơ sô̆ oei tŏ sĕt pơ têng hăm hloh 41.000 đoàn viên tŏk bŏk hŏk pơ hrăm tơ̆ dôm chi đoàn găh dôm hnam THPT kơ dêh char. Yua thoi noh, Anih vei lăng găh pơ tho pơ hrăm athei rim hnam trưng kăl kơ bơ ngơ̆t truh lơ hloh dơ̆ng tơ drong jang hơ tŏk tơ iung đảng viên ‘noh hŏk tro, lăng ‘nâu jĭ 1 lơ̆m dôm hơ năp jang chĭnh trĭ tơm, hơ nơ̆ng đơ̆ng hnam trưng. Ƀok Phạm Đăng Khoa tơ băt:

“ Nhôn bơ ngơ̆t truh pơm hơ nih vă đe oh adrin pơ hrăm jang đang hơ năp jang đơ̆ng kơ dih găh hŏk pơ hrăm kŭm nhen hlôh vao hơ năp jang đơ̆ng sơ năm mơ lôh ‘noh jĭ dơ̆ng lơ̆m khŭl đảng vă đe oh adrin vang tơ gop jơ hngơ̆m lơ̆m tơ drong jang pơ jing păng vei lăng teh đak Việt Nam đơ̆ng rŏng âu.”

Hăm tơ drong bơ ngơ̆t truh atŏk tơ iung đảng viên mơ lôh lơ̆m hnam trưng hŏk, anih jang găh pơ tho pơ hrăm Dak Lak hlôi păng tŏk bŏk tơ gop pơ jing khŭl đảng viên mơ lôh đei hơ gei, hŏk jrŭ, jơ hngơ̆m đon nuih kơ jăp. Đơ̆ng noh, tơ iung tơ drong hơ pơi ‘meh plang jơ hngơ̆m đơ̆ng sơ năm mơ lôh vă pơ jing Đảng, pơ jing tơ drong jang chĭnh trĭ păng atŏk tơ iung tơ ring, teh đak.