Sơnăm 2022, Hơnih mong jên tơgŭm djru hơ ioh dêh char Đak Lăk hlôi chă hơvơn đei vă jê̆ 8 ti hlak jên, tơgum djru ăn hloh 9.000 ‘nu hơ ioh.

Dôm tơdrong jang tơgŭm djru đei: Bơ̆ jang vei lăng năng tông jơhngơ̆m jăn păng bek ‘lơ̆ng ăn hơ ioh nhen tơdrong jang khăm hơlen păng răih tơdrong jo jăn đơ̆ng nge, khăm rim tơdrong jĭ găh măt păng ƀơk ăn pơgang; Bơ̆ jang tơgŭm djru pơtho pơhrăm nhen man lăm hŏk păng pôk ăn tơmam drăm hŏk pơhrăm, pơchơt pơ hiơ̆ ăn hơ ioh tơring atăih yăih, pôk ăn kon jên hŏk pơhrăm ăn đe oh tơnap tap hŏk hơgei, pôk ăn tang vang păng tơmam drăm hŏk pơhrăm ăn hŏk tro; Bơ̆ jang vei lăng năng tông hơ ioh nhen: tơgŭm ăn hơ ioh đei răm sar bar, glơk kơ đak, ŭnh hnam teh dong, jĭ jăn, mơti mơtĕk, tơgŭm djru hơ ioh đei mĕ dăh mă ƀă lôch kơ yiơ ji COVID – 19 pơm ăn păng man hnam ‘mêm mơnat ăn hơ ioh tơnap tap, mơti mơtĕk ... Jơ ‘năr au, kơdră chĕp pơgơ̆r dêh char Đak Lăk athei rim hơnih bơ̆ jang đei ƀơm truh kăl iung jang hơdoi hăm Hơnih mong jên tơgŭm djru hơ ioh dêh char vă tơgoăt dih băl, tơƀôh tơbăt rim tơdrong vă jang, rim bơngai tơgum djru, rim hơnih bơ̆ jang tơgŭm djru vă atŏk bơ̆ jang ‘lơ̆ng lơ̆m tơgum djru hơ ioh.