VOV4.Bahnar - Ƀlep ƀât tơ băt 75 sơ năm Năr linh jĭ rơ ka, linh lôch tang tĕh đak (27/7), dêh char Dak Lak ‘măn hlŏh 13 ti hlak jên vă răt tơ mam ăn dôm bơ ngai đei kŏng hăm kăch mang. Kơ sô̆ jên hlŏh 13 ti âu gô đei pơ jao ăn vă jê̆ 42.500 ‘nu bơ ngai đei kŏng hăm kăch mang tơ̆ dêh char. Lơ̆m nŏh, tơ mam đơ̆ng Kơ dră tĕh đak răt hăm kơ sô̆ jên hlŏh 4 ti 200 triu, jên oei đei dơ̆ng ‘nŏh đơ̆ng dêh char păng dôm tơ ring.

Kăn ƀô̆ tơ ring năm ngôi tơ̆ unh hnam đei kŏng tơ̆ apŭng Cư mgar

Tơ mam đei pơm 2 tơ pu hăm 2 kơ sô̆ jên pha ra ‘nŏh: Tơ pu 600.000 păng 300.000. Mă hơ dăh, tơ pu tơ mam 600.000 hlak vă ‘măn ăn đe Mĕ Việt Nam nuih mơng; Kơ tum kơ tŏng ‘nhŏng ŏh linh lôch tang tĕh đak oei xa jên tơ gŭm rim khei; Linh jĭ rơ ka ăl đơ̆ng 81% tŏk tơ̆ kơ pal. Tơ pu tơ mam 300.000 ‘nŏh hơ păh ăn đe linh jĭ rơ ka, linh jĭ jăn ưh kĕ bơ̆ jang, kơ sư̆k tơ jur đơ̆ng 80% jur tơ̆ hơ la; Linh jĭ rơ ka oei xa yoa tơ drong tơ gŭm yoa ưh kĕ jang; bơ ngai vang năm tơ blăh ƀơm pơ gang kơ nê̆, pơ răm lơ̆m hơ kâu jăn đơ̆ng 80% jur tơ̆ hơ la; bơ ngai dơ̆ng tang ăn ‘nhŏng ŏh linh lôch tang tĕh đak, bơ ngai oei vei lăng, soi plang ăn linh lôch tang tĕh đak.

Dơ̆ng: Tơ blơ̆