Ƀuôn Mlôk B, tơring Krông Jing, apŭng Mdrăk, dêh char Đak Lăk đei 160 ŭnh hnam hăm 500 ‘nu măt bơngai, đĭ đăng ‘nŏh bơngai Êđê. Sơnăm 2022, lơ̆m pơlei đei 100 ŭnh hnam dơnuh ‘nŏh dang ei hlôi tơjur dơnuh lê̆ pă 80 ŭnh hnam. Tơdrong hơrih sa, oei sa kơ kon pơlei hlôi plih kơtang. Đei đăi tơdrong au gơnơm đơ̆ng Khul kơdră chĕp pơgơ̆r Đảng, kơdră chĕp pơgơ̆r tơring, rim hơnih tơlĕch jang kiơ̆ rim trong jang lơ̆m jang kiơ̆ rim Trong tơlĕch jang đơ̆ng Đảng, Teh đak. Mă kăl ‘moi kiơ̆ 3 tơdrong jang tơm teh đak: Tơ iung pơjing tơring tơrang ‘nao; tơjur dơnuh kơjăp ‘lơ̆ng; atŏk tơ iung mŭk drăm-tơpôl tơring kon kông păng groi kông. Yă H’ Hương H’ Wing, Ƀĭ thư chi ƀô̆ Ƀuôn Mlôk B tơbăt:“Khul jang chĭnh trĭ adoi nhen thôn trơng, rim hơnih bơ̆ jang kơ pơlei ling lang akŏm lơ̆m tơdrong twochơ̆t chĕp pơgơ̆r pơrô̆ jang đơ̆ng chi ƀô̆ ‘nŏh tơklep hăm kon pơlei, pơtho ăn kon pơlei atŏk tơ iung mŭk drăm, băt jang kiơ̆ khoa hŏk kih thuơ̆t lơ̆m rong rơmo, nhŭng, băt hơdăh dôm tơdrong lơ̆m pơlei đơ̆ng noh chă pơrô̆ pơtho khan ăn kon pơlei”.

Tơring Ea Sol, apŭng Ea Hleo đei 12 thôn păng 7 ƀuôn, 13 hơdrung hơrih sa hơdoi. Iung jang lơ̆m tơ iung pơjing tơring tơrang ‘nao iŏk đơ̆ng sơnăm 2011, hăm iung jang đơ̆ng dôm tơdrong jang oei kơƀăh kơƀôch tôm tơdrong, mă kăl găh trong nơnăm tim mă tơgăl ăn atŏk tơ iung mŭk drăm tơpôl, lơ̆m mă kon jên tơmơ̆t jang đơ̆ng hơnih mong jên bơ̆ jang teh đak oei kơƀăh kơƀôch dơ̆ng. Tơ̆ hơnăp tơdrong au, Khul kơdră Đảng, Kơdră chĕp pơgơ̆r kơ tơring Ea Sol hlôi atŏk kơtang bơ̆ jang chă pơrô̆ pơrôp, pơjing đei jơhngơ̆m đon drơ̆ng mĭnh nơ̆r đơ̆ng kon pơlei, vang kơrŭn jơhngơ̆m tơ iung pơjing tơring tơrang ‘nao. Chă hơvơn rim khul tơmơ̆t jên jang kiơ̆ trong kơdih vang iung jang đơ̆ng kon pơlei. Ƀok Ksơr Ygư, Kơ iĕng Kơdră chĕp pơgơ̆r Đảng, Kơdră chĕp pơgơ̆r Hơnih vei lăng kon pơlei tơring Ea Sol, apŭng Ea Hleo tơbăt:“Tơring tơlĕch tơdrong jang pơting dih băl jang pran kơtang tơ iung pơjing tơring tơrang ‘nao ƀar păh pơlei pơla au hăm pơlei pơla mă to. Hlŏh tơlĕch jang kiơ̆, tơring hlôi đei tơplih hơdăh găh trong nơnăm, mă kăl trong glung 15 au ki đei ming hơmet, pơih să đơ̆ng noh rim trong năm tơ̆ tơring, năm tơ̆ pơlei pơla jei tơmơ̆t jên jang ming man”.

