Lơ nơ̆r tơgop găh pơjao teh, ăn mơng teh, tơplih iŏk yua teh, iŏk tơvih teh, hrŭ ăn, tơgum djru pơjing hơnih oei ‘nao mưh teh đak iŏk tơvih teh hlôi đei rim bơngai tang măt pơma hơdăh. Kiơ̆ đơ̆ng rim bơngai tang măt, tơpă yan au lơ̆m trong jang iŏk tơvih teh đei tơnap tap, ƀôh lơ pơm ăn truh tơdrong tơkêng kơtang, lơ bơngai, găh lơ pơm ăn kơ yuơ tim mă tơchơ̆t hơdăh găh trong hrŭ ăn tơgum djru, tim mă đei lei lăi lơ̆m iung jang kiơ̆. Kơ yuơ lơ loh, trong jang pơm hla bơar, bơ̆ jang hrŭ ăn, tơgŭm djru, pơjing hơnih oei ‘nao, iŏk tơvih teh kăl hơtŏ hơnơ̆ng, tơpăt, trŏ ƀlep păng jang tơnăp tơblang hơdăh, sơđơ̆ng trŏ lăp đei iŏk yua kơ teh đak, hơnih mơdro sa păng kon pơlei.

Ăn tơgop nơ̆r găh atŏk tơ iung hơgăt teh pơjing đei hơgăt teh choh jang sa, bri ‘long ‘moi kiơ̆ tơdrong mơng păng tĕch răt, rim bơngai tang măt hơlen ‘nau jing tơdrong ‘nao pơjing rơvơn lơ̆m jang kiơ̆ lang să hơgăt teh choh jang sa. Mă lei, Khôi luơ̆t kăl tơchơ̆t hơdăh găh rim bơngai gơ̆h ăn mơng dăh mă tĕch mơdro. Tơ̆ hop akŏm, rim bơngai tang măt jei akŏm ăn tơgop nơ̆r găh pơgơ̆r jang kiơ̆ pơ prŏ, trong vă jang iŏk yua teh; rim tơdrong tơchơ̆t đei ƀơm truh lang să hơgăt teh; găh pơm hla bơar pơm tơngla teh, ƀơk ăn hla bơar pơm tơngla păng rim tơdrong jang pơm hla bơar đei ƀơm truh groi teh.