VOV4.Bahnar - Đơ̆ng rŏng khei đunh đei ƀơm ưh kơ ‘lơ̆ng yua đơ̆ng jĭ Covid-19, tơ mang Dak Lak tŏk bŏk đei ƀôh tơ iung ming ‘lơ̆ng. Kŭm hăm hơ tŏk ‘lơ̆ng dôm tơ mam đei dang ei, dêh char tŏk bŏk hơ drin pơm ‘nao păng pơm lơ tơ mam vă sơng đei tơ moi tơ mang lăng.

        Mơ̆t hơ dai lơ̆m dôm tơ dra chơt hơ iă lơ̆m tơ drong jang tôn reh kră sơ̆ Tây Nguyên tơ̆ Anih ‘măn răk tơ mam drăm so Dak lak, ƀok Nguyễn Văn Sơn, tơ moi tơ mang lăng truh đơ̆ng pơ lei tơm Hà Nội ƀôh tôch kơ chhôk hơ iă. Ƀok Sơn tơ băt, ƀok hlôi mơ̆ng păng băt truh Dak Lak kiơ̆ bơ̆n ti vi brŏ mă lei ‘măng mă blŭng đei truh tơ̆ âu tơ mang lăng. Dôm tơ drong jang tơ mang lăng kiơ̆ tour tôch kơ hơ iă hăm ƀok.

        Hơ iă tơ pă. Bơ ngai Ƀăk năm tơ̆ âu mă ƀôh tơ ring Tây Nguyên thoi âu ‘noh ‘lơ̆ng dêh, ‘nao truh đĭ kơ tơ̆ng dôm ƀai hơ ri kơ Tây Nguyên ‘noh hiôk dêh păng hơ nih lăng tôch kơ hơ iă, dang ei ‘nao năm chă lăng. Tơ drong jang năm chă ngôi mă đei tơ ƀơ̆p thoi âu ‘noh tôch kơ hiôk. Tă kơ đĭ ƀôh chhôk hơ iă mă đei tơ ƀơ̆p dôm bơ ngai Tây Nguyên chơt tơ pă bơ̆ih păng ƀôh chhôk ‘nă thim 1 hơ drĕch hơ drŭng dơ̆ng, ĭnh băt dơ̆ng 1 tơ ring teh.

Tơ mang lăng cham char bri brăh, joh ayŏ tơ̆ Dak Lak đei lơ tơ moi bơ ngơ̆t truh, năm lăng

        Dôm năr âu ki, jô̆ păh lăp rim năr Anih ‘măn tơ mam drăm so Dak Lak sơng kơ hrĕng ‘nu tơ moi, đei dôm năr, kơ sô̆ tơ moi năm chă ngôi tŏk truh rơ bâu ‘nu. Ƀok Đinh Một, Kơ dră vei lăng Anih ‘măn răk tơ mam drăm so Dak lak tơ băt, ‘nâu jĭ đei ƀôh tôch kơ chơt hiôk yua kơ đơ̆ng rŏng đunh ưh kơ đei bơ ngai năm tơ mang lăng yua đơ̆ng ƀơm ưh kơ ‘lơ̆ng đơ̆ng jĭ Covid-19, ƀơ̆t tơ mang lăng đei pơ̆ih ‘măng dơ̆ng ‘noh anih jang tơ mang lăng Dak Lak hlôi đei dôm hơ yak tơ iung ming. Kơ sô̆ tơ moi truh tơ mang lăng dôm năr âu ki kŭm tơ roi truh dôm tơ drong hơ drin đơ̆ng anih jang lơ̆m tơ drong jang hơ dai hăm tơ moi tơ mang lăng ‘moi kiơ̆ lơ kênh kơ tơ̆ng ang.

       Lơ̆m kơ plăh jĭ hơ buh ‘noh nhôn hơ nơ̆ng jang hơ dai hăm tơ moi lơ̆m kơ măy kơ tơ̆ng ang. Nhôn pơ gơ̆r lơ tơ drong jang lơ̆m noh, pơ tih gia nhen roi tơ ƀôh dôm tơ mam pơ dă trực tuyến, nhôn roi tơ ƀôh dôm tơ drong tơ roi, tơ mam tơ̆ noh păng hơ nơ̆ng jang hơ dai hăm tơ moi lơ̆m Fanpage păng Youtube kơ anih ‘măn răk tơ mam drăm so. Gơ nang đơ̆ng noh mă đơ̆ng Anih ‘măn răk tơ mam drăm so Dak Lak păng tơ moi tơ mang lăng đei adoi vei tơ drong pơ vei ‘lơ̆ng păng ƀơ̆t mă đei trong jang pơ̆ih ‘măng tơ mang lăng ‘noh tơ moi đe sư truh. Nhôn iŏk đei tôch kơ lơ ‘măng chih măt, kơ sô̆ tơ moi truh tôch kơ lơ.

