Iŏk tơpu tơmam đei kơjă 1 triệu hlak jên păng kơ phiê̆u răt tơmam ưh kơ hoach jên yua đơ̆ng Liên đoàn Lao động dêh char Dak Lak pơjao asong, ‘nhŏng Y Krich Êban, xăh Ea Tul, apŭng Cư M’Gar jĭ bơngai jang lơ̆m Kŏng đoan anih jang găh đak rơgoh păng vei rơgoh cham char tơring tơrang dêh char Dak Lak tơroi, đơ̆ng rŏng 2 sơnăm đei ƀơm ưh kơ ‘lơ̆ng đơ̆ng jĭ COVID-19, sư păng lơ bơngai jang tơƀơ̆p mơmat tat lơ̆m tơdrong arih sa. Tơmam âu tôch kơ ‘lơ̆ng, tơgŭm ŭnh hnam sư sơng Têt Quý Mão tơnŏ hiôk, chơt hơiă:

“Ưh kơ hơdrô̆ ĭnh đĕch, mă đĭ đăng bơngai jang tă kơ mơmat tat ngăl, đei bơngai ‘noh hiong tơdrong jang, đei bơngai ‘noh pŭn ai nhen ĭnh đei Anih vei lăng găh choh jang sa kĭ hla ar bơ̆jang đunh đai. Ŭnh hnam tôch kơ mơmat tat, ƀơ̆t iŏk đei tơmam âu ‘noh ŭnh hnam tôch kơ chhôk lơ̆m pơyan Têt sơnăm ‘nâu.”

Hăm oh Y Hổ H’Mok oei tơ̆ plei Com Leo, xăh Hòa Thắng, pơlei tơm Buôn Ma Thuột, gre tang vang yua đơ̆ng Jơnŭm vei lăng ‘long pơglang ƀrê pơlei tơm Buôn Ma Thuột krao hơvơn dôm bơngai đei jơhngơ̆m đon ‘mêm mơnat pơjao asong lơ̆m năr Têt âu ‘noh jĭ tơmam đei kơjă kăp gĭt tôch kơ tih. Gra tang vang gô tơgŭm sư yak lơ̆m sơnăm ưh pă athei iung đơ̆ng hrôih vă năm jơ̆ng yoh truh tơ̆ hnam trưng păng Têt âu Y Hổ gô chơ oh sư hăm gre tang vang ‘nao vă năm chă ngôi hăm đe bôl buăl lơ̆m pơlei:

 “Hơdrol ki ưh kơ đei gre tang vang kon năm hŏk gleh lap, iŏk đei gre tang vang kon chhôk dêh, kon hơdrin hŏk pơhrăm vă pơm lăp jơhngơ̆m đon rim bơngai.”

Lơ̆m hnam ‘nao man ‘lơ̆ng, să sap, ‘nhŏng Trịnh Thế Hậu, oei tơ̆ phường Thiện An, thị xã Buôn Hồ tơbăt, sư đei 23 sơnăm bơ̆jang lơ̆m anih jang pơtho pơhrăm, dôm sơnăm âu ki yua kơ ŭnh hnam mơmat tat, kơdih kâu sư ‘noh đei jĭ klơm athei hơmet hoach lơ kơna ưh kơ đei jên man hnam mă oei hơdai hăm mĕ ƀă. Sơnăm 2021 ‘nhŏng Hậu chă hơkăn đang kơ ‘noh đei kon, hnam oei hơdai jing hrăt hrot păng ưh kơ hiôk. Lăng ƀôh tơdrong arih sa mơmat tat đơ̆ng ‘nhŏng Hậu, khei 10 sơnăm 2022 kŏng đoam anih jang pơtho pơhrăm Dak Lak hlôi tơgŭm ‘nhŏng Hậu 50 triệu hlak jên vă pơm hnam tơnŏ kŏng đoan. Lơ̆m ƀlep năr têt hnam hlôi pơm đang păng đei mơ̆t oei:

“Pơtêng hăm dôm sơnăm hơdrol ‘noh sơnăm ‘nâu ŭnh hnam nhôn đei hnam ‘nao ‘noh tôch kơ chhôk, kŭm tôch kơ sơđơ̆ng jơhngơ̆m bơ̆jang. Sơng Têt lơ̆m jơhngơ̆m hiôk chơt hơdai đơ̆ng klo kăn nhi ‘noh đei kon hai đei hnam ‘nao hai đei tơdrong jang sơđơ̆ng păng đei tơdrong bơngơ̆t truh đơ̆ng bơngai jang ‘noh nhôn kŭm bơnê kơ tơdrong tơgŭm đơ̆ng đĭ đăng đe ‘nhŏng oh jang hơdai.”

Kiơ̆ kơ ƀok Nguyễn Quang Thuân, Phŏ Kơdră chĕp kơ̆l Anih vei lăng găh bơngai jang păng lĭnh jĭ rơka, tơpôl dêh char Dak Lak, năr Têt Nguyên đán Quý Mão 2023, Anih vei lăng kon pơlei dêh char Dak Lak ‘măn 76 ti hlak jên asong tơmam ăn dôm bơngai, khŭl tơpôl hơgei. Dôm jĭt rơbâu tơpu tơmam tơgŭm ŭnh hnam dơnuh hin, vă jê̆ dơnuh hin păng bơngai jang đei tơdrong arih sa mơmat tat kŭm đei dôm anih jang khŭl grŭp, anih jang mơdro sa păng dôm bơngai đei jơhngơ̆m đon ‘mêm mơnat pơjao truh tơpang ti kon pơlei lơ̆m ‘măng âu:

“Sơnăm ‘nâu dêh char pơgơ̆r ăn dôm apŭng, thi xăh, pơlei tơm; dôm xăh, phường, thị trấn gô kơtă pơgơ̆r dôm tơdrong jang vă asong tơmam ăn bơngai dơnuh hin lơ̆m dêh char, hơdrô̆ dêh char ‘noh pơjing 8 khŭl bơ̆ jang vă năm ngôi tơ̆ dôm bơngai teh đak tơgŭm păng năm ngôi dôm bơngai bơ̆ jang năr Têt. Hơdai hăm jên đơ̆ng dêh char tơgŭm ‘noh dêh char kŭm hlôi pơgơ̆r ăn Jơnŭm vei lăng ‘long pơglang ƀrê, Mặt trận păng dôm khŭl grŭp nai hơdrin krao hơvơn dôm anih mơdro sa, khŭl jang kơdih lơ̆m dêh char vă vei lăng ăn bơngai dơnuh hin  vă ưh kơ đei bu hŭt lê̆ tơ̆ rŏng.”

Dôm tơmam ‘lơ̆ng đei pơjao truh tơpang ti bơngai đei tơdrong arih sa mơmat tat lơ̆m năr Têt hlôi tơgŭm ăn đe sư roi tơnŏ jơhngơ̆m, pơm dơ̆ng tơdrong ‘lơ̆ng vă đe sư yak hloh lơ̆m tơdrong arih sa hăm hơmĕng sơnăm ‘nao lơ tơdrong hiôk chơt ‘nao.