Adoi nhen lơ tơring đei lơ kon pơlei kon kông anai kơ dêh char Đak Lăk, sơ̆ tơring Yang Tao, apŭng Lăk đei ŭnh hnam dơnuh tôch kơ lơ, lơm tơring đei hloh 2.500 ŭnh hnam ‘nŏh bơngai kon kông tơmơ̆t 96%. Vă tơgŭm kon pơlei yak hloh dơnuh atŭm hăm tơdrong lăng ba lơ tơdrong đơ̆ng Đảng păng Teh đak, apŭng Lăk hlôi ‘măn lơ kon jên hu au to ăn tơring Yang Tao atŏk tơ iung mŭk drăm tơpôl. Truh dang ei, hlôi đei tơdrong tơplih hơdăh hăm rim ŭnh hnam kon pơlei tơ̆ au. Yă H’ Loan Uông, Kơ iĕng Kơdră chĕp pơgơ̆r Đảng, Kơdră chĕp pơgơ̆r Hơnih vei lăng kon pơlei tơring Yang Tao, apŭng Lăk chơt hơ iă tơbăt:“ Lơ̆m tơring Yang Tao hlôi đei tơplih hơdăh. Tơdrong tơplih ‘long pơtăm kon tơrong sơ̆ đei lơ ŭnh hnam ư̆h kơ gan lăng truh tơdrong rong kon tơrong truh hloi chă rong kơpô, rơmo, nhŭng iĕr mă lei truh dang ei ‘noh ŭnh hnam ayơ jei hlôi tơplih lơ̆m rong kon tơrong. Ŭnh hnam ayơ jei đei rơmo, ưh kơ đei rơmo ‘noh chă rong iĕr bip”.

Kiơ̆ Tơdrong tơchơ̆t Pơm lêh Hop akŏm Đảng dêh char Đăk Lăk jăl jang 2020-2025, mĭnh sơnăm, tơjur đơ̆ng 1-2% ŭnh hnam dơnuh. Ŭnh hnam dơnuh lơ̆m pơlei kon kông tơjur đơ̆ng 3-4%. Ŭnh hnam dơnuh tơ̆ rim apŭng dơnuh tơjur đơ̆ng 4-5%. Vă iŏk đei trong tơlĕch jang, tơ̆ hop akŏm pơtôch jang kiơ̆ tŏk bŏk jăl jang lơ̆m jang kiơ̆ Tơdrong tơchơ̆t Pơm lêh hop akŏm Đảng dêh char ‘nao au, Kơdră jang lơ̆m Trung ương Đảng, Ƀĭ thư Đảng dêh char Đak Lăk Nguyễn Đình Trung pơma hơdăh:“ Hơnơ̆ng pơrô̆ atŏk kơtang hloh dơ̆ng hơnăp jang kơ rim hơnih đảng, jang kiơ̆ kơjăp rim trong bơ̆ jang đơ̆ng Đảng, Khôi luơ̆t Teh đak găh atŏk tơ iung mŭk drăm tơpôl tĕnh koăng păng kơjăp ‘lơ̆ng. Tơlĕch kon jên jang hơdrol ăn rim tơdrong jang tơm kăl, tơdrong jang tơgŭm djru ăn tơring kon kông, tơring hơtăih yăih, tơring sơlam teh đak vă jang kiơ̆ jơnei rim trong tơlĕch jang, tơdrong jang mă Tơdrong tơchơ̆t pơm lêh hop akŏm kơdră tang măt Đảng dêh char jăl 17 tơlĕch ăn”.

Dêh char Đăk Lăk tŏk bŏk atŏk kơtang jang kiơ̆ rim tơdrong jang tơm teh đak tơjur dơnuh kơjăp ‘lơ̆ng, rim trong jang tơgŭm djru tơjur dơnuh nhen: ăn tŏk iŏk jên hăm jên cheh tŏ sĕt, pơtrŭt choh jang sa, pơtrŭt jang ‘long bri, atŏk tơ iung rong ka hơdang, hŏk tơdrong jang, jang pơgang, pơtho pơhrăm. Lăng ba kơjăp hloh dơ̆ng truh bơ̆ jang tơmơ̆t bơngai kon kông bơ̆ jang kang ƀô̆. Atŏk tơ iung khul kơtă ‘nŏh bơngai kon kông trŏ lăp hăm trong bơ̆ jang lơ̆m chăl hrei au.