Mă hơdăh ‘noh, tơlĕch jang tơdrong jang Têt ‘mêm mơnat sơnăm 2023, Jơnŭm ‘long pơglang ƀrê hlôi hơvơn đei hloh 71 rơbâu tơpu tơmam ăn ŭnh hnam dơnuh hin, ŭnh hnam đei tơdrong arih sa mơmat tat dêh hloh, bơngai răm đơ̆ng pơgang điôxin, bơngai jo jăn. Ming man 9 tơdrong jang ‘mêm mơnat, tơgŭm 553 hơnih ‘mêm mơnat păng dôm jĭt rơ bâu ‘nu bơngai dơnuh hin lơ̆m Khei ‘mêm mơnat.

Pơvei dôm tơdrong hnam pai gŏ, ‘măng sŏng sa đĕch tơgŭm bơngai dơnuh hin tơ̆ dôm Hnam pơgang. Yă Ayun H Hương, Kơdră Jơnŭm vei lăng ‘long pơglang ƀrê dêh char Dak Lak tơbăt, tơ̆ hơnăp kơnh, Jơnŭm hơnơ̆ng lăng kăl tơlĕch dôm tơdrong jang tơklep hăm tơdrong krao hơvơn “Mĭnh anih jang 1 ‘nu bơngai tơklep hăm anih ‘mêm mơnat”, hơtŏk loi dơ̆ng hơvơn jên jang vă pơ vei dôm tơdrong jang tơ̆ dôm tơring.