- Ƀok ăi, bơ̆ jang rơ̆ih, krao tơmơ̆t pơm ƀô̆ đô̆i sơnăm 2023 kơ dêh char Đak Lăk đei yă kiơ ‘nao?

-Đăi tă Lê Văn Hùng: Bơ̆ jang krao tơmơ̆t pơm ƀô̆ đô̆i sơnăm 2023 ‘nŏh hrei au oei jang kiơ̆ Khôi luơ̆t mơ̆t pơm ƀô̆ đô̆i sơnăm 2015. Mă lei, bơ̆ jang chă rơih, krao hơvơn kon pơlei mơ̆t pơm ƀô̆ đô̆i sơnăm 2023 đei trong ‘nao ‘nŏh Khul kơdră Teh đak hlôi pơjing Tơdrong tơchơ̆t kơsô̆ 37 năr 6/6/2022 hơmet ming, tơmơ̆t dơ̆ng mĭnh ƀar apăng kơ Tơdrong tơchơ̆t 120 năr 9/10/2013 tơchơ̆t hơdăh xek phăk tơdrong pơm glăi lơ̆m bơ̆ jang vei lăng teh đak, tơdrong jang kăl. Kiơ̆ kơ ‘noh, kon jên xek phak hăm pơm glăi hăm tơdrong bơ̆ jang rơih, krao tơmơ̆t pơm ƀô̆ đô̆i tŏk lơ. Păng ‘nau jei jing mĭnh lơ̆m trong jang vă hơmet pơ ‘lơ̆ng, pơm dă ƀiơ̆ tơdrong klĕnh, veh ver jang kiơ̆ pơm ƀô̆ đô̆i.

Păng đei tơƀôh hơdăh, hăm đei ƀôh, sơnăm 2022 klĕnh koă kơ năm khăm pơm ƀô̆ đô̆i ‘nŏh 103 ‘nu kon pơlei, mă lei sơnăm 2023 au klĕnh koă năm khăm jơhngơ̆m jăn năm pơm ƀô̆ đô̆i lăp pă 2 ‘nu bơngai đĕch. ‘Nau jing trong ‘nao, trong jang ‘lơ̆ng kơ bơ̆ jang chă rơih, krao hơvơn kon pơlei năm mơ̆t pơm ƀô̆ đô̆i sơnăm 2023.

- Bơ̆ jang rơ̆ih, krao tơmơ̆t pơm ƀô̆ đô̆i sơnăm 2023 kơ dêh char Đak Lăk đei tơdrong yă kiơ rơvơn păng tơnap tap hŏ ƀok?

-Đăi tă Lê Văn Hùng: Bơ̆ jang rơ̆ih, krao tơmơ̆t pơm ƀô̆ đô̆i sơnăm 2023 kơ dêh char găh rơvơn ‘noh đei vang iung jang tơnăp chĕp pơgơ̆r, pơrô̆ jang đơ̆ng Hơnih Đảng, Hơnih vei lăng kon pơlei, Jơnum vei lăng kon pơlei dêh char, tơdrong vang iung jang đơ̆ng rim hơnih bơ̆ jang, kơdră tơring, đơ̆ng pơlei, koeng kơphô̆ trŭh tơ̆ tơring, apŭng, dêh char hloi. Đơ̆ng noh, atŏk kơtang jơhngơ̆m đon hlôh vao kơ kon pơlei, măkăl hăm kon pơlei truh sơnăm mơ̆t pơm ƀô̆ đô̆i. Xơkơ̆t hơdăh hơnăp jang, tơdrong kăl iung jang đơ̆ng rim kon pơlei mư̆h pơm kiơ̆ bơ̆ jang mơ̆t pơm ƀô̆ đô̆i adoi nhen vang mơ̆t jang lơ̆m Kŏng ang kon pơlei.

Mă lei, jei đei dôm tơdrong tơnap tap, mă kăl ‘nŏh tơdrong kơdih rim kon pơlei akŏm ăn atŏk tơ iung mŭk drăm, lơ kon pơlei năm jang tơ̆ hơtăih tơ̆ rim hơnih jang kmăi kmŏk pơm tơlĕch tơmam drăm. Kơ yuơ lơ loh, tơdrong krao hơvơn kon pơlei brŏk vih năm khăm jơhngơ̆m jăn, jang kiơ̆ tơdrong krao tơmơ̆t pơm ƀô̆ đô̆i đơ̆ng kơdră tơring jei tơƀơ̆p tơnap tap. Mă ƀar, jơhnghơ̆m pran jăng grăng akau kơ kon pơlei hrei au jei tơjur kơtang, pơtih gia nhen đei lơ tơdrong jĭ jăn nhen, măt ưh kơ bang, jĭ găh trong pham. Mă kăl, mĭnh ƀar ‘nu kon pơlei pơgơ̆m iŏk yua pơgang vă pơm ăn trong pham kơdau rĕnh, pơm ăn khul khăm hơlen kơ apŭng tơƀơ̆p tôch tơnap tao.

- Ƀok ăi, dêh char Đăk Lăk hlôi đei dôm tơdrong hơmet thoi yơ ăn lêh pơjao bơngai năm pơm linh xơnăm  2023?

-Đăi tă Lê Văn Hùng: Tơchơ̆t đơ̆ng Khul Kơdră kơpal kơ teh đak pơjao ăn dêh char Đăk Lăk xơnăm 2023 'noh rơih iŏk 2.968 'nu bơngai. Lơ̆m noh đei 2.502 năm pơm ƀô đô̆i, đei 2 'nu drăkăn. Păng 466 'nu 'noh pơm Kŏng ang kon pơlei, đei 1 'nu drăkăn. Vă keh đang tơnăp lêh pơjao bơngai năm pơm linh tơ̆ rim tơring, Anih tơm pơgơ̆r linh dêh char hlôi tơgŭm ăn Anih tơm iŏk bơngai năm pơm linh kơ 15 apŭng, thĭ xăh, pơlei tơm hơtŏk hơlen băt hơdăh tơdrong 'lơ̆ng, vei lăng bơngai lơ̆m sơnăm pơkăp pơm linh. Pơtho rim tơring, mă hăt noh Jơnŭm pơgơ̆r linh kơ dôm apŭng jang tơnăp tơdrong hơmet, pơhrăm dôm tơdrong kăl, vă pơgơ̆r lêh pơjao linh gơh 'lơ̆ng hloh, tơpă jĭ 'năr akŏm pơtruh bơngai năm pơm linh kơ kon pơlei rim hơdrung hơdrĕch tơ̆ dêh char. Atŭm hăm noh, pơgơ̆r rim jăl jang kơpal, jơnŭm pơgơ̆r tơring vang bơ̆ jang, jang tơnăp tơchơ̆t tơgŭm ăn bơngai pơm linh, mă kăl noh chă năm apong, pơma dơnuh vă kon pơlei sơđơ̆ng jơhngơ̆m, kơchăng năm pơm linh xơnăm 2023.

-Lei ah, bơnê kơ Đăi tă Lê Văn Hùng hơ.