'Măng axong tơmam jing minh păh lơ̆m tơdrong jang 'mêm bơnat đei hơnăn “Tơ̆k hơdăh Buôn Kiều - Light up Buon Kieu” đơ̆ng anih jang 'mêm bơnat.

Lơ̆m noh, đei 30 tŏ kơmăi tĭnh axong ăn Hnam trưng THCS Yang Mao, păng 30 tŏ nai axong ăn Thư viê̆n kơ pơlei Kiều, atŭm hăm gŏi thuê ƀao internet.

'Nguaih kơ noh, khul oei axong 20 suâ̆t jên hŏk ăn đe hŏk tro tơ̆ pơlei Kiều, đei tơdrong erih tơnap tap mă lei đei hŏk pơhrăm rơgei, rim tơpu đei kơjă 1 trĭu hlj. Ƀok thâi Trần Hữu Phước – Kơdră Hnam trưng THCS Yang Mao, xăh Yang Mao, apŭng Krông Bông ăn tơbăt, tơdrong hŏk pơhrăm đơ̆ng đe hŏk tro tơ̆ pơlei Kiều noh tơnap tap, đei dôm anih jang pơjao jên hŏk păng axong kơmăi vi tĭnh gô pơm trong hiôk hloh ăn tơdrong pơtho hŏk pơhrăm tơ̆ tơring ataih yaih âu.