VOV4.Bahnar - Đơ̆ng blŭng sơ năm 2022 truh dang ei, Anih pơ vih pơ văn tơ drong jang, Anih vei lăng găh bơ ngai jang - lĭnh jĭ rơ ka păng tơ pôl dêh char Dak Lak hlôi hơ met pơ ‘lơ̆ng trong jang tơ gŭm jên ƀao hiêm ưh kơ đei tơ drong jang hăm 8.640 hla ar hồ sơ, tŏk 43,8% pơ têng hăm khei ‘nâu sơ năm 2021. Kiơ̆ kơ Anih pơ vih pơ văn tơ drong jang Dak Lak, lơ̆m kơ sô̆ hloh 8.600 hla ar hồ sơ athei hơ met pơ ‘lơ̆ng tơ drong tơ gŭm jên ƀao hiêm ưh kơ đei tơ drong jang, đei hloh 5.700 ‘nu bơ ngai jang bơ̆ jang bơ̆ dôm dêh char nai, hloh 2.800 ‘nu bơ ngai jang tơ̆ tơ ring, akŏp kơ sô̆ jên kla tơ gŭm ƀao hiêm ưh kơ đei tơ drong jang ‘noh 132 ti hlak jên.

Hơ dai hăm ‘noh Anih jang hlôi tơ gŭm pơ tho tơ drong jang ăn kơ 310 ‘nu tŏk bŏk sa jên ƀao hiêm ưh kơ đei tơ drong jang, hăm kơ sô̆ jên tơ gŭm 1 ti 900 triệu hlak jên. Kiơ̆ kơ ƀok Trần Xuân Đa, Phŏ kơ dră vei lăng Anih jang, vă tơ gŭm bơ ngai jang ưh kơ đei tơ drong jang jăh đei iŏk jên ƀao hiêm ưh kơ đei tơ drong jang, lơ̆m 3 khei hơ tuch sơ năm Anih jang gô hơ tŏk jên bơ ngai jang ăn Anih pơm hla ar tơ̆ thị xã Buôn Hồ, apŭng Ea Kar păng tơ̆ Anih jang vă sơng iŏk, hơ met pơ ‘lơ̆ng tơ drong sa jên tơ gŭm ƀao hiêm ưh kơ đei tơ drong jang vă vei sơ đơ̆ng trong jang 3 ƀlep: ƀlep bơ ngai, ƀlep tơ drong jang păng ƀlep khei ‘năr.

Thuem: Tơ blơ̆