       Kŭm hăm pơ trŭt păng hơ tŏk tơ iung dôm tơ mam tơ mang lăng, đơ̆ng blŭng sơ năm truh dang ei, dêh char Dak Lak kŭm hơ drin roi tơ ƀôh, pơ trŭt păng hơ tŏk tơ iung dôm tơ mam tơ mang lăng, đơ̆ng blŭng sơ năm truh dang ei, dêh char Dak Lak kŭm hơ drin roi tơ ƀôh, pơ trŭt tơ mang lăng hăm dôm dêh char vă jang hơ dai tơ ring tơ mang lăng păng hơ tŏk tơ iung dôm pơ vih pơ văn kiơ̆ trong. Lơ̆m jăl khei mă 1 sơ năm ‘nâu, dêh char hlôi vang akŏm kơ chơ tơ mang lăng apŭng plĕnh teh, kĭ pơ kăp hăm dôm dêh char Phú Yên, Bình Định, Quảng Ngãi, Gia Lai, Kon Tum, dăh mă tŭn pran tơ goăt pơ jing tơ mam tơ mang lăng hăm dêh char Khánh Hòa. Yă Nguyễn Thị Lệ Thanh, Kơ dră Anih vei lăng tơ mang lăng dêh char Khánh Hòa lăng ‘lơ̆ng găh hơ mĕng jang hơ dai tơ ring đơ̆ng 2 dêh char lơ̆m hơ tŏk tơ iung tơ mang lăng.

        Tơ drong đei yua đơ̆ng 2 dêh char ‘noh tơ mam tơ mang lăng kơ 2 tơ ring tôch kơ pha ra băl, ưh kơ đei lei lăi ‘noh hơ nhăk truh tơ drong nhôn bơ̆ jang kiơ̆ tơ lĕch jang hơ dai tôch kơ hiôk. Hăm tơ drong pran đơ̆ng Khánh Hòa ‘noh jĭ tơ mang lăng đak dơ sĭ, achon đak dơ sĭ tơ klep hăm tơ mang lăng bri kông kơ dêh char Dak Lak ‘noh tơ gŭm ăn pơm lơ tơ mam păng đơ̆ng tơ drong tơ lĕch jang hơ dai tơ ring ‘noh nhôn hơ mĕng hăm tơdrong tơ mam ‘nâu ‘noh tơ drong jang hơ dai gô iŏk đei tơ̆ hơ năp kơnh.

Lơ̆m jăl khei mă 1 sơ năm ‘nâu, kơ sô̆ tơ moi tơ mang lăng truh tơ̆ Dak Lak đei ƀôh tơ iung ming

        Kiơ̆ chih jô̆ đơ̆ng dêh char, lơ̆m jăl khei mă 1 sơ năm ‘nâu, Dak Lak hlôi sơng iŏk vă jê̆ 240 rơ ‘nâu ‘nu tơ moi truh tơ mang lăng tơ̆ dêh char. Hơ drô̆ lơ̆m khei 4 âu, kơ sô̆ tơ moi truh tơ̆ dêh char roi tŏk lơ, mă loi ‘noh jĭ lơ̆m năr pơ gơh lêh, lơ anih ƀĭch pơ dơh ƀĕnh bơ ngai. Dôm khŭl tơ moi đơ̆ng dôm dêh char pơ lei tơm nhen pơ lei tơm Hồ Chí Minh, Hà Nội, Quảng Ninh,… kŭm rơ̆ih iŏk Dak Lak jĭ anih truh lơ̆m tơ drong năm tơ mang tơ ring tŏk bŏk păng Tây Nguyên. Kiơ̆ kơ ƀok Đặng Gia Duẩn, Phŏ Kơ dră anih vei lăng găh joh ayŏ- tơ plŏng kơ dâu păng tơ mang lăng Dak Lak, hăm dôm tơ drong pran păng tơ drong hiôk găh cham char bri brăh păng tơ drong jŏh ayŏ, Dak Lak tŏk bŏk hơ drin tôch kơ lơ vă ƀrư̆ ƀrư̆ tơ iung ming tơ drong jang tơ mang lăng.

        Mĭnh lơ̆m dôm tơ drong jang đĭ đăng rim tơ moi jơ̆p lơ̆m teh đak adoi tôch kơ hơ iă mưh truh tơ̆ Dak Lak ‘noh jĭ tơ mang lăng cham char bri brăh. Dak Lak đei cheh phe, đei tôn chĭng chêng tôch kơ hơ iă, mă loi ‘noh jĭ đei lăng rôih. Dang ei ‘noh dêh char tŏk bŏk tơ lĕch jang tơ mang lăng rôih ‘noh ưh khan hơ drô̆ hơ năn krao đơ̆ng sư đĕch kŭm hlôi pơm ăn tơ moi ‘meh lăng. Hơ dai hăm ‘noh hrei ‘nâu dôm ŭnh hnam kơ chăng pơ̆ih dôm homestay, farmstay tơ klep hăm tơ mang lăng rơ goh păng kơ jăp, mă loi ‘noh jĭ tơ klep hăm choh jang sa ‘noh dêh char bơ̆n kŭm đei tơ drong ‘lơ̆ng găh choh jang sa ‘noh kŭm jing 1 tơ drong ‘lơ̆ng vă hơ tŏk tơ iung tơ mang lăng choh jang sa tơ̆ hơ năp kơnh.

       Đơ̆ng rŏng khei ‘năr đunh đei ƀơm ưh kơ ‘lơ̆ng yua đơ̆ng jĭ hơ buh, lơ̆m tơ drong oei sa hmă ‘nao, Dak Lak tŏk bŏk hơ drin tơ lĕch lơ trong jang vă pơ trŭt tơ mang lăng. Kŭm hăm dôm trong jang găh vei lăng lơ̆m tang găn jĭ Covid-19; pơ ma sa hiôk hăm tơ moi F0 dêh char kŭm tŏk bŏk hơ drin vă pơ jing dôm tơ mam tơ mang lăng lơ păng iŏk jang đei tơ drong pran kơ tơ ring.

            H’Xíu H’mốc: Chih

            Thuem: Tơ blơ